Daxuyaniya Navenda PEN a Kurd

Veröffentlicht von

post-wene-01Di nav rewş û mercên herî hestiyar û dîrokî de, gelê Kurd rastî guherînên mezin û girîng tên li Rojhilata Navîn. Li aliyekî bi metirsiyên çarenivîsaz re rûbirû maye, û li aliyê din jî pêşengiya guherandinên şaristanî dike. Ji hêlekê serkeftina îradeya Kurdên bakurê Kurdistanê di hilbijartinan de û herifandina dîwar û sînorên tirs û bê çarebûnê, ji hêla din dîplomasiya başûrê Kurdistanê ji bo bidestxistina mafên gelê Kurd di qada navneteweyî de, û ya ji hemûya girîngtir jî serkeftina şervanên Kurd li Rojavayê welêt bi ser hovên DAIŞ ê û hevpeymanên wan de ku ji hemû Kurdên xwedî wîcdan re cihê şanazî û serbilindiyê ye.


Gelê Kurd dixwaze wekî hemû netewên cîhanê xwedî maf û heqên xwe yên meşrû be. Piştî rêxistinbûna civakî û hişmendî ya gel li herçar perçeyên welat, dagirkerên Kurdistanê ji bo ku Kurd nebin xwediyê tu statuyan dixwazin hemû dek û dolaban li serê Gelê Kurd bigerînin. Hîn komkujiya Şengalê wekî agirekî li ser dilê me venemirîbû û me êşa gelê xwe yê Êzidî ji bîr nekiribû, vê carê jî bi heman feraseta êrîşa Şengalê girtin ser Kobaniya birîndar û bi sedan zarok û jinên sivîl bi awayekî hovane kuştin.

Bêguman yek ji sedemên vê komkujiya plankirî serkeftinên gelê Kurdin li Rojavayê welat û ya herî dawî jî girtina Girê Spî bû ji aliyê hêzên gel. Çawa berî Kobanî rizgar bibe bi çend roja serokomarê Tirkiyê yê aniha got Kobanî li ber ketinê ye, heman kes piştî bidestxistina Girê Spî jî got; ji bo ku Kurd li Rojava nebin xwedî dewlet çi ji destê me bê emê bikin û bedela wê jî çi dibe bila bibe!

Mixabin dijminên Kurdan ne tenê serdestên wan in. Wekî hatiye gotin ji kevirên dijminan bêtir em bi avêtina gula ji destê dostê xwe diêşin. Piştî girtina Girê Spî û hemû hewlên Kurdan ji bo afirandina civakek dadwer û yeksane ku cihê hemû gelan têda hebe. Ji bo ku Kurd bi ser nekevin hewlên reşkirina van destkefta û guhertina rastiya tê kirin ji aliyê gelek kes, nivîskar, dezgeh û çapemeniyê ve.

Dibêjin bila Kurd êrîşan nebin ser kêmnetewên din yên li Kurdistanê û demografiya Rojava xera nekin. Bi rastî mirov nizane ji kû dest pê bike û çawa xelas bike ku bê kê bi dehan salane demografiya Rojava, Başûr û hemû welatê me xera kiriye û kê ew qas komkujî encam dane.

Li gorî baweriya me hemû zindiyên ku hatine ser xaka vê cîhanê xwedî mafên takekesî, komî û netewîne. Kes nikare mafên kesekî din binpê bike an jî tune bihesibîne. Encam û bedelê wê çi dibe bila bibe wê gelê Kurd ji riya xwe ya azadîxwaz, aştîxwaz û wekheviyê venegere. Ji bo vê yekê jî tu riyeke din ji xeynî yekîtiya Kurdan tuneye.

Wekî saziyeke nivîskarên Kurdan em kurt û kurmancî dibêjin, çi siyasetmedar, çi aktivîstên saziyên sivîl, çi rojnameger û bi taybetî jî nivîskarên vê civakê bin û hwd. divê ji bo berjewendiyên gelê xwe û erdnigariya xwe ked bidin, ji bo dadweriyê, aştiyê u azadiyê xebat bikin, lê berî hertiştî divê rastiyê bibînin, rastiyê binivîsin û li gorî wê tevbigerin. Rêyeke din ya şaş wê ji aliyê wicdana gel ve bê şermezar kirin û tune bê hesibandin. Hêviya me ew e ku roj berî rojê em jî karibin wekî hemû millet û dewletên cihanê xwedî mafên xwe yên mirovî û neteweyî bin.

Navenda PEN a Kurdn