XEYALAN DIRÊSIM

Xizan Şîlan

ez

li kolanên xerîbiya xopan

jana evîndariya derbeder

dixwim

birîna kul û derdan

vedixwim

û êşa hesreta welatê rojê

dikişînim

li ber peşkên barana

heyva çardeşevî

tevna bêhna gulgeniman

dihûnim

bêdengiya agirpijiya giyanê

di henasa birûskvedanê de

diteqînim

siya tirs û gumanê

bi meqesa dilê xepînok

dibirim

li rêwîtiya şevistanan

hêvî û wêrekiyê

dimeyînim

rengê demên çilmisî

bi keskesora asoya xemgîn

dineqişînim

di hîqehîqa gewriya zarokan de

zikê bextreşiyê

didirînim

bi xumxuma nalîna çeman re

qesîdeya sebra dayikan

dilorînim

bi saya xwêdana

eniya kuliyên berfê

koretariya şevên bizdonek

diçirînim

li bandeva zinaran

herika şîpa ramaneke

bêserûbinî me

rûpelên dîroka genî

li kurtepista xewna şevan

ji  nû ve

dinivisînim

dergûşa şaristaniyê

di hembêza bûka newalan de

dihewînim

bedenê pakrewanên nemir

bi kirasê aramiya

bejna dara gûzê

dinixumînim

li nav pêlên okyanûsê

konê şervanên berxwedanê

vedigirim

tovên kulîlka serkeftinê

li ser sîngê çiyayê Qendîlê

direşînim

di pêsîra awaza çiyan de

agirê şahiya newrozê

vêdixim

û li meydanên strana Oramar

govenda azadiyê

digerînim

                        Xizan Şîlan

                        2008-05-01

                        Stockholm

çapkirin