HENASA AWIRAN QELIŞÎ

Xizan Şîlan

bi kilîda hêviyên piştxûz

dergehê dojeha dil

vedikim

li êşkenceya zîndanên hestên xwe

dibim mêvanê kurtepista

şevbihêrkên tarûmar

kul û kederê

li ser qefesa bêrîkirinên winda

kevz girt

roj û meh

sal û demsal

aramî û xoşewîstî

bi pêlên bareşa felekê re

firîn

zimanê xweşbîniyê

li ber devê tirpana zikreşan

ko bû

qeşmeran

barê êşa ewrên xof

li birîna pişta min

siwar kirin

singûya îxanetê

di mêjiyê azadiya ramanê de

daçikandin

coşa silava rojên şad

kût û şerpeze bû

wêne bêwate

stran fetisî

hezkirin qerisî

rengê demsalan çilmisî

henasa awiran qelişî

kanî ziwa bûn

lehiya demê

berevajî diherike

dil û kezeb

di pîzota agirê evînê de

hatin sotin

heyv û stêrk

di nalîna xewa herimî de

xwîn vedirişin

li sergêjiya lingên şemitok

peyarê di bin gavên min de

westiyan

êş û tirsê

xwe li parsûyê giyan

pêçandin

mîrata xewnereşkên şevê

kirasê mirinê

li stûyê min

alandin

jêdûrketina 

heval û dostan

ez li kendalên tenetiyê

xeniqandim

li nav refê teyran

çûkê xerîb û baskbirîndar im

şahiya bîranînên berbabûyî

dilê evîna derwêşê gerok

awaza bilbilê hesretkêş

axîna kela dilê dengbêjan

di xwîna rehê kelecanê min de

diperpitin

li kolanên bajarê bêxwedî

li şopa germiya dilovaniyê

digerim

toza gunehên beden

bi xunava kulîlkên bihuştê

dişom

her roj

firmêskên dergûşa dil

bi şîrê hêvî û xeyalên qurmiçî

aşt dikim

                      Xizan Şîlan

                      2008-04-14

                      Stockholm

çapkirin