Cemal Ballikaya 

Ne gerokek biyanî me

Ne jî nêçîrvanek bi qefes im

Digerim li gorên nexuyayî.

Ne bi parsekî, 

Ne jî bi histuxwarî,

Bi nav û paşnavên rasterast

Bê çiv û çur

Di dilê min de kêlikên bilindkirî

Bi armancek lihevkirî

Bê ben û niviştên rizyayî

Perestgeha zarokên Newrozê

Herçar demsalan xemilandiye.

Digerim li gorên nexuyayî

Ne masîgir, ne jî kelekvan im

Li perê Firat û Dicle

Li pêşberê pêlên har

Di avgerokan de

Gulan diçikînim.

Ez dayik im!

Xeman dirêsim

Bi ayetên ji sêpêyan niqutandî

Dergûşa xwe dilorînim

Digerim li gorên nexuyayî

Gund bi gund

Bajar bi bajar

Li ser keleha Bedlîsê

Ji rêberên azadiyê re

Silavên torinan dikolim

Dilsoziya Al`gir û rêhevalên bawermend

Li ber sûra Amedê

Ji warê şêran

Dêrsim û Qocgîriyê

Di pirtûkek pîroz de

Diyarê Mehabadê, Hewlêrê û Qamişlo dikim

Digerim li gorên nexuyayî

Bi nav û paşnavên rasterast

Bê

çiv

û

çur….

Cemal Ballikaya

29.04.2007

çapkirin