Deriyê Adarê li ber bayê azadiyê vekin

Bêwar Ibrahîm

Deriyê adarê vekin

Bela... Pêxemberê doza Kurdayetiyê

Pêxemberê riya felat û azadiyê

Barzaniyê nemir

Bi refên mizgîniyên xêrê re derbas bibe;

Bela... ken û giriyê adarê

Ji ser peravên çemên

Dicle, Firat û Aras...

Ji nav pêlên derya

Wanê û Ormiye

Bicivîne...;

Insiklopidya avê û agir

Ji ketin û serketinan re bixwîne;

Dem û dîrokê

Li ser kevîyên pêvajoya mêraniyê

Bike al û li asmanê azadiyê li ba bike.

**********

Deriyê adarê vekin

Û rê bidin Mahabada ronahiyê

Silêmaniya hilmetê

Hewlêra Kele û Minare

Qamişloka vîndar û leheng

Ameda serfiraz...

Bela... Şîrê Kurdayetiyê

Li çiyayên Ararat, Cûdî,

Bagok, Sasûn, Metîn,

Şêrîn û Hindirîn... helal bikin,

Bela... xwîna şehîdên nemir

Xwêdana Pêşmergên qahreman

Xuya hilmet û berxwedanê...

Bikin melheme û derman,

Birînên ku di canê

Dilsozî û wefadariyê de vedibin

Bi vê xwîn û xwêdanê derman bikin û

Bi ala welatperweriyê bipêçin.

**********

Deriyê adarê vekin

Bela... Mîrgehên Botan, Badînan,

Soran, Baban û Erdelan...

Ji nav rûpelên dîroka rizyayî derkevin û

Di sînga şaneşînên mîrgehên xwe de bi cî bibin;

Bela... şal û şapên hêvî û omîdan

Li bejna xwe girêdin,

Xunava şîn û şadiyên her adaran

Li xaka xewn û xweziyên

Welatê perçebûyî bibarînin,

Peyalên meya mizgîniya

Yekîtiya Kurdan

Li yar û neyaran bigerînin;

Wê yar mest û serxweş bibin

Ji mil û navmilan xwe bihejînin,

Lê... neyar wê ji maskên dilreşiya xwe

Bibin bilyatşo li ser

Textên şanoyên vê jiyanê.

**********

Deriyê adarê vekin

Rê bidin lala û nêrgizên deşta Barzan

Ku bibin desmalkên sipî

Hêsir û rondikên çil melyon Kurd ziwa bikin;

Rê bidin siwarên azadiyê...

Bela... tîrêjên roja nîşana Komela Xoybûnê

Bi ronî bikin,

Xencera wê ji xwîna şoreşên nejbîriyê dawerivînin,

Periya wê bi dîwarên

Lover û Mitropolîtan ve daleqînin,

Sinbila wê di xaka hilmet û dilsoziyê de biçînin,

Bela... almeya sexte ji ser

Kezeba riya Padîşahên Kurdayetiyê daxînin,

Kum û kolozê Haco Axayê Hevêrkî û Ebdirehman Axa Elî Yûnis li ser Girê Dugirê bilind bikin

Û bê dûdilî / Derka Jêrîn / bingor bikin.

**********

Deriyê adarê vekin

Patlêdanên Efserên azadiyê

Li ber bayê ala rengîn

Bikin lavij û dûee,

Bikin sirûd û heyranok...

Bi ewrên silavên gerim re

Li asmanê vê dinyayê bibarînin...

Rê bidin Dildar û Mihemedê Mamilê

Ku peyv û tîpên sirûda netewa Kurd / Ey Reqîb /

Li ser destên xwe ji nû vejînin;

Erê... bi mizgîniya azadî û yekîtiyê re

Wê kefenê mirinê biçirînin,

Wê Merziya bi xwe re bînin

Li ber defa Hejar û Hawar

Wê çopî û semayan ji erd û asmanê

Her çar perçeyên Kurdistanê re bigerînin.

**********

Deriyê adarê vekin

Rê bidin Valintaynê dildarên Kurd Metran Isa

Bela... xwezîyên Edûla Temir Paşa, Keçka Simqî,

Meryema file û Gula Mehrûm...

Li Geliyê Laleşê li ber

Stûna bê miradan bi cî bîne;

Bela... mehra evîndarên bê hêvî

Li ser destên Ûcaxên Azadiyê bibire;

Çengekê ji xaka gora qublegeha Kurdan

Li ser serê wan bireşîne.

**********

deriyê adarê vekin

Bi hêrz destên xwe li ber

Yezdanê dilovan vekin

Ji olên erd û asmanî

Qewl û lavijan bixwînin

Bi dûeeyên Pêxemberan bangbikin...,

Hêvî û xweziyên kevin û nûjen,

Keser û kovanên bê ser û ber

Bi bayê azadiyê re berdin

Bi yek qêrînê hawar bikin:

Xwedê Kurdistana azad

Ji şerê terorê biparêze

Tu car û tu car wê bin dar neke

Xaka Wê ji Ucaxên Barzaniyan mehrûm neke

Miletê Kurd li cîhanê ji vê Azadî û wekheviyê bê par neke

Zimanê Kurdî bi yek Elifbayê standard bike

Ala rengîn li ser banên palyozxaneyên her welatî

Li vê dinyayê li ba bike... li ba bike.

Amîn... amîn... amîn...

Qamişlo

01/03/2006

çapkirin