RÛPELÊN SERHILDANA ROJAVA

 Diyarî bo Kurdên rojava û şehîdên wan

HEMKOÇERÊ CEZAWIR

Vaye Rojava dijîne     

şehîdên Kurdistanê

Bi xwînê dinivisîne     

 rûpelîn serhildanê

Li Qamişloka evîn e     

ta pîşa berlemanê

Li Dêrîkê li Efrîn e     

 her wiha li Kobanê

Jin tev mêran meşîne   

li her rê û kolanê

Sîng dane devê qurşîne

gulê didin avdanê

Dil ji dil xwînê dirjîne

 li şûn tav û baranê

Buhar jî vedipirsîne    

gupikên gulistanê

Sor dike zevî ji xwîn e 

Helebçe wek berzanê

Îsal buhara me dîn e     

 şer li tev kêf û janê

Newroza Merda xemgîn e   

 li tevayî cîhanê

Rû li ken û dil birîn e  

wek Dêrsim û Botanê

Ditên bîra me zendî ne    

 Qadî û niştimanê

Zar û zêçan şeridî ne       

daketine meydanê

Radikin ala rengîn e     

 durişma Kurdistanê

Başûrê piçûk dijîne        

xebat û berxudanê

Hember Erebê şofîn e       

 natirse ji zîndanê

Dişîne şamê qêrîn e            

Amûde tê dîlanê

Serîkanyê dilîlîne           

Heleb ketî fermanê

Fermana kesên Besî ne       

tê ji Eborumanê

Rê dide hovên şawî ne 

da Kurd bidin lêdanê

Rêjîma qirdên bêjî ne    

dest berda ji Colanê

Wek ku kuştin Hemawî ne 

êriş birin Libnanê

Herwiha bi gel kenî ne        

bi navê Filestanê

Dibêjin em Erebîne         

ji yek dê û zimanê

Îro hemû îslamîne         

 li dijî Kurdistanê

Li ser doza Selefî ne        

 kerorîsên cîhanê

Çi Sinî çi Elawî ne         

yên dixwînin qiranê

Bawer nakin bi ayîn e     

ne mizgeft û azanê

Dibên em şêrê Elî ne   

 lehengên li meydanê

Lê di cengê de rovî ne   

 li hember tîrkevanê

Min bi çeşm û çava dîne

ne bi vir û gumanê

Leşgerên wan tî birçî ne

dikin parseka nanê

Serekên wana tirsî ne      

ji navê Kurdistanê

Ev rûpelên dîrokî ne    

min ew dane çapxanê

Ger bi derengî weşî ne      

ji nîrên perîşanê

Haya kesî ji min nîn e 

kes derdê min nizanê

ŞIYÊ   23  3 2004

çapkirin