Gelo di derbaré TRT'6 de civat çi difikire?

Cankurd

Bersiva vê pirsê deriyê gengeshiyeke mezin li ber me vedike, hema pêwîste em li ser mijarê rawestin û ya di dilê xwe de bînin zimên, lora ku ev mijar niha bûye "tishtekî nû"...
Berî her peyvekê gelek wêrane, ku em rê li ber azadiya peyv û nêrîn û li ber bangeshiya "Medya" ya nûjen bigirin, em çi bend û dam û dîwaran pêda bikin, wê di va sedsala 21ê de biherifin...Ya dî ewe, ku berî niha dewleta Iraqê bêtir ji pêncî salî ye, bi "Kurdî" radiyoyek avakiribû û di wê demê de jî gelê Kurd qir dikir, bi ser ve jî hinek pirtûk bi Kurdî belav dikirin û hinek kovarên xort jî hebûn, wekî "Beyan", ku piraniya hejmarên wê bi wêneyên Seddam Husên dihatine xemilandin. Di wan kovaran de hinek nivîskarên Kurd ên ne "Xayîn" jî dinivîsandin, gava me lome ji wan dikirin, wan bersiv dida:"Gelo, ji xwe kovarên me gelek hindikin,de bila em di vê de jî binivîsin, tishtek nabe..."
Li Iranê jî pir ji zû ve radiyoyekî Kurdî hebû, û pash "Shorisha Islamî" di sala 1980ê de, bêtir pirtûk û kovar bi Kurdî derketin, û ji wan jî hinek kovarên xort. Gelek dastanên helbestvanên Kurd ên kevnare jî hatin weshandin...Li dawiyê hinek bernameyên televisyonî jî di kanala "SEHER" de bi Kurdî hatin amadekirin û weshandin...
Gelê Kurd hem li Iraqê û hem li Iranê wilo bi firehî, wekî niha li ser "TRT 6" tê gotin û gengeshekirin, nepeyivî û xwe hosan nekir...Ji xwe herdu dewletên Iran û Iraqê, tevî ku bi tundî hêrish ser gelê me dikirin û Iran hîn jî hêrish dike, hema hebûna gelê Kurd, zimanê Kurd û çandeya Kurd, bincil nedikirin. Li Iranê herêmeke bi navê xwe yê fermî heye, ku jê re "Kurdistan" dibêjin, û em tev dizanin, ku firokek Iranî berî niha bi hinde salan destûra dahatinê li firokgeheke Türkiye nestand, ji ber ku navê wê "Kurdistan" bû...
Lê tishtê seyr ewe, ku dewleta Turk tew hebûna neteweyekê, ku bi navê "Kurd" e napejirîne, zimanê Kurdî napejirîne, û hinde tîpên, ku zimanê Kurdî pê tê nivîsandin jî napejirîne, wekî "W" û "X"...û niha dest bi "TRT 6" dike..!!! Ev "TRT 6" wê bi zimanê wê neteweyê be, ku li ba nijadperestên Turk tew nîne...Ev çewa dibe?
Ez dibînim, ku dunya hatiye guhartin, û bêguman hinek hishmendên Turkan jî hene, ku van guhartinan dibînin û dinasin. Ma wê çi mifa hebe, ku yek herdem tunebûna neteweya Kurd bo zarowên xwe bibêje, û sînorên Türkiye dikevine ber welatekî ku bi navê "Kurdistan a bashûr" di cîhanê de têye avakirin û bi hezaran fîrmên Turkan di wir de, di bin alaya Kurdî de kardikin, û her subeyekê sirûda neteweyî ya Kurdî "Ey Reqîb" dibihîsin, û mohr û sheqleyên fermandariya Kurdî li kaxedên wan dikevin, gava ewana karekî digirin an xebatekê li wir dikin? çi mifaye, ku zimanê Kurdî bite qedexekirin û (15) an (16) kanalên TV bi roj û bi shev bi Kurdî diweshînin hene?
Turk û Türkiye binzor dibin, ku van rastiyan binasin û hebûna gelê Kurd, zimanê Kurd û çanda Kurd bipejirînin....Vekirina "TRT 6" gaveke di vê rêyê de, xwestine an nexwestine...Ewana deriyekî li xwe vedikin, ku nema dikarin bigirin...

Bo çi hinek xûngermên bi ser "Biratiya Turk û Kurd" de her roj hêsiran dirijînin evqas dixeyidin?

Bê guman ewana hîç naxwazin kesek bi Kurdî bipeyive, ji ber ku Kurdî zimanê wan e, nabe Turk an Ereb an Roman an Uris bi wî zimanî bipeyivin...!!!
Ma wilo dibe?...
Pita min mirî jî di gora xwe de dizane, ku ev kanal wê di berdestiya dewleta Turkî de be, lê pirs ewe:"Ma ne hûn jî sibê ta bi êvarê wê dewletê wekî dewleta xwe dinasin, dipejirînin û sabona we bi ser avakarê wê de kefdide?"
Em tev dizanin, ku gelek bernameyên ROJ-TV bi Turkî û Erebî hene, di wan de jî pir caran li wê têlê tê xistin, ku pashmêrê di pash wê kanalê de nevîna wan kesan dikin, ewên bo "dewleteke kurdî" dipeyivin, dixebitin an digazin...Evana li gorî siyaseta fermî ya pashmêrên di pash perdeyên ROJ TV de "nijadperest û regezperestin" û neyarên "biratiya Turk û Kurd in" an jî neyarê rêberê cîhanî yê mezin "ATATURK" in...
Qey hinek ji me Kurdan ditirsin, ku "TRT 6" daxwaza dewleteke kurdî ya serbixwe bike???

Li gel silavan, Azadbit Kurdistan
Cankurd