Mizgîn li gel mizgîn li gel

ez çûme cengê çûme şer

Xemlî me ez pê rext û ber

şal û tiving, şap û kemer

Pêsîr çiyê bo min vekir

çem şirşirîn şîr û şekir

sîngan evînî ser ve kir

daran weşandin mêw û ber

Ez bûme bahoz babelîs

dijmin belabûn hîz û pîs

ber min ne wêrin herne lîs

ew hilfirandin renge per

Her bexçika yarê werê

bihna bihara dilberê

Rengîne wek qozûqerê

pêr tên silavên germe her

Çend nan di tûr de sar û hişk

çend lib mewîj dighê mi pişk

Ez jîn dibim cem dê û xuşk

pola bi min bû nerm û ter

Ronak, çira, pêtî, fener

min da hişê xort, û ceger

Min keç gihandin her dever

cergên neyaran dikne der

Kal û minalan sax dikim

dara jiyanê şax dikim

paşlên ziwa şînbax dikim

çîmen jiyanek nû li ser

Ûrên ji nêza piçpiçî

çavên bi hêsir kelpiçî

Rûkên bi cok û qermiçî

jîn hate wan geş û bi ger

Destên bi terk û lê qirêj

nojên qemûş girtî ji mêj

Lingên bi celxên kûr dirêj

şahîk dibin wek mûm û zer

Min dane hev murx û tilûr

bilbil, kevok saz û bilûr

Hîn bûn sirûda Ey reqîb

dil bûn bi bask û çeng û per

Wa lev civîn perwan û gul

lev zîvirîn şahî li dil

Pêrgî vehatin dest û mil

dil lanc û lar mestî li ser

Piştî ziwabûn lêv û dev

germ û feraşîn dane hev

Marê xwe kuştin roj û şev

gerdûn hemû xeml û zîwer

Lê min ne bû êdî veger

dilber şiyandin pir nûner

Lê ez ketim gorî li şer

bin ala kesk û sor û zer