Raperîneke ji Tîşkên Rojê

Li şûna golên xwînê , emê darên Berûyan biçînin

Li şûna termên şehîdan , emê gund û bajaran ava bikin

Li şûna her hawar û qêrînekê , emê xwendin û zanînê , bi ronak bikin … 

Bêwar Brahîm

Îro li Qamişlo haware ,

Wê Pêwanên Bayê ,

Li zingilên nêvroja xwînlî bidin ,

Hawarnameyên bê Efser û Leşker …

Di navbera mirin û dewrebariyê de , bilind bibin ,

Dehlên Berûyan , li nav pêlên agir ,

Wê bi deyax  , rewa û geş bibin

Hêsir û rondikên 40 milyon Kurd ,

Li ser pirên westayî

Bi ronaka xwîna Qamişlo re biçirisin ,

***** 

Îro li Qamişlo haware ,

Xwîna birînên reş ,

Bi barana Gulleyên bê soz û  mehder re … difûre ,

Bi dilêriya dilê Raperînekê , ji tîşkên rojê , dike hawar ,

Rûbarên hêsran , li ber mûmên yadî û nejbîriyan …

Dibin perçe-ewrên sipî ,

Gol û gelîyên xwînê ,

Bi mêrxasiya  şar û şirûsta daxwazên mirovahiyê re ….

Dibin wirz û zeviyên Omîd û hêvîyan ,

Lewendiyên Dayikên Şehîdan û tarayên Bûkên serbixêlî ,

Dibin kevokên sipî  û li ser milên demê xwe datîtinin .

***** 

Îro li Qamişlo haware ,

Wê Adar ji Adarê re bibêje :

Welatê rojê , di dilê xwe de veşêre ,

Eger dilê Te çirandin ,

Di kezeba milet de biparêze ,

Eger kezeba wan sotandin ,

Doza azadiyê …

Di dengê Giyanê wan de tomar bike ,

Wê mendehoşî , li ber şoreşên dewrebar radest bibe ,

Erd û asman zane , ku ew Qurbaniyên xwe

Dikin pir , di navbera Mij û Dûmanê de ,

Lê Em Qurabniyên riya aramî û felatê ,

Di dilê roja sermed de , dikin sembol .

*****

Îro li Qamişlo haware ,

Kêlên li ber Gorên Dîrokê

Bê nav mane ,

Zaroyên Rojê ji arê birçîbûnê …,

Nêrgizên firotinê bi nanê şewitî re duxun …

Ta bûn Zeviyên bê ber û boran ..

Li ser peravên mirinê ,

Lê mêrxasî di can û cergên wan de ,

Dibin ronak , ji Tîşkên Rojê re ,

Dibin pola , ji piştgêriya Dozê re ,

Ji nav xaka bênderên Interriyê

Ta bi serê kaşê Hilêliyê …

Wê dergehê Qamişlo ,

Ji her çar aliyan ,

Li ber  Hîsî , Horî û Mîtanîyên hemdem vekirî be ,

Wê Dîrok , Zendên xortên Rojava ,

Bi Berbangên rohilat re ,

 ji bajarên dilêrî û cangoriyê re bike sitûn ,

Wê Bahoz , hovitiya şevên tarî ..

Bi xwîna kulîlkên Adara xwînlî tahir bike ,

Ala mirovahiyê bi bayê Felatê re li ba bike .

*****

Îro li Qamişlo haware ,

Nexşeyê xewnan , di gerdena Çiyayan de ,

Dibin welat ,

Û welat , di hembêza azadiyê de ,

Dibe Ayet , Qewl û Lavij …

Îro wê Amed , Hewlêr û Mahabad ,

Tariya şevên xwe , bi qêrînên yadiya Qamişlo ronî bikin

Îro emê biskên porê Şehîdan bi tiliyên demê şeh bikin …   

Îro wê hawarnameyên Şêr û Lehengên serfiraz ,

Ji ser peravê çemê Dicle ,

Ta bi ser kupê çiyayê Qasiyûn ,

Efsana dilêriya Şehîdên Qamişlo

Ji erd û asman re bixwînin ,

Kurdistan bi giyanê xwe yek perçe ye ,

nabe Goristan … nabe Goristan .

 12 / 03 / 2007

çapkirin