Gazinek ji Sibatê

( Diyarî ji bo Şehîdên azadiyê , di cejna qurbanê de )

Dildarê Mîdî

Sibatê … ,

wey bobelatê

Tu Sibata dîne

Bi gir û bi kîne

Xweş Te di dim nasîn

Tu jî xwe bi bîne

Tu bê Ol û bê bextî

Tu bê Tac û Textî

Tu bê dem û wextî

Tu qet ne tu tiştî

Tu bê ber û piştî

Şahiya dilê min

Ji nişka ve kuştî

Sibatê … ,

Wey mal mîratê 

Kesera dilê Eyşê

Nalîna dilê Xatê ..

Alîkî Te geşe          Alîkî Te reşe

Alîk Berq û Tave           Yek xunava xweşe

Alîkî Te cejne           Aliyek Fermane

Aliyek kambaxe          Aliyek seyrane

Aliyek şahiye                Aliyek wêrane 

Sibatê …,

Hey bê tebatê …,

Te jî ceriband

Li me xwe zîvirand

Serê xwe li ba kir

Diran Te sîqirand

Te cejna qurbanê

Bi şînê xemiland

Te ew cilên cejnê

Te ew xemla bejnê

Simbêlên badayî

Guliya hildayî

Bi xwînê neqişand …

Sibatê …,

Wey kêferatê …,

Tu bêje Avdara

Tu bêje Nîsana

Tu bêje Gulana

Tu bêje Tebaxa

Tu bêje Kambaxa

Ne cara pêşiye

Rîsê ser Teşiye

Tim ez birîndarim

Di cejn û şahiya

Me d,kin piç û parî

Em hevdû digirin

Axê didin ser me

Sinbil jê difirin

Me bi xazê dişon

Em gurya Agirin

Sermedî Em saxin

Dijmin her dimirin

Sibatê ….,

Aaaa …xxx .. Sibatê

Wey ne bi xêr hatê .

çapkirin