anmeldung

Agahdarî li ser bîranîna sedsaliya

Apo Osman Sebrî

1905-2005

Dara azadî bi xwûn û xûydan tête avdan

Çandiyê wê bi navê leheng her tête navdan

Osman Sebrî, 01.03.1972

Xûşk û birayên hêja,

Banga me berê li ser Apo Osman Sebrî belavkiribû, kete destên gelek mirovan û piştgîriyeka mezin jê ra hate nîşandan. Bi dilxaşî û serbilindî em mizgîniyê didin we, ko ew gihîşte armancê xwe.

Mixabin ji ber derfetan me nikanîbû bigihîştana hemû welatparêzan, lê dîsa jî di demeka kurt da (di dema çar hefteyan da) 228 îmze ji hemû beşên Kurdistanê û ji gelek pîşe wek nivîskar, helbestvan, hunermend, rojnamevan, mamoste, bijîjk, muhendiz û rewşenbîrên welatparêz gihîştin me.

Ev yeka dîyardike, ko gelê kurd bi çavekî bilind li têkoşerê xwe yê nemir Apo Osman Sebrî temaşedike û bîranîna sedsaliya wî erkekî dîrokî ji xwe ra dibîne.

Êdî, xûşk û birayên hêja û welatparêzên dilsoz, çi li welat û çi li dervay welat pêwîste em hemû di vî karî pîroz da beşdarbin û ji xwe ra bikin armanc û wezîfe, ko sala 2005an wek sedsalîya Apo Osman Sebrî bi çalakiyên rengîn pîrozbikin.

Li Berlînê welatparêzên kurd dixazin beşdarbûna xwe di van çalakîyan da bi şêweyê jêrîn amadebikin:

1. Rêzek sêmînar (şîrove û lêkolîn)

- Jîyana Apo Osman Sebrî

- Xebata wî ya sîyasî

- Bîranîn

- Çîrok

- Helbest

- Ziman

2. Nîşandana wêne, dîya, fîlm

3. Şahîyeka folklorî

Li gel silav û rêz

Rewşenbîrên kurd li Berlînê Berlin, 08.07.2004

çapkirin