anmeldung

PENa Kurd baskên azadiya dîl e

Ji rewşenbîrên di girtîgehan de

( Pîrozî ji Dr. Roya Tilooî re )

Bêwar Ibrahîm

Di meha rojiyê de ez devkê pênûsa xwe digirim û dispêrim bêrîkên bendewariya vegerê. Ez xwe ji xwe didizim û diçim nav ronahiya dinyayeke din; dinyayeke bê mask û derew, bê toz û mij, bê hawar û qêrîn, bê êş û nalîn ... Bi tenê ez derfetê didim çingîniya paqijî û tahirbûna giyanê mirovantiyê, ku di guhê min de wek zingilekî xêrê dike zinge zing ...

Belê, di vê rojîyê de min bê hemdî xwe destê xwe dirêjî pênûsê kir, devik ji ser serê wê hilanî û hêdî hêdî li ser pelên sipî tîp û peyvên ku di hinvê min de nivyayî bûn, şiyar kirin û ji bo çavên siwarên PENa Kurd bi bayê vê payiza Binxetê ya ziwa re belavkirin ...

Çima PENa Kurd û ne yekser Dr. Roya Tilooî..? Ji ber piştgiriya PENê, xebat û hewldanên wê ji bo azadkirina Dr. Roya Tilooî. Ew şaşikên sexte ji ser mejîyên şaş û vala daxistin û zilm û zora ku bi destên setemkaran li gelê Kurd tê kirin careke din diyar kirin û bi taybetî zora ku li nivîskar û rewşenbîran tê kirin..

Dr. Roya Tilooî, ji bo bîr û baweriyên xwe ji rex desthilatdarên Îranê ve hatibû girtin. Ji ber ku vê jina Kurd nexwest xwîna şehîdên Çarçira li ser pelên dîrokê ziwa bibe û dilopên hêsrên dayîka Kurdistanê Mîna Xanim Qadî bigindirin erdê ... Şala reş ji ser hest û mejiyê xwe avêt û doza mafê xwe bê tirs û saw li hemberî dêwên / Savakên nû / kir û rawestiya, qêrîn, felat û azadî ji sînga xwe berda, doza avêtina çarikên reş – ne ji ser por – lê ji ser hest, raman û wijdanên ku di qefesên sêngan de genî bûne kir ...

Lê sed mixabin ... Ev mejîyên ku xwe bi ebeyên reş rapêçane, derfeta bangewaza azadiyê ne dan wê û hevalên wê, ewên ku ji bo felat, azadî û peyva resen têne girtin û zîndankirin ...

Ji ezel ve wiha ye, di tengasiyan de dostê rast ji yê derewîn cuda dibe, di tengasiya Dr. Roya de PENa Kurd û endamên wê bi lehengî piştgêriya wê kirin û bi saya PENa Kurd dengê Dr. Roya Tilooî dîwarên zindanê qelaşt û li asmanê dinyayê belavbû.

Hilim û bîna welatan bi bayê qenciyê re dibare. Lê bayê Kurdistanê / her çar perçe / ne bi tenê hilma wê bi bayê qencîyê re dibare, lê bi gewreyeke ber fireh re, bi bayê mêranî, cegerdarî, comerdî û keremê re dibare û belav dibe ...

Jinên Kurd jî xwe ji vê cegerdariyê bê par nehiştin, her yekê ji hêla xwe ve li ber xwe da û da ser rêka pêvajoya avakirina bajar, gund û mirovan ...

Ji baweşkiya berbangê ta bi xilmaşiya ber êvarê, pirsên biçûk û gewre di mejîyê min de çêdibin û dimirin. Di welatên rojhilata navîn de, rola mêran ber bi mirinê ve dimeşe...! Vêca jin li kû dimîne ...

Di bin zora desthilatdarên wisa de, gelê Kurd kesayetiya xwe winda nekir û nasnameya xwe bi hemû hêzan parast. Îro dema jinên Kurd, ji bo bîr û baweriyên xwe, ji bo doza mafên xwe yên civakî û siyasî û rewşenbîrî, ji bo doza felat û azadiyê têne girtin û zindankirin. Bê guman, cihê serketina kesayetiya gelê Kurd e, ku di nav gelên dinyayê de xwedî nêrînên dûrdîtî û asoyên berfireh tê naskirin; dema nivîskar û rewşenbîr / li her çar aliyên dinyayê / basa qonaxa zîndankirina xwe dikin, laşê mirovan ji tevzînok û lerizandinê têne xwarê, bê guman zindan ji mêran re çetîn û dijwar e, vêca ji jinan re wê çawa be?!

helbet ew her rojekê di zindanê de derbas dikin sed carî ji wan re mirin e.

Gelê Kurd berê xwe daye serhildanên nû. Bê xwîn û kuştin, bê barkirin û revendin...berê xwe dane serhildanên pêşketin, zanîn û avakirinê... Jin û mêr li kêleka hev kar û xebatê dikin. Daxwazên tiştên ku doh bi darê zorê nestandine, îro hêdî...hêdî qezenc bikin, mîna dilopên avê di gel nermiya xwe, lê hişkiya keviran diqelêşe. Ji pêngavên wisa serhildanên gelê Kurd yên nû dest pê dike û di gelek qonaxan de digihîne serencamên gewre û balkêş.

Avakirina PENa Kurd pêngavek e ji pêngavên van serhildanên nû. Piştî ku serokê PENa Kurd Dr.Zerdeşt Haco bi alîkariya resentirîn rewşenbîr û nivîskarên Kurd li dervî welat, PENa Kurd ji merxinandin û xilmaşiyê derxistin û dest bi alîkariya rewşenbîr û nivîskarên li welêt kirin, yek ji armancên wan ku PEN bibe maleke azad û serbest ji nivîskar û rewşenbîrên Kurd re. Ji bo em bi hev re rast û zelal bin. Mixabin! Ne carekê lê milyon carî mixabin..! ku gelek alî û kes bi germî şerê PENa Kurd dikin û dixwazin bi çi şêweyî be keleha wê ji kok ve biherifînin, wek dilşewateke zimanê Kurdî ez dibêjim :

- Bela ev cih û kes xwe bi agirê zikreşiyê neşewitînin, agirê ezeziya wan têra xwe wan disotîne, ku keziyên du agiran bigihin hev nema vedimire û agirê ezezî û zikreşiyê ne wek tu agirî ye, kesekî nasotîne; ji bilî xwediyê xwe pêve .

Bela, bi kurmanciya şêwirdarên aqilmend û kalên zemanan pêşinyar û rexneyên xwe bêjin û binivîsînin, ne bi Kurmanciya Kor û bê mejî.. Ji her dem û gavan îro em bêhtir, hewcedarî hev û piştgêriyê ne, Em hewcedarî alîkariyê ne, ku em pişta hev bigirin, ne em çengelan bavêjin gwîzekên lingên hev ...!

Bi hêza helwêstên wêrek û bangawazên bilind, celebên çê ji yên xerab diyar dibin ... Raste kesê xwe nas bike tu carî di nav kesan de winda nabe, lê ez matmayî dimînim ji desthilatdarên setemkar û kesên xerab, ku rojê bi dehên caran royê xwe dişon û nikarin salê carekê dilê xwe bişon ...?!! Ji berê de bav û bapîrên me gotine :( yê bêje û bike mêr e, yê ne bêje û bike şêr e, yê bêje û neke ... ) Ta vir li min biborin ez metelokê nagihînim serî ?! PENa Kurd di helwest û bizavên xwe de şêr e, nabêje û dike.

Em gelê Kurdên Rojava- Binxetê, azadkirina Dr. Roya Tilooî pîroz dikin û pêre jî karmend û endamên PENa Kurd pîroz dikin û di serê wan de Dr.Zerdeşt Haco serokê PENa Kurd, cîgirê serok Mustefa Reşîd û sekertêrê PEN ê Dr. Zorab Aloyan li ser kar, xebat û bizava wan a rêxstinî ji bo parastina ziman û edebiyata Kurdî, li hêviya ku gelê Kurd li seranserî Kurdistanê ji zilm û setema dewletên zordar û bê wijdan serbest û azad bibe.

Bêwar Ibrahîm

Nûnera PENa Kurd li Rojava

Qamişlo 15/10/2005

çapkirin