DI XEWÊ DE PAYÎ ME

 Xizan Şîlan

ez

li nav pêlên bablîsoka

jiyana pûşt

tamikê devê masiyê mirî me

li koçberiya berbangan

qajîn û hawara gewriyên çûka me

jana helbestên xwe

li pêşangeha mirina bêwext

ji roja mehşerê re

pêşkêş dikim

stêrkên şermok

li tenetiya şevistanên bizdonek

li dor xem û xeyalên xwe

direqisînim

çirûskên rojê

li koretariya şevan

di rojhilata nava dilê xwe de

diçirisînim

hosînameya mirina xwe

li qefesa tofana okyanûsan

dinivisînim

rengê dîroka çilmisî

bi bêhna kulîlkan

dineqşînim

ez

li şiyarbûnê di xewê de me

di xewê de payî me

rêya karwanê kul û kederan

di movikên laşe çarenûsa min re

dibihurin

bi saya dengê lorînên dayikan

mayîn û têlstriyan

ji nav tixubên axa zeviyê xwe

dineqînim

ji xemgîniya pênûsa hesretê

îlham dipale

min

tova hêviyên tarûmar bûyî

li kendalên avhewaya

ekvatorê hinavê xwe

çandin

ji henasa salnameya demsalan

bêhna barûta genî

difûre

şev û rojan

çembera îxaneta qehpik

li stûyê bihuşta giyanê min

alandin

awaza strana bilbilê baxê min

di darbesta jiyanê de

fetisandin

fanosa eşqa dil

tefandin

aramî

li stargeha temenê kin

herimandin

bîleta mirineke zû hatî

ji bazara reş diyarî min kirin

êdî qeyika kesera dil

li perava mestbûna xeyalan

di rûbarê xeman de

diçeliqe

nalînan

di bin lihêfa êşa xewan de

kevz girtin

bîr û bawerî

li têkçûyîna bêrîkirinan

hatin rûxandin

ne jiyan layiqî min bû

ne jî ez şayanî mirinê bûm

werin

xweliya şewata termê min

bi destmala kefa destê dilberan

verê bikin

                     Xizan Şîlan

                     2007-08-08

                     Stockholm

çapkirin