Mêvandariya PENa Înglîzî ji bo niwênera PENa Kurd Bêrîvan Dosky

 

 

Bêrîvan Dosky

 

 

Piştî konferansa Mexico, ez bi rêya Xanim Lucy Popescu ji bo doza Kek Marwan Osman, digel PENa înglîzî di têkiliyê de bûm.

 

Ez roja 6.2.2004an ji bo xwarina êvarê li mala endama komîta nivîskarên zîndanan hatibûm vexwendin. Xanim Julia Stonor li ser şerefa PENa Kurd (guest of honour) ev hevdîtin pêkanîbû.

 

Ez di wexta xwe de gehîştim cihê hevdîtinê; saet 7.30ê êvarê bû. Min dixwest tiştekî renge-kurdawarî pêve hebe bi xwe re bibim, lê mixabin, bi dest min neket û dawiyê tenê bi pakêtek ciwan a şokolata ez çûm. Dema ez gehîştim wir 9 kesên ku hatibûn gazîkirin hebûn, xwarinên pirreng, şerabên cur bi cur amade kiribûn û pir zehmet kişandibûn. Yek ji wan kesan min pir baş dinasî, ew bi min re havkar bû; me demek berê, şeş salan bi hev re di rêkxirawekê de kar dikir. Navê wî Richar MecKen bû, ew bi xwe şair e û wergêrê zimanên Rûsî û Tirkî ye. Min ew bi Kek Memet Uzun jî dabû nasîn, ku kitêbên wî wergerîne zimanê înglîzî. Lê mixabin navên yên din nayên bira min (Min ji bîr kir, ku ez navên wan li ba xwe binivîsim). Tiştê girîng ew e, ku hemû yên li wir kesên baş bûn û pir alîkariya xwe nîşan dan; bi taybet Lucy Popescu, ku pir aktîv bû û tiştê me digot, ewê piştgirî dikir, û wê bi xwe jî peşniyarên pir baş hebûn.

 

Ew xanim dê roja duşemê (pitition) yanî ewê ji bo doza Kek Marwan Osman, berî mehkema wî ya roja 22e mehê dest bi îmzakomkirinê bike. Ew dê ji bo 350 nivîskaran bişine, lê hên li benda 100-150 kesan e, ku bersivê bidin. Piştî ku bersivan wergire, ewê wan ji raya giştî, saziyên mafê mirovan yên navneteweyî û yên li Sûriyê re jî bişîne, û hewil bide, ku ji parêzerê wî re jî bişîne; heke em heya wê hîngê bikaribin nav û nîşanên wî bigihînin wê. Min gotê, ezê hewil bidim peywendiyê bi hevalan re bikim û bersivê heya roja yekşemê jêre bişînim. Piştî mehkemê jî, eger hat û kekê Merwan Osman hate hukim kirin, ew dê îmzakomkirineke din bi şeweyekî berfirehtir dest pê bike û ji PENên din daxwaz bike; mîna yên Skandinavî û yên Amerikî, ku piştgiriyê lê bikin û mesele bidest bigirin. Piştî mehkemê jî ewê kitêb û kertan di rêya saziyên navneteweyî re ji Kek Marwan re bişînin zîndanê û daxwaza yek du kitêbên kurdî ji min kir. Ez jî ji we dixazim, ka gelo hûn kîjan kitêban peşniyar dikin, ku kek Merwan re bên şandin. Ewê her wisa jî têkiliyê derbarê vê mijarê bi Baliyozxana (sefareta) înglîzî ya li Şamê re jî deynin.

 

Wan daxwaza lêborinê xwast, ku heya niha awir li PENa me nedane û pê keyfxweş bûn, ku linkek me li vir heye û hez dikin têkiliya me berdewam be. Min jî ji aliyê xwe ve spasiya wan bi navê Navenda PENa Kurd kir û peşniyar kir, ku civîna bê li mala min be, ku xwarinên kurdî bixwin û ev jî bi wan gelek xweş hat.

 

Pêşniyareke hinde jî hat kirin, ku êvariyeke wêjeya kurdî li ser navê wan li London di meha 5 yan jî 6 an de bê lidarxistin û ewê ji min re paşan wext û mijaran diyar bikin.

 

Herwesa mesaja serxweşiyê ji kekê Şehîd Mehdî Xoşnaw ji min re nivîsîn û daxwaz kirin, ku piştî em werdigerînin kurdî û dixin malpera xwe, ewê jî tekst û wergerê bixin malpera xwe.

 

Mesaja wan bi Inglizi ev e:

 

(English PEN expresses its sincere condolences to the family of Mehdi Khoshnaw.

English PEN is appalled by this murderous act against a fellow writer and activist for freedom of speech.

Our thoughts are with the families and loved ones of all the victims of this outrage)

 

Ew mesaja PENa Inglîzî bû.

 

Ev hevdîtina me û her tishtê din bi dile min bû, tenê min dixwest,  ku hûn jî digel min bana; ew hemû nivîskarên mezin û aktîv bûn.  Lê civîn gelek baş derbas bû, dîsa her tisht li gor dilê me bû û armanca civînê bi cih hat.

 

Hûn jî bi xêr û ez bi silamet