
Bo çi dîsa Turk har bûne?

Cankurd

11.10.2007








Du rojan berî destpêkirina gengeşeya li ser qirkirina Ermeniyan di parlamenta amerîkî (*) de, hêrişa ser leşkerê turkî di nav herêma Şirnexê de, li ser zevînê ku bi terzekî fermî jê re „Turkiye!“ (**) tê gotin, çêdibe, û panzdeh kes ji leşkerê têne kuştin, û berî wê yekê li rojavayê Turkiyê, li bajêrê Izmirê jî bombeyek li bazarê diteqe… Bêguman kê ev reşkarî kiribe, me xwest an nexwest, ava xwe di coya leşkeriya turkî re berdaye. Ez bi xwe bawer nakim, ku Kurdekî rast bo kêşeya gelê xwe dixebite, di vê demê de, karekî wilo bike, ji ber ku ev hîç nakeve berdestiya kêşeya gelê Kurd. Hemî şêweyên têkoşînê di ber neteweyek binzorkirî de dadmend in, lê Kurd wek neteweyek serbilind û enîhilmiştî hîç terzê livbaziyên têrorî napejirînin û nakin, û lew re bombeteqandin di bazaran de ne karê me Kurdan e…

Tevî ku hêrişên turkî yên leşkerî roj bi roj li bakurê Kurdistanê digudin, lê îro şerkirina bi tivingê, tevî ku mafê me ye jî wek neteweyek binzorkirî, yekser dikeve berdestiya leşkeriya turkî û ji ber wê yekê pêwîst e em çekên ramiyarî nedine destê van hovên şeryarên ku dixwazin gelê me biperçiqînin… Heger PKK li Şirnexê hêriş kiriye an nekiriye, ev hêriş ji Turkan re bûye behaneyek dî bo avêtina ser başûrê Kurdistanê… Berê jî hinek livbaziyên çekdar bûne eger û behaneya aloziyin pir mezin…Hûn dûroka me ya nûjen baştir dizanin.

Em bêne ser harbûna dewletê…
Ev tûjkirina diranan, ji aliyê leşkeriya turkî ve, di van rojan de, ji ber hinde egeran e:

Yek- Turk dixwazin zorê bînin ser fermandariya ramiyarî ya amerîkî, da ku li Amerîka qirkirina Ermeniyan bi terzekî fermî neyê pejirandin û binavkirin. Va zorkirina turkî, ku nema rê li leşkerê xwe bo avêtina ser başûrê Kurdistanê digirin, piçekî hikariya xwe kiriye, ji ber ku hem wezîra derve ya Amerîka Condoleeza Rice û hem jî serok George W. Bush anîn zimên, ku binavkirin û pejirandina qirkirina Ermeniyan wê ziyanekê bigihîne têkiliyên Amerîka bi Turkiyê re, eve jî ji bizavên wan re li Iraq û li Afganistanê nebaş e.
Jinek Ermenî bi ser zarokê xwe yê ji nêza re miriye digirî

Du- Turk dixwazin zorê bo egerek dî jî bînin ser Amerîka, ew jî bi mebeseta rawestandina pilana parvekirina Iraqê ye, ku bi pilana „The New Iraqi Union“ (NIU) tê nasîn, û li gor nexşeyek nûjen ev welat tête parvekirin, di navbera Kurd, Sunnî û Şîe’yan da. Ev pilan jî di Kongrêsa amerîkî da hate gengeşekirin û weku pêşniyazî ji Iraqiyan re hate pêşkêşkirin. Serekê Kurdan, hêja Masûd Barzanî erê kir, lê mixabin wezîrê derveyê Iraqê, hêja Hoşyar Zîbarî, ku endamê serokatiya partiya kak Masûd Barzanî ye, nerazîbûna xwe li hember vê pilanê anî zimên. Mam Celal talbanî ku serokê Iraqê ye, daye xuyakirin ku ev pilan piştvaniye ji mijara Federaliyê re, ku di destûra dewletê da bi cîh bûye…
Pilana parvekirina Iraqê xaziyê bi devê Turkan dixîne

Sê- Turkên nijadperest, û mixabin evana jî di civata turkî da pir in , wek hercar û herdem, dixwazin rê li wan mirov û komikan bigirin, ewên ku dixwazin dewleta de facto ya li ser zevînê başûrê Kurdistanê ji sala 1991ê da pêda bûye, bipejirînin…Niha jî ev dewleta de facto hem bi hêz bûye û hem jî di cîhanê da mîna kiyanekî demokrat û azadîhez hatiye naskirin…Ta niha hinek welatên giring nûnergehên xwe jî li paytextê başûrê Kurdistanê vekirine û têkiliyên xwe yên fermî jî bi deselatdariya kurdistanî re li dar dixin, yek ji wan welatan jî Iran e…
Ala kurdistanê û berhevhatina Kurdan Turkan har dike
Di vê lîskê da, yekîtiya hêzên kurdistanî, û di serî da ya Partî Demokratî Kurdistan û Yekîtî Niştimanî Kurdistan, sirek gelek giring dilîze, berhevhatina PKKû van herdu hêzan, pêwîste xortir û baştir bibe, lê di vir da pir giring e ku PKK du astengan ji pêş xwe rake:

YEK- Divê ew navê xwe ji lîsteya „Saziyên Têrorî“ ya welatên rojavayî rake. Mixabin navê PKK û navên saziyên ku ji wê pêda bûne di wê lîstê de hene. Ev ziyanek mezin digihîne wê û digihîne teviya neteweya Kurd. Di vî warî da têkiliyên birayetî bi hêzên teviya Kurdistanê re, û bi taybet di bakurê Kurdistanê da, dikarin sirek mezin bilîzin, û ya dî ewe ku PKK hevsaziyek xortir di navbera ramiyariya xwe ya derveyî û ya hêzên başûrê Kurdistanê da avabike…bizava xwe bike bo dostaniyek firehtir li welatên rojava …

Du- Şerê çekdarî ne her demekê baş e, em giş dizanin ku şerê şekdarî li Kuba bo CHE Goevara serkeftin anî, lê belê li Bolîviya bo wî têkçûn û mirin anî. Di nav van reqpeqên Turkan û pevçûnên wan da, bi Amerîka û Ewrûpa re, dest bi şerkirinê bo Kurdan ziyanek ramiyarî tîne, lê naye wê wateyê ku Kurd çekên xwe deynin…Mebesta min ne eve.

Li dawiyê dimîne xalek giring, ew jî hebûna hêzên PKK di çiyayên Qendîl da, ku PKK her û her dibêje: „Evana çiyayên Kurdistanê ne, û em li welatê xwe ne, bila Turk ji vir herin…“ Birano, raste… raste…, lê ne wilo ye…Heger PKK bi hêz e, weku em her roj dibihîsin, bo çi behaneyekê dide dest dewleta Turkan? De bila hêzên xwe tevan di bakur da, û bi taybet di rojavayê Turkiyê da bi cîh bike…Wê bo PKK û bo teviya gelê Kurdistanê baştir be, ku PKK ji başûrê Kurdistanê derkeve. Hemî hêzên neteweya Kurd jî di vê bîrûbaweriyê da ne…Li ba me Kurmancan dibêjin: „Gava çar – pênc kesan bo te gotin: Kumê te ne li seriyê te ye, carekê destê xwe bavêje seriyê xwe, dibe ku gotina wan rast be…“

Di va dema giring û buve da, yekbiryara neteweya Kurd pêwîst e, divê li hember van tang û topan, li hember şeryariya Turkan, hevkariya me û biratiya me mestir be ji her tiştekî dî, û ez bi hîvî me ku di nav pêşeng û rêberên vê neteweyê da jî mirov hene ku bi roj û şev ji bo vê biratiyê bi hemî hêza xwe dixebitin…
Beza di ber sînorê re, ewtîna segê tirsok e

___________________________________________________________________
(*) Amerîkî rastir e ji Emerîkî, ji ber ku navê welêt li hemî cîhanê Amerîka ye, ne Emerîka, û kurtenav jî di teviya lîsteyên fermî û bazarî da USA ye, li ba me Kurdan hinek dinivîsin ABD, eve jî texlîda Turkan dikin…
(**) Divê em Kurd hîç navê Turkiye bi kar neînin, ji ber ku peyva Turkiye di rastiyê da ne rast e. Mebesta Turkan ewe, ku ev welat bi tevayî weku di nexşeyan da belav dikin, yê wan e, eve jî derewek mezin e.

çapkirin