نیشتیمانه‌ک ژ کۆلیلکا هنارێ دناڤبه‌را سرۆشت و خودێ دا تۆ...مه‌مله‌که‌ته‌ک وندا بویی د ناڤبه‌را مرۆڤ و خوه‌زایێ دا تۆ...نیشتیمانه‌ک به‌رزه‌یی دناڤبه‌را مه‌سیحه‌ک بزماردایی و.. مریه‌مایه‌ک عه‌زرایێ دا تۆ...دوعایه‌ک، ئه‌شکه‌نجه‌دایی ئه‌ی بشکۆژا شه‌رمین، هاتییه‌ دونیایێ و... قه‌ده‌خه‌کری ژیایی... ئه‌ی کۆلیلکا د وه‌رزێ خیفبوونێ دا چرمسی و...د وه‌رزێ چنینێ دا خرش ده‌رکه‌تی ... ... ... ئه‌م فێرنه‌بوین، وه‌کی هه‌یڤێ به‌رسڤێ بده‌ین ئه‌هریمه‌نان دا تو، هه‌ر "دندک هنار" شاها جوانیێ ب مینی ئه‌م فیر نه‌بوین وه‌کی مێشا هنگڤینێ ب کۆباری لسه‌ر په‌رێن ته‌ داده‌ین ژ بو هنگڤینه‌کی سروشتی و خومالی ل هه‌می جورێن گۆلا سلاڤ بکه‌ین یێن بلند...یێن نزم یێن که‌هی...کۆیڤی یێن سۆر، زه‌ر، سپی ، بنه‌فشی، بێ جوداهی شا‌نه‌کێ ژ مالکێن وه‌کهه‌ڤ ئاڤا بکه‌ین ئه‌م فێرنه‌بوین، وه‌کی به‌لاتینکان تۆڤێ ڤیانێ، لسه‌ر بشکوژا سینگێ ته‌ برێژین ئو... ب ئارمانجا به‌لاڤکرنا تۆڤێ ئه‌ڤینێ ب نازکی خۆناڤا لسه‌ر په‌رێن ته‌ یێن سپێده‌یی ب مێژین ئه‌م فیر نه‌بوین وه‌کی ته‌یر و ته‌والان، سرۆدێن جوانیێ بخوینن حه‌تا ببی جوته‌ک هناران ببی دندک هنار.. پیره‌پایزۆکێن ڤه‌ژینێ، بو نفشێن ژبیرکری بێژین ئه‌م فیر نه‌بوین، وه‌کی ده‌مسالێن بهاری رۆپه‌لێن که‌تن و وه‌ریانێ، لسه‌ر رۆیکێن ته‌ ڤه‌ده‌ین و... شه‌رابا زیندیبۆنێ ژ لێڤێن ته‌ ب بارینین...برێژین ئه‌ی کۆلیلکا، د ناڤ ده‌ستێن بێ ره‌حم دا هاتییه‌ قرمچاندن یا ل وه‌رزێ خیفبوونێ چرمسی ئو... د وه‌رزێ چنینێ دا خرش ده‌رکه‌تی!! ... ... ... ژ بۆ تو ... بێهنا کۆلیلکا هنارێ و نێرگزان ژ هه‌ڤ جودا بکه‌ی پێویسته‌ تو چیروکا "بم... .بم بێهنا مرۆڤی بیانی تێت... بم... بم بێهنا گرارا بۆسی تێت" فێر ببی... ژ بۆ تو ... ره‌نگێ وێ و خوینا شه‌هیدان تێکه‌ل نه‌که‌ی پێویسته‌ تو بسپوری ڤه‌خوارنا شه‌رابا سۆر بی ژ بۆ تو ... زه‌مه‌نێ د ناڤبه‌را گه‌رکا کۆلیلکێ و گه‌هشتنا دندکێ دا ب پیڤی... و بهایێ وی بزانی پێویسته‌ تو سوار چاکه‌کێ پشت هه‌سپ بی ژ بو کۆ.. تو بزانی هه‌یڤ جوانتره‌ یان دندک هنار پێویسته‌ ناڤێ ته‌، د په‌رتوکێن ئه‌فساناندا تومارکری بیت ئه‌ی کۆلیلکا د سێ وه‌رزاندا دبی دندک هنار ئو د وه‌رزی چاراندا، دبی ده‌رمانێ ده‌ردان ئو .. چیروکێن ڤه‌گێرای...ژ بو زارۆکێن خه‌و لێ ڤه‌هه‌رمی ئو.. زیره‌ڤانێن سه‌ڤێ یێن هایا وان ژ پێژنا دزان نه‌ی، یێن گوه نه‌سمی ئاخ کۆلیلکا نازک ئاخ...نیشتیمان د زانم د به‌ر تایا مرنێ ڕا چوی حه‌سره‌ت و داخوازا ته‌، ئاڤا هنارێ یه‌ هنارا شرین...هنارا مز... هنارا ترش لێ دیسان ئه‌ز دلناده‌م لۆمه‌ی ته‌ بکه‌م کۆ ته‌، ره‌زڤانێن وه‌ها په‌روه‌رده‌ ‌کر بن هه‌تا کۆ ل بهارێ کۆلیلک ئاڤز نه‌بن...و ل پایزان هنار ده‌رکه‌ڤن خرش ...   ...   ... تو.. کۆلیلکه‌ک ب به‌ختیاری خیف بوی لێ.. نیشتیمانه‌ک به‌ختڕه‌ش هاتی دنێ تو.. کۆلیلکه‌ک ژ ره‌نگێ ئه‌ڤینێ بشکفتی لێ.. نیستیمانه‌ک ژ ره‌نگی خوینێ هشتی تو.. شتله‌ک دارا ژیانێ، بخێرهاتن و سلاڤی لێ.. .نیشتیمانه‌ک کوچبه‌ر، بێ نیشان و ناڤی تو.. کۆلیلکه‌ک په‌ڕێن ته‌ ژ په‌لێن ئاگری لێ...نیشتیمانه‌ک ژ مروڤێن بێ که‌د..بێ بزاڤ و ڤه‌مری تو.. کۆلیلکه‌ک ب پلان چوار وه‌رزێن خوه‌ ده‌رباس دکه‌ی لێ...نیشتیمانه‌ک (ئاشگێڕانا وی) ل به‌ندا خودێ مایی تو.. کۆلیلکه‌ک پێگه‌هشتی دبی هناره‌ک داگرتی ژ دندکێن زه‌لاڵ و نازک شرین..مز و ترش لێ ێ ...نیشتیمانه‌ک ژ نازکیێ ڤالا، مشتی مرۆڤێن خرش ئه‌ی کۆلیلکا ل بهارێ، سۆز دایه‌ نه‌ساخان ل پاییز و زڤستانان ژێرا دبی ده‌رمان ئه‌ی کۆلیلکا پیرۆز به‌رمایا ئاگرێ ئه‌زه‌لی ژ بو ئه‌ڤینداران د بی دله‌کێ مه‌زن و ڤه‌کری ژ بو وان ده‌ستێن دخوازن ته‌ بقه‌فینن د بی ئاگردانا په‌لێن گه‌ش، دبی گۆری ژ ئه‌گه‌را جوانی، نازکی و دلساخیا ته‌ گه‌له‌ک جاران مرۆڤان تو خاپاندی له‌وان ئه‌ڤرو گه‌هشتی وێ بریارێ ژ بو ئه‌ڤیندارێن ریا راست ببی رویکێن گه‌ش لێڤێن قۆرمزی ئو مه‌مکێن ده‌ستلێنه‌دای و نه‌چنی شه‌رابا زیندیبونی و سه‌رمه‌ستان ئو...ژ بو خاپینوکان ژی، ببی  ئاگردان ببی بۆمبه‌یا ده‌ستان ئه‌ی کۆلیلکا د سپێده‌یا خیف بونێ دا د خه‌ودا مای ئو.. د وه‌رزێ چنینێ دا، کرمی ده‌رکه‌تی ئه‌ی کۆلیلکا د وه‌رزێ خیفبوونێ دا چرمسی و...د وه‌رزێ چنینێ دا خرش ده‌رکه‌تی ...   ...   ... خوه‌ بگڤێشن ئه‌ورینۆ... بباره‌ ئاسمانۆ... رویکێن کۆلیلکا من زۆها بوونه‌ سۆبه‌یان ژ خه‌و رادبیت بێ خۆناڤ سه‌رێ خوه‌ بچه‌مینن چیانۆ.. ژ بلندیا وه‌ مه‌ خێر نه‌دیت کۆلیلکا من روژ په‌رێسه‌، وێ ده‌ستنڤێژ تیرۆژک و حه‌تاڤ خوه‌ بده‌ن لایه‌کی ره‌زڤانینۆ... کۆلیلکا من ناخوازه‌ خه‌مساران ببینه‌ یێن کۆ... ل دزێن دندک هنارێ به‌رێ خوه‌ وه‌ردگێرن د مه‌شن بێ دیتن، بێ نێڕین و چاڤ ب خه‌مله‌ بهارێ.... دا ل پاییزان ڤه‌خوین شه‌رابا زیندیبونێ سه‌رخوه‌ش ببین ئه‌م هه‌می، بیه‌ک جارێ " نه‌شعا قه‌ده‌حان، مه‌یا مۆڕه‌وه‌ق که‌یفا عینه‌با ره‌زێ ب ڕه‌ونه‌ق ...   ...   ... ...   ...   ... یانی بکه‌ڤیته‌ جانی شه‌وقه‌ک حه‌تتا بگه‌هیته‌ قه‌لبی زه‌وقه‌ک " ...   ...   ...   تو..که‌له‌کا بچویک یا لسه‌ر سینگێ رویبارێ ژیانێ... د ناڤ پێلێن دژوار  و زڤروکێن بسه‌هم دا ده‌رباس بویی پڕ جاران بناڤ بوی، سه‌رئاڤ که‌تی پێل و..پێل چه‌م و... چه‌م حه‌تا گه‌هشتی په‌راڤێن ته‌ناهییێ ده‌ملده‌ست بویی گه‌میه‌ک مه‌زن ئه‌گه‌ر پێشوه‌خت ته‌ ژ بو گه‌شتێن ده‌ریایی ڕاز و نه‌په‌نیێن وێ و یاریا لگه‌ل پێلان ئاماده‌ نه‌کر بیت بێ ی له‌نگه‌رگرتن بی ی زێره‌ڤان بی ئالا، بێ ی ناڤونیشان، بێ ی کاپیتان بمه‌شی لسه‌ر پشتا حویتان ما ژ بلی بکه‌ڤی ده‌ستێن قاچاخچیێن ده‌ریایی و.. ب ده‌ستێن پیراتان بهێ ی ره‌ڤاندن ته‌ چ جاره‌نڤێسه‌ک دی هه‌یه‌؟! تو... بازێ هه‌ری بلند فریایی شاهێ ئاسمانان ته‌به‌ق... ته‌به‌ق، چین... چین گه‌ریایی ئه‌گه‌ر ته‌ بهایێ بلندیێ نه‌زانی بیت ما ژ که‌تنێ زێده‌تر چاڤه‌رێ ی چ دی؟! تو... کۆلیلکا پڕ ژێهاتی د سه‌مایا بهارا پڕ ره‌نگی دا ئه‌گه‌ر د سه‌ر خوه‌را، چ ره‌نگێن دی ناس نه‌که‌ی ما ژ وه‌ریانی زێده‌تر بکێر چ دهێ ی؟! ئه‌ی کۆلیلکا د وه‌رزی خیفبونی دا چرمسی ئو.. د وه‌زێ چنینی دا خرش ده‌رکه‌تی ئه‌ی کۆلیلکا ژ ره‌نگێ ئه‌ڤینێ ژ ره‌نگی خوینێ ژ ره‌نگی ئاگری... ژ ره‌نگی هه‌واران و ترسێ ڤی جارێ ژی دێ بمه‌ ره‌زڤانێ لبه‌نده‌ماینێ حه‌تا پایزێ دێ چاڤه‌رێ بم یان دێ بی یه‌ هناره‌ک دندک زه‌لال و تژی یان ژی دێ بی یه‌ نارنجۆکه‌ک، بۆمبه‌یا ده‌ستان ئو گه‌هی بریارا خوه‌کوشتنی مه‌ ژی ب خوه‌را کوژی مه‌‌ هه‌میان لگه‌ل خوه‌ کوژی نجیب بالایی پراگ 2009      Vegere Destpêkê.......