Dil koçero û 11 salên şewatê

(Ji bo nivîskar û helbestvan Hoşeng Osê)

Nezîr Melle

Ez vê sibehê li ser birîna te şiyar bûm.
Û disan birînên te yên axivandî gulek sor nîgar dikin û agirê işqê te disotîne..

Ey koçberê li pey koçberan,

xwe ragire !!!

Şînê vekirî û derya

11 salên şewatê,

11 salên ku bên,

di gera te de serxweş dibin

Tiriyê merzone, bîhok û payiz ji te hezdikin

kereng, qinêber û stirîzerk çîroka dilvedana te, koçberiya te, çiyaheziya te, mêrdîndeşta te, deştbuhara te, buhartiliya te, tilîsinfoniya te, sinfonîhelbesta te, helbestxama te, xamrohniya te dibêjin.

Xwe ragre!!!

ditirsim, bejnrîhaniya te li ber pêlên 11 saliya te xwe negrin

Çima tu barê kezebşewitiyê disbêre dilperitiyo?

Çima disan birînên 11 salî li ber 11saliyê vedikî?

Xwe neke zavakî ji berfê,

buka ji xwînê wê te himbêz bike.

Tava buhara xwe bi ser zinaran de neşine!

berê dil cobarên kûr diherikîne.

Derdmendiya te kirasekî sor e,

xwe li şevê dipêçe

Ew çiyayê tu jê hezdikî, dizane bê çawa bahozan kedî bike û çivîkan bifrêxîne

Dildest vekiriyo!!

Koçberê li ser koçberan!

Xwe ragre!!!

Gavên te pirtiqalî ne û erda te şîrkî ye

Ezman xewna te dike,

mîna ewrekî xwe li te digre

Xwe ragre!

Û van birînan bispêre axa şewitî!

Axa şewitî bibarîne li ser şînê vekirî!

Ev şînê vekirî ye.

Rojê vedgerîne quntara şevê,

derya ezman vedgerîne tozê,

di nava du kevana de dilîze, ezazîl direve û xwedê derdixe ji rê...

Xwe ragre bira û zorê nede birînê....

çapkirin