Kî dikare rexneya tevgera bê şaşî bike?

 Cankurd

„Bila kesek devê xwe veneke, bila kesek tiştekî nebaş li ser tevgera me ya neteweyî li Rojavayê Kurdistanê nebêje, tevger di xêra Xwedê de ye, karê xwe bi hostayî û zanayî dike, roj bi roj mestir, firehtir, pêşdatir û destkeftîtir dibe…Kî zimanê xwe li ser tevgera me ya bê wekanî di têkoşîn û xebat û kefteleftê de dirêj bike, em ê wî zimanî bibirrin, ew zimanê dilreşan, xayînan û xêrnexazan e…!!!“

Di dilê hinekan de, di mejiyê hinekên dî de, û bi devê hinekên dîtir de, ev terzê ramanan her û her berê hebûye, niha jî heye û wê di rojên pêş me de jî her hebe, lê ya rast ewe, ku rastînî û jîna rastîn ne wilo ne…Hema kî diwêre devê xwe veke?...

Ev şanowa dawîn, a ku di eywana “Hevpeyman a Demokrat a Kurdî” bi derxistin û lîstina rêberên vê (Tehaluf), bi şêweyekî kirêt û rûreşiyek pir bi dengîn aşkere bûye, ji gelê me re, li her derekê, dide xuyakirin, ku rewşa tevgera me ya neteweyî li Rojavayê Kurdistanê rewşek ne hêja ye, ya nexweşekê ye, ku bi Xerçengê „Seretanê“ ketiye, û wê xerçengê hinavêd wê nexweşê jî pertilandiye, jê xûn dizîtin, û ber bi têkçûnê ve dibe, bê livbaziyek „operationek“ hostayî nema ew carek dî bi ser xwe tê…

Mezinên partiyan, ku pêwîste ji gelê xwe re bibin nimûne û mînak, di civînên xwe yên payebilind de, wekî zarokan bi hev re dipeyivin. Hevdu erzan û kêmbuha dikin…Ev berê jî wilo bû…Baş tê bîra min, ku paş avakirina „Qiyada Mueqqet“, du hêjayên komîtiya navnedî, rehmetî Derwêş Mele Suleyman (Bavê Cengê) û Sadiq Necar, sala 1970ê hatin mala me, li Helebê, û ji min xwastin, ku ez odeyekê ji malê bo civîna komîtiya navnedî ya Qiyada Mueqqet amade bikim. Tevî ku bavê min hîn baş nizanî bû, ta çi pileyê têkiliya min bi partiyê re heye, dîsa jî min ji wan re erê kir. Berî wê yekê bi 3 mehan min taze bûka xwe anî bû, û ez hîn di ser bav û dayika xwe de rûnişti bûm. Bi êvarê re „heval„ hatin, di serî de Bavê Cengê û hêja Dehamê  Mîro, ku ji me re êdî wekî bavekî rûhanî dihat dîtin. Pişt re yên dî jî yek û yek hatin. Hinek ji wan hene, xebata xwe hîn dikin, hinek li malên xwe rûniştine û hinekan ji nav me koçkirine…Ta ber destê sibê hêlehêla wan bilind bû. Her bawer bikin, ku em li qatê erdê bûn, lê li qatê pêncê jî mera dikarî qîreqîra wan bibihîsta. Tew te ne dizanî, ew civîn aşkere ye an bi dizî ye. Paş demekê ji wa hêlehêla bêrawestan, bavê min ji min pirsiya:„Kurê min, ma rast evana siyasetmend in? Li derveyî malê jî tu dikarî her gotinek wan bibihîsî, ma siyaset wilo dibe?“

Min rast fedî kir, ku ez bêjim: Erê, wilo ye. Min gote bavê xwe:“ Pir kêşeyên giring hene, lew re ewana bi hev de wilo diqîrin.“

Ji xwe roja dî, berpirsê min ê partiyê hate mala me, û hîn ew di mala me de bû, îstîxbarata sûrî avêt ser malê, ez reviyam, lê  belê wî rê nedît. Paş du rojan, partiyê ji min xwast, ku ez xwe bidim destê îstîxbaratê, ji ber ku bavê min hatibû girtin û gelek zor li wî kiri bûn, ew êşandi bûn, li ser wa civîna bi rûbet di mala me de pirsiya bû…û komîtiya navendî dixwast bizane, ka helwêsta deselatê li ser komîtiya nû hatiye damezirandin çiye. Min jî biryara „hevalan“ bi cîh anî.

Iro jî hêlehêla serokan û sekretêran bilind e, lê vê carê li teviya cîhanê belav e, ne tenê di avahiyekê an di malekê de, bi rêya Internetê, belavokên wan û gotinên wan di odeyên paltalkê de, li her derekê têne bihîstin û xwendin.

Çi heye? Wî wilo gotiye û wî tersî wî gotiye, ev peyayê vî serokê derveyî Rojavayê Kurdistanê ye û ew peyayê yê dî ye, li ser hev nûçeyên nebaş belav dikin û gel pê gêro û mijîl dikin…Pevçûna wan her û her li ser parçeyên dî yên Kurdistanê ye, weku rovikên wan bi derveyê Rojavayê Kurdistanê ve girêdayîne…Li ciyê ku xwe, tevgera xwe û gelê xwe bo roja têkçûna deselata malbata Esed amade bikin.

Dev ji avakirina Encumenek neteweyî ya bo Rojavayê Kurdistanê berdan, bi egera pêdakirina „Vegêr“ek  navxweyî, ku ciyê wê encumenê dagire, lê wekî dixuye, di rewşa pevçûnî ya niho de, ew „Vegêr“ jî nema bi serdikeve…

Tirsa min ewe, tew peyivîn li ser vê mijarê, di kurtegotarek mîna vê de jî, bê destûr û rêdayîn qedexe ye. Ne dûr e, ku hinek me „Zimandirêjan!“ bikin egera wan pevçûnên qatên jorîn di tevgerê de…Lew re ya baştir ewe, ku tew em nepeyivin û kê ji me pirs kir:“Rewşa tevgerê li Rojavayê Kurdistanê çewaye?“

Em bersivek wilo bidin:

„-Ma rewşek ji vê baştir berê hebû?.“

               [Serwext]

çapkirin