BÊHNA BÎRANÎNAN

Xizan Şîlan   

ez

ne jiyam

ne jî mir im

di wêraniya zaroktiya xwe de

derbeder im

Cîhan

penihî dilê min

ez

li ser axa welatê xwe

hê penaber im

dem û heyam

di rûyê ciwaniya min de

kal û pîr bûn

pêşeroj

di qilfa gumaneke tehl de

digindire

li nav okyanûsê

giraveke bêkes im

li çolistana giyanê xwe

hesretkêşê

dilopek baranê me

ax û nalîn

bedbextiya min

ji telpa ewran

û tenetiya min

ji dîmenên qelebalixan

bipirsin

ez

rêwiyê herika demê me

di leyistika satrancê de

wezîrê berxwedanê me

li siya jana xerîbiyê

dostan berhev dikim

şev

hêsirên dergûşa dil

di qefesa xwe de

vedişêre

li rojan

xewa xwe

li xilmaşkiya çavên xewê

radizênim

kul û keder

êş û keser

fotokopiya temenê min in

li reşetariya şevê

siya bijangên xwe

dibînim

ken û şadî

li ser lêvan

qurifîn

li sahneya şanoyê

fîgûranê êşa me

qenciyê

li ser kevirê mermer

û xirabiyê

li tozê dinivîsim

bêhna bîranînên min

yên berba bûyi

ji stran

tembûr

bilûr

mizrab û têlan

bipirsin!!

         Xizan Şîlan

         2006-11-01

         Stockholm  

çapkirin