Kongireya 72an ya PENa Navneteweyî li Berlinê
ji 22 - 28ê meha 6an a 2006ê û 
beşdarbûna şanda Navenda PENa Kurd bi niwênertiya
Bêrîvan Doskî û Mustefa Reşîd

Bêrîvan Doskî

Almaniya berî 20 salan jî mêvandariya kongireya PENa Navneteweyî li bajarê Hamburgê kiribû û vaye careke din li bajarê Berlinê mêvandariyê dike.

Berlin, bajarê ku dîwarê wî yê bi nav û deng - heya herifîna wî - bûye sembolê şerê sar di navbera eniya çep û rast de li cîhanê û dabeşbûna Almaniya Rojhilat û Rojava û niha bûye paytexta yekbûyî ya Almaniya, êdî bûye cihê lidarxistina civîn û konferansan li navbera başûr, bakur, rojhilat û rojava.

Li vir, li Berlin mirov dikare paşmayên dîrokê bi çend awayan bibîne û ew paşmayî ji xwe re şahidiyê li bûyeran dike, hem di dîrokê de bi giştî û hem jî di dîroka Almaniya de bi taybetî.

Mirov li Berlin hem paşmawên artîst, hunermend, zana û filosofan dibîne, hem jî paşmawên tawanan dibîne, mîna tawanên ku Naziyan kirin.

Dîsa bas li ser Berlin; ew bajarê ku hatiye nûjenkirin, li cihê dîwarê bednav êdî avahiyên herî modern hatine avakirin û niha jî rûyê geş ê avahiyên kevnar bi mirovî re dikenin û nîşaneyên şaristaniyeke mezin xuya dikin.

Niha jî ezê bas li ser programa kongireyê bikim. Ez bi xwe hinekê li cihê Kek Zerdeşt dereng gehiştim kongireyê, ku ji ber sedemên nexweşiyê nekarîbû amade bibe. Ez roja sêşemiyê, yanê paş 2 rojan ji destpêkirina kongireyê gehişim Berlin. Lê mamosta Mustefa Reşîd her li destpêkê li kongireyê amadebû, ew tevlî civînên giring bûbû, bandora xwe wek şanda Navenda PENa Kurd danabû û di diskûsiyonan de beşdarî kiribû.

Roja yekê ji kongireyê, 22-5-06 Roja Duşemiyê:

Piştî geyiştin û navnivêsînê konferansa rojnamevanî li ser kongireya 72an ya PENa Navneteweyî ku reklameke mezin li herdera Berlinê jêre hatibû kirin, piştî firavînê civînên herdu komîteyên Nivîskarên di Zîndanan de û ya Nivîskarên ji bo Aştiyê hatin li darxistin, ku Mamosta Mustefa têde beşdarî kir. Dema êvarî jî ahenga bixêrhatinê ku bi mazovaniya Parêzerê (walî) yê Berinê pêk hat, hat lidarxistin.

Roja duyê ya konferansê 23-5-06 Roja Sêşemiyê

Dîsa Mamosta Mustefa bo ku karîbû tevlî civîna duyê ya Komîteya Nivîskarên ji bo Aştiyê serê sibê bibe, bi rê û resmên bi fermî vekirina kongirryê ji layê Horst Köhler, serokê Komara Almaniya Fedral, Jiri Grusa serokê PENa Navneteweyî û nivîskar Günter Grass ve pêk hat. Paş nîvro jî Mamosta Mustefa tevlî civîna Komîta Mafên Ziman û Wergerê bû.

Roja siyê ya konferansê 24-5-06 Roja Çarşemiyê

Serê sibê yekem civîna giştî ya hemû delegasiyonan (Assembly of Delegates) pêk hat, ku têde raporên serok û sekreter û Birêvebira Giştî li ser kar û xebatên wan hatin xwendin. Paşan jî qala xebata PENa Navneteweyî ya girîng hat kirin. Di warê azadkirina nivîskaran de li cihanê em jî rabûn û me bas û spasiya hemû beşdaran ji bo kampaniya azadkirina xanima hêja Dr. Roya Tiloui kir. Paşnîvro jî ez tevlî civîna Komîta Nivîskarên Jin bûm, ku mijara wê ya serekî xwe amadekirin bû ji bo kongira 73ê, ya ku dê li Senegal bê lidarxistin û îmkana beşdarbûn û alîkirina jinên nivîskarên Afriqayî û mijarên elaqedar bi wan ve. Me jî pêşniyar, ra û boçûn hebûn, ku hatin li ber çav girtin. Ji ber van tavlîbûna civînan me nekarî em herin seyrana dîtina bajêr. Mamosta Mustefa jî paş nîvro tevlî civîna duyê ya Komîta Mafên Ziman û Wergerê bû. Paşan jî hemû delegasiyon mêvanên Federal Chancellery Xanima Angela Merkel bûn.

Lê dema êvarî, gava bû danê şîvê, hinde kurdên gelek hêja yên welatparêz, ku ji Mamosta Mustefa re heval bûn hatin du me û em bûn mêvanên wan. Mêvaniya wan xweş bû û em berî şîvê têr li bajêr gerandin. Dema em di wan cade û kolanên xweşik û pan yên Berlinê re digerandin pir keyfa min ji bajêr re dihat, bi min gelek rind û delal xuya dikir. Êdî Mamosta Mustefa henek dikirin û digot: Hinde keyfa te ji bajêr re hatiye, lê tu ji gotina helbestvanê Kurd Seyda Cegerxwîn re çi dibêjî, ku di helbesteke xwe de dibêje:
Em welatê xwe nadin bi Berlîn!

Êdî min jî bi henek ve jêre digot: Mamosta baweriya te hebe, Mamostayê hêja Cegerxwîn diyar e di wî demî de Berlin nedîtibû, nexo rast e, em welatê xwe nadin bi Berlin, lê xweşikbûna Berlinê tiştekî dinê ye. Bi her hal me êvariyeke xweş û delal bi wan kurdên hêja re li Berlina rind û delal bire serî.

Roja çarê ya konferansê 25-5-06 roja Pêncşemiyê

Tevlîbûna civîna duyê ya delegasiyonan ya giştî, xwendina raporên harçar komîtan û pesendkirina kar û xebatên wan. Paşnîvro jî tevlibûna min û Mamosta Mustefa di Work Shopan de, ku li ser misiyona PENa Navneteweyî li cîhanê, li ser xwestek û dîtina endaman bû. Êdî me jî bi hel zanî, ku basê misiyona PENê ji bo zimanên bindest û îmkana lidarxistina konferanseke navneteweyî li Hewlêrê, ku tewawkera Konferansa Amedê be kir. Birastî jî me nedît, ku pirsgirêk nîne, moderetorê panelê jî pêre bû û me hest bi piştgiriyê kir. Dîsa dema êvarî gera li nava bajêr û mêvandariya kurdên welatparêz 

Roja pêncê 26-5-06 Roja Aynî

Hemû roj bi helbijartinên cuda yên serok û hinde endamên desteya rêvebir û endamên komîteyeke nû, ku jêre dibêjin "Search Committee (komîta lêgerînê)", ku erkê wan ew e jimara endaman di komîteyên rêvebir de tewaw be û eger na ew destnîşan bikin û xebata pirkirina wan cihan bikin. Herwisa di civînên wê rojê de dengdan li ser resolosiyonan hat kirin û me jî ji hemû van dengdanan re berjewendiya Navenda PENa Kurd li berçav digirt û ji namzetên hêja re deng dida. Me wisa hest dikir, ku ji ber rewşa dawî ya Navenda PENa Kurd hinde kêmasiyên me hebûn û resolosiyonên me diviyabû bêne amadekirin.

Roja dawiyê 27-5-06 Roja Şemiyê

Tewawkirina dengdan û kar û barên mayî û dîsa beşdarbûna me di civîn û diskûsiyonan de, bi taybet ji mijara ku li ser Rojhilata Navîn, dîtin û pênasa wan ji Rojhilata Navîn re û îmkana lidarxistin û beşdarbûna konferansekê li ser Rojhilata Navîn, ku me gelek dîtin û boçûn anîn ziman. Di pey re jî mijara vekirina hinde PENên din derket holê, bi taybet PENên Ereb yên cuda cuda û di nav de PENeke Iraqî, ku li wir jî me dîtin û boçunên xwe anîn ziman.

Serêvarê jî gera dawiyê bi keştiyê û paşan jî şîva xatirxwestinê bû. Ya balkêş ew bû,  ku keştî di nava goleke mezin de di nava bajêr de bû ku jêre digotin (Van See - Van Sea), ya ku Gola Wanê dianî bîra min û her wisa gotina Mamosta Cegerxwîn. Bi vî rengî me xatir ji bajarê delal yê Berlinê xwest û di gel wê hêviyên kar û xebatên baştir di konferansên dahatî de.

çapkirin