Dilberek û dildarê xwe

Li dehlekê ro bû êvar

ji berxevê dihatim xwar

Binefşî bûn aso diyar

av û kulîlk şikêr û dar

Yekayka sitêr hilîn

heyvronkê avête zemîn

Barî sira bakî pir hîn

ji ser dêmê co û rûbar

Min xwe gihand lateke reş

hate sîngê bihnê pir xweş

Hilkişîme ser latê xweş

min çav gerand kinar kinar

Tivinga xwe min danî ser

rext û koloz anîne ber

Qolan vekir sist kir kemer

nig çaroxde nekir hedar

Ez rûniştim ser tûrê xwe

ji bê dengî bi guhê xwe

Bihîst qurqura ûrê xwe

şev hêwî bû danî damar

Ez pûjinîm li( kê mewkê)

ji dûr nalîn û lewlewkê

Serê min hilda rewrewkê

toz û dûman sor bûn ji ar

Dengkî zîz ji nişkê ve

ber min lêvan dipşkêve

Dilbera min hat ji wê ve

li min dikir qîr û hewar

Biskên zêrîn vîvirîbûn

ronyê dêman vemirî bûn

Çavên heşîn şewq mirî bûn

kir wê payiz li min bihar

Di rikrikî pir lerizî

dil ji sîngê di penkizî

Lata bin minde derizî

min xwe zer kir çûmê bi xar

Hat hembêza min bi girî

danî ser milê min serî

Hêsir pey hêsirê xurî

şal û şapik şil bûn bi car

Min hejandin çembilê wê

da bighêjim ser kulê wê

Bû fişfişa bêvilê wê

li min nerî em mane xar

Go:(dildaro bi ah û ax

dîrokê girt arî û ax

Arzan kir îro dem û çax

balê Kudistanke dîdar

Qirdikin refê kevokan

qut dikin sêv û bihokan

Ji tirsa jin û zarokan

mirin dan wan li gund û şar

Dê û şîrmij pevre kuştin

sîng di devde mijtî hiştin

Çekên jehrê em maliştin

wa di qelin Kurdê hejar

Dest dixin gerden û devan

êrîş dikin roj û şevan

Dinoşin xwîna me tevan

pir kuştin kesên birîndar

Dane ber xwe mal û sewal

anîn qira teyr û tewal

Laşan dagirt çal û newal

hiştin kelaş hesp û dewar

Agir berdidin daristan

kirne wêrana dibistan

Perçiqandin bax gulîstan

van zorbazê tev gunih kar

Bi tang û top û hem firok

divin Kurdan rakin ji kok

Laşê Kurdistan kirne cok

pencên lepên van seyên har

Kurd mişextin ser sînoran

ser riya dikolin goran

Di bwêrin sitem û zoran

nîne ji wan re arîkar

Mafê mirov tê çirandin

li Kurdistan tê dirandin

Deste vala tên gurandin

cana didin şipê ne çar

Paşverû zare zar dikê

gazî jar û bê zar dikê

Dosta pê wek neyar dikê

ketin rêzê hin tengezar).

(dilbera min bêje Kurdan

li van çiyan li van erdan

Hiltînim van kul û derdan

lewma mame ez tim şiyar

Bihişta neyaran nevin

dost û dijmin ne wek hev in

Dijmin erd û arzû divin

na bin heval mirov û mar

Ezê bi vê tivinga xwe

vedim keser ahenga xwe

Ezê rakim ser linga xwe

vedim kehnî sax kim bajar

Ezê ava kim kavilan

sar kim evê kîna dilan

Mişt kim sera çem û qulan

ji xwîna pîsê koledar

Ezê rakim serê gulan

şînahiyê bînim pelan

Dim zaroka nan û cilan

bi ghînim hevdû evîndar

Ezê hildim ala aştî 

pevvekim rêkên qelaştî

Bijî biratî û dostî

têde Kurdistanek li dar

Ezê şkinim zer biskên te

ziwa bikim firmêskên te

Hew bihêlim tapiskên te

dest bavê çelem û guhar

Ezê vejînim wî kenî

dil darvekim bi gerdenî

Geşkim wan çavên çîmenî

sûnda min bi Laleş û ar

Emê hêrin zendîlokan

çûk ê deynin hêlînokan

Emê pevre din dîlokan

li ser şaxa li ser zinar

Emê pevre herin sema

werz ê bigrin pin û lema

Here canê tiştek ne ma

va li pey te em têne war).