Eskerê BOYÎK

 FERMAN E

                                          Ji bo komkujya Şengalê

Ferman e, dayê ferman e, bavo ferman e,

Komkujîke giran e,

Dîsa fermana serê me Êzdiyan e,

Şengal dişewite,

Xûn û hêsir tev diherikin

Qubê Lalişê reş girê dan e,

Agir li dilê me ketye                                  

Hewar hey hewar, hewar hey hewar

Şengal Kurdistane.

Na, negrî bira, negrî dayê

Em ketine destê qetil-qana  vê dinyayê,

Erd dişewite, cihan teng bûye,

Rastî ker û kor bûye,

Kes hewara Êzdya nayê

Negrî bira, negrî dayê. 

Ferman e, dayê ferman e, bavo ferman e

Ferman nîne qetlyam e,

Nalîna birîndara, zarezara sêwyan e,

Keç û bûka kezyê xwe jê kirine danîne ser meytan e,

Cî û war wêran bûne, gund û şên tev hilşyan e,

Ezdî dîsa tev êş û azara xwe tenê man e…

Agir li dilê me ketye

Dibêjin ne av e, ne nan e, ne derman e

Hewar hey hewar, hewar hey hewar,

Şengal Kurdistan e…

Na, negrî bira, negrî dayê,

Şîn û girî Şengalê nayê,

Ware şêr û pilingan, kela berxudana hezaran sala,

Kelemê çevê  xweyin - neyaran

Van wewîk û reşêlara neyê rayê,

Negrî bira, negrî dayê…

Ferman e, dayê ferman e, bavo ferman e

Ferman nîne qetilyam e,

Êzdîxanê da şîn e, şîna giran e,

Mêrxwes û egît lihev civyan e,

Dest tewar kirine, ji qehrê difetisin, metel mane

Nizanin çawa xûnê bi xûnê paqijkin

Ku ev zulm bêheyf nemîne…

Hey wex, bavo, hey wex dayê, ev çi agirzeman e…

Hewar, hey hewar, hewar hey hewar,

Şengal Kurdistan e,

Na negrî bira, negrî dayê

Em sond duxun: em bi Laloşa Nûranî sond duxun,

Heta êzdîk  hebe li dinyayê

Şengala êzdiyan bê Êzdî nabe,

Şengal xelkêra namîne, namîne dayê.

Negrî, negrî bira, negrî dayê…

Ferman e, dayê ferman e, bavo ferman e

Ev ferman nû nine, ya heftê û sisyan e

Komkujîke giran e…

Hezar salin ser sere me ev qetilin û ev qan e.

Ev neheqî û xezeb, ev weşitya  wêran e…

Xûna zar û zêçên me wanra buhuşt, wanra axert-îman e…

Edî  li ber çwvane

Kê ne qetl, kê ne we’ş, kê ne dêw, kê kafir

Û kê jî mexdûr û qurbnê wan e…

Şengal dişewite,

Agir li dilê me ketye

Hewar hey hewar, hewar hey hewar

Şengal Kurdistan e…

Ferman e, dayê ferman e, bavo ferman e,

Şengal dişewite

Nalîna birîndara, zarezara sêwyan e,

Keç û bûka kezî jê kirine danîne ser cangoryan e,

Çyayê Kurdistanê reş girê dan e,

Xûn û hêsir tev diherikin,

Agir li dilê me ketye,

Hewar hey hewar, hewar ferman e

Şengal Kurdistan e…

Kurdistan jî birîndar û wêrane,

Dest van neyara da şermezar û perîşyan e…

20. 08. 2007.

çapkirin