Eskerê BOYÎK

SERÊ KÊ LI NAV ŞERRÊ KÊ ?

Du-sê roj berî vê nivîsar- bersîvê, êvarê, dereng, hevalekî telêfon ji min ra vekir û got: „Te di heqê  jinê da çi nivîsye, ku pîrekeke serpêçayî usan berk cawa te daye, giva serê jînê di navbera kêrên mêrên tawankar û pênûsên mêrên nivîskar da….“ û tenê navê te daye…

Ez sûclû bûm, nedhat bîra min, ku tiştekî usa min nenivîsî be.  Min malpera PEN a Kurd vekir. Bi rastî jî gotareke wî navî 28. 07. îsal di malperê da hatibû weşendin.

Niha malperê kurda tevî nivîsvana ewqas pir bûne, ku nav wê qerebalix û tevlihevyê da nivîskar û nivîsarên layîq û nelayîq ji hev cudakirin dijwere…bi piraktîkî jî nivîsarê teva xwendin ji qewata mêriv dere û ne jî pêwîste.

Ez vê pîrekê nas nakim, nizanim ji kuye, bi çiva mijûle, meremê wê çiye, çi nivîsye, tenê çend cara malpera da sûretê wê û pêçana serê wê bala min kişandye, kîjan van salê dewyê cem pîrekê Kurdên musulman jî bûye weke mode…

BÊWER ÎBRAHÎM, navê goterê „ Serê jinê di navbera kêrên mêrên tawankar û pênûsên mêrên nivîskar de ?! „  Peyvne pir giran û tije sûc…

Min gotara xanim Bêwerê xwend, tê gihîştim gilî derheqa çi dane û pêra jî min texmîn  kir  xanima birêz yan haj naveroka gotara min tune,( dibe ne jî xwendibe) yan jî eger xwendibe  naxweze pirsgirêkê femke…

Salek pêşda ji bo dijwerî û alozyên dor Êzdyên Başûrê Kurdistanê çêbûyî , ez wek nivîskarekî mecbûr mam hinek pirsgirêkan vekirî li ber xwendevanê kurd aşkerekim, Min gotarek bi sernivîsa Keça Êzdî bûye bela serê Êzdiyan… weşand.

Ku xwendevan meremê wê nivîsara min têbigihîjin, ezê gotarê bi temamî daynim li ber data wana:

GOTARA MIN

„Hê du-sê meh berê, hewar-gazyên Êzdiyan ku ji Başûrê Kurdistanê dihatine standin û kampanya nebxêr ya ji bo kuştina keça Êzdî çapemenyê da dihate meşandin ez mecbûr kirim nivîsareke wa binivîsim:

               BANGA MIN LI GELÊ KURD Û HEMÛ QEWATÊN AZAYÎHIZ

Van rojên dewyê ji Kurdistana Başûr gelek nûçeyên nebixêr seva halê Êzdiyan têne stendin. Kuştina keça Êzdî kirine me’ne, çawa temamya Îreqê usa jî herêma Kurdistanê êrîş ji pey hev têne ser vê civaka kêmjimare bê pişt. El Qaîda, hêza Îslamyê ya  têrorîste e’yan  û partyayên olperese radîkal, berê neyartya xwe dane  Ezdiyan.    Mizgevtên bajarê Mûsilê û hinek mizgeftên herema Kurdistanê, kanalên têlêvîzyonan banga qirkirna Êzdiyan dikin.

Kampanya pilankirîye kirêt raya cihanêye giştî ya azayîhiz jî kirye nava şaşyan.  Gelê bêşûcî-bêgune fermaneke nû ra rûbirûye.

Çendek pêşda, li bajarê Mûsilê 24 evdên Êzdî yên karkir, ji bo êzdî bûn ji nav karkirên musulman û xirîstyan bijartin birin, bi hovîtî kuştin, 700 xwendevanên Êzdî ku zanîngehêên bajarê Mûsilê da dixwendin, mecbûr xwendina xwe hîştin, revyane herema Kurdistanê, Êzdiyên ku wî bajarî da dijîtin gişk ji wur revyane.

Ya xeter ewe, ku ew dijîtî û neyartîya dijî êzdiyan derbazî  Kurdistanê bûye.  Bajarên Kurdistanê da jî êrîş û bangên neyartyê yên dijî êzdyan pir bûne û berdewamin. Îrade kare ji bin kontrola qewatên heremê yên bêqezyabûnê derê, bibe şerê olî.

Pij vê kampanya reş da hêz û dewletên neyar sekinîne.

Dijwer nîne bê texmînkirin, ku bin vê kampanya neyartyê da çi meremê gemar veşartîne. Dema Rêfêrêndyûmê ji bo pêkanîna xala 140 î nêzîk dibe. Zanîn Êzdi kurdin, tiştekî wan, ku  wan êrebava girêde tune û ewê e’se bisekinin alyê Kurdistanê.

Dixwezin êzdyan bitirsînîn, ku Êzdî şên û werê xwe bihêlin birevin, dijminatyê bikine nava Kurdên musulman û êzdî, aramî û edlaya herema Kurdistanê da heye tevli hevkin.

Ez, wek nivîskarekî Kurd bangî temamya partî, hêz, komelê Kurdaye sîyasî, civakî, rewşembîrî, olî yên heçar perçên Kurdistanê û cihanê û temamya gelê Kurd dikim, destê nepak û neyara bigrin, nehêlin xeletyê ku bi dewrana hatine  kirin biwekilin û civaka Êzdiyan bikeve devê fermaneke xezeve nû. Ez bangî qewatên cihanê yên azadîxwez dikim Êzdiyan biparêzin.

                                                                     Eskerê BOYÎK  Nivîskar , 03. 05. 2007

Lê ji bo hal hevkî aram bûbû, û ji bo agir gur nekim min ev nivîsara xwe tu cîya newaşand…

Ez ne koçekim, ne jî koçekya-moçekya bawar dikim lê tişt hene, ku ji halê çêbûyî diniqitin dilê mêriv. Nizanim çima ji bo bûyareke xirab tirs ketibû dilê min.

Bûyara Şengalê qewimî…

Rast, dilê temamy gelê Kurd êşya. Pêşyada hatye gotin: „ Xwedê hew mezintir neke“.

Neyarê ev qetil kirî di hinek alyada gihîştye armanca xwe, tirs-xof ketye li nav xelkê, rev û beze.

Hêzên berpirsyar gerekê hişyarbin, nehêlin neyar qetla xwe berdewamkin û Şengala Ezdyan reng û dêmogirafya xwe biguheze, bê êzdî be…

 Vê dewyê mallperên me-kurda da hate nivîsar ku derheqa Duea-keça Êzdî da du cîya fîlm têne çêkirin…

Ji wê bûyara kirêt girtî heta îro hewar-gazya rewşembîr û evdên Êzdîye, ku wê kampanya dijî civaka Êzdyan rawestînin, ew dijminatyê himberî vê civakê li nav dinya musulmanyê da gur dike, ku ew perçek ji pilana neyarê Herema Kurdistanêye, ku vê dema Îreqê da bêqanûnî û kaose, ew kare bive sebebên bûyarên xirab…kesî guh nedida wî dengî, malper bi vîdyo fîlma kişandî, gotarên şermezarkirinê dagirtî bûn…Ew hemû hindik bûn hinek hunermend û nivîskarên meye navdar bi wî navî kilam û helbest, destan û romana çê dikirin…

Niha jî ew fîlm?

Gelo pirsgirêk û birînên Kurdistanê ewqas hindikin, gelo bûyarên kurdaye balkêşe din êdî tunene, ku hunermend û sînemekêşên me û yên wan fînanse dikin ji bo bûyara Duayê nîsanî cihanê bidin ketine cêrgê, ewqas destvekirî û dilşewatin ?…

Ka çend fîlm derheqa serhildanên Şêx Şihîd û Şeyîd Riza, serhildana Agiryê, bûyarên Muhebadê û kuştina Qasimlû, derheqa fermanên Êzdyan, halê Kurdên Elewî û bi hezara bûyarên gelê meye dilêş da hatine çêkirin… Di nava civaka gelê Kurd ya fêodal da salê bi hezara bûyarên wek ya Duayê dibin… Pirs pêjda tê, çima sînemevanê me nava wan pirsgirêka da tek bûyara kuştina keça Êzdî bijartine…

Ev yek cîyê fikirandinê vedike…

Bira xwendevan nefikirin ku ez alîgirê zulm û zora li ser jinême.

Min dixwest ew kevirên davîtine Duaê li min ketana, tek ew bûyara kirêt pêk nehata û ew keça cîwan bigihîşta mirazê xwe…

Gilyê min derheqa  bê sebeb ji alyê hineka da reşkirina dêmê civaka Êzdyan û gurkirina dijminatyê ye li dora wan.

Ez, wek merivekî Kurd  hêvî û reca sînemevan û yên wana fînanse dikin dikim, (eger ew dijminê gelê Kurd nînin) çêkirna wan fîlman rawestînin, nebin alîkarê vê kampanya  qetil ku dijî Êzdîtyê tê meşandin… Pirsgirêkên gelê Kurd, yên layîqî fîlman pirin…

Eger vê civakê ra nikarin bivne alîkar, zirarê jî nedinê…

                                                                          Eskerê BOYÎK,   23.08.2007 „

A, xanim Bêwar, rûnê û rind bixwîne, ku pirsgirêka gotara ku min bi mecbûrî nivîsî ji ku tê. …

Xanima hêja çawa tu bi xwe jî dinivîsî tenê li Başûrê Kurdistanê sala 2007 a 276 jin hatine kûjtin. Lê perçê din da?

Hejmar pir dilêş û girane. Jinek jî usa bê kuştin ew qetileke li ser vîjdanê gel û rewşenbîrya wê. Ez pirsekê te bikim xêncî navê Dua’ belengaz jî wî 276 a navê çend jinê kuştî medya kurdî da hate gotin û kampanya hewar-gazîyê ji bo çenda hate avakirin, tu û ew hunermend, helbestvan, sînemevanê Kurd navê çenda zanî?

Eşkere ye, ku musulmanên radîkal ew bûyar bi merem dijî Êzdiyan dane kêranîn, Dua’ bêmiraz bû qurban… Sênaryo têlêvîzyonên Ereban çê kirin, ku aramya heta wê demê Herema Kurdistanê da hebû tev li hevkin.

Li bin wî miqamê qetlê da mixabin gelek „oldar“ û „rewşenbîrên „ kurd jî reqisîn û heta îro jî hinek direqisin…

Yên ku ew sênaro çê kirine ew ji bo gurkirina agir hazirin fînansa jî bidin her kesê ku ser vê tiragêdyê dixwezin ji xwera nav derxin.

Neyarên Kurdan gelek wara da gihîştin armancê xwe: Êzdî ji welatê kal-bavên xwe direvin û çawa direvin.. Bira  sev xatirê we Şengal jî Erebên „bira“ ra bimîne…

Bûyarên pey ra rastya wê pirovakasyonê ferih raxistin ber çavan.

Ewropayê, demeke dirêj hinek malperên Ereban ji bo tola Dua’yê sitiranek çê kiribûn û  banga qirkirna êzdiyan dikirin.

Heta niha jî ew sênaryo didomîne. Çend roj pêşda dengnivîsarek nîşanî min dan. Van paşwextya, mizgevteke bajarê Akrê da „oldarekî“ bi navê Mela Ferzende ji bo  tolhildana Dua’ musulman, bang li musulmana dike ku „ Kurdên êzdî qirkin, qetla wan evdên musulman ra helale, axa Kurdistanê ya pîroz ji wan kafira paqijkin “ Agir ji devê wî „xudênasî „ dibarî. Min ji dengê wê saw kşand. Min ji guhê xwe bawar nedikir, ku vê dewra 21 da jî karin li nav mirova da yê qaftarîye… usa hebin.

Gelo dem nehatye Hukumata herema Kurdistanê  bi rastî  dengê „oldarên“ harbûye usa bibire.

Gelo dem nehatye rewşenbîrya Kurd jî bercevkê tarî ji ber çavê xwe hilde…

A, xanima hêja, eger têgihîştî mesela nivîsara gotara min ev bû .

SERZÊDEKIRIN

Navê xelkê ra lîstin şerme. Te ev gotar 15.05. 2008 nivîsye U ez nizanim çend malpera da jî weşendye? Xwendevanên ku Eskerê BOYÎK nas nakin, wê bifikirin gelo ew fêodalê  kîjan dewrêye?...

Rexnekirin başê, lê cîyê neheq navên mêriv ra lîstin zimandirêjî û bê edebî ye.

20.08.2008

çapkirin