Cejin şabê

Bihrî Bênij

Beyanî  baş beyana min

Cejin  şabê Liyana  min

Mi kir ferza biyana min

Ji  bo can  û giyana min

Siha  Selma Nîşan a min

Dura sebr û hewana min

Bedew gênc û ciwana min

Bivim nevim viyana min

Meded han û fîxana min

Li ber deryê girana  min

Ne kir doza ziyana   min

Meded Mad û kiyana min

Li ber cama peresta min

Ji amîr û    keresta   min

Di xwest bighin mebesta min

Ji kor û saz-dirana min

Li ser kindalê cem hewşê

Dilê  xifşê  me  kir cewşê

Divim  karê  were  rewşê

Şikest  tîr û   kevana min

Dilê  nazik  wekû  nêçîr

Nezanan kirne   çîr û zîr

Xetîrim  ez perîhtim, jîr

Kirin cîn û kemenda min

Kirin kavil bi dest û ling

Kirin hamon bihara sîng

Zelût hiştin bi çinge ring

Birîn   bihna rihana min

Belê  peşkin xunava te

Weşandin ser hinava te

Ji nû  derbû  bi  ava te

Gulîstana    jiyana  min

Tu lê  ba key û   xana min

Tu têr nedba ji dana min

Berê  Bihrî  li  cana   min

Tika hildan xwedana min

Xweda rawestî jana min

Bi destê Leyle xana min

Mufa derd û kovana min

Bijîşkê  bê   civana   min

Qamişlo…16/3/2000

çapkirin