Evîndara Newrozê

 Dayka Kurd

Li ser çîyayekî bilind

Di gel ronahîya elind⁽¹⁾

Bi dengê ney û awazên şivanan

Derdikevim ji bin konê xeman

Da lawê min nebêjit

Ka ew bêrîya çîya

Çav li rêya keriya

Ya şivanî jê dil vîya

Li zozanan, şax û çîya

Û

Di nav keviya berfê da

Di nav dilê axa te da

Geş dibim û şîn dibim

Dibim bihara dil ji nû va

Da lawê min nebêjit

Ka ew mîra gula

Nav wê nêrgiza dila

Şîn dibû li sîngê çîya

Ya min ji nîva dil vîya

****

Li ser çîyayekî bilind

Di gel ronahîya elind

Li esmanê vîna te da

Digirîm û dibime derya

Da lawê min nebêjit

Ka ew derya ciwan

Gel pêlên bi êş û jan

Di nava dil û cergan

Wek Marmîşo⁽²⁾ û Wan

Di nav derya vîna te da

Di nav pêlên eşqa te da

Dibime masîyeka xemgîn

Bo dilê şikestî, derfeteka zêrîn

Da lawê min nebêjit

Ka ew masiya xewnan

Di nav ava derya xeman

Çaverêyê ewan şeva

Ya dikir li gel min sema

****

Hildikim bi vîn û canê xwe

Agirê newrozê bo evîndarê xwe

Ji bo sersala me ya kurdî

Li ser çîyayên Agirî û Cûdî

Dibime şevçiraxeka Newrozî

Gurbûneka ji agir, evîndareka pîrozî

Paşî lawkê mino tu bêje:

Di gel her adarekê

Nûbûna her salekê

Hilbûna agirê dilê min´e

Kolîna birînên min´e...

(1) Me „elend“ ji bo ahengiyê daniye „elind“

(2) Marmîşo: Navê cihekî ye, ku 45 kîlometra ji bajarê Ûrmiyê dûr´e.

20.03.2008

çapkirin