Ez mişext´im

Bihrî Bênij

Ji deviya´me ji best´im

Ji keviya´me ji hest´im

Ji (Bihrî)-yan radiwestim

Derya Wanê bi mebest´im

                ***

Erê dayê ez mişext´im

Jiyantal´im korebext´im

Şûşa dilê te li rext´im

Hûrik hûrik ez şikestim

               ***

Ji nav geliyên sîngên te

Ku vîvirand ber cengên te

Ji  hinavên zivingên te

Pekîm, agir ez vegestim

                ***

Şivek´im ez ji dara te

Ji nav lingên neyara te

Min şîn  kiribû bihara te

Li çol û hol ez diwestim

               ***

Lepên hirç û gurên Qeyser

Welat yexma kirin wey ser…!

Rijandin xwîn û dan mey ser

Bi biyanê ve vebestim

               ***

Bi zor şûna neperûşkan 

Bû sînor bi kelemûşkan

Em dem û dewr bi dergûşkan

Winda bê zar û bê kes(t)´im

               ***

Libek guhîjên bihiştê   

Ji çiya gindirîm deştê

Lê bayê kur hêwî xweş tê  

Lewma ez sax û bi hest´im

               ***

Pêsîra te bi firih bû   

Lê tev zindan û rekih bû

Bi bombe û bi dirih bû 

Bihrî li ser bi hewes(t)´im

              ***

Ey (Wana) min, (Bilîsava)

Ezê werim ser perava

Hêvî hêvî dikim ava

Ji bo sira te sermest´im

               ***

Ezê li mêrg û ber çeman

Li zozana berdim xeman

Nû dê bêjim min kul neman  

Li pesarên te serbest´im

                *** 

Ew şaxê dûr ji Izdînan 

Hilgirê gul û hêlînan

Lêv bighin hev li birînan 

Xwezî  bi rist  û helbest´im…!

…Xwezî bi rist û helbest´im…!

    Qamişlo…5/11/1988

çapkirin