Teyî weke ku mezinên me dibêjin: Deh kurê pîrê hebûn yê herî baş ‘çîk’ bû! Erê heyran we fêm kir bê mesele çi ye! Vêca meseleya deh kurên pîrê jî dişibe çîroka ‘bira’kên me tirkan.

Deh kurên pîrê hebûn, yê herî baş Serdar Turgut bû: Heta êvarê behsa demokrasiya New Yorkê dike, lê dema rojekî bêhemdî jî behsa me kurdan dike, bi tenê ‘terorîst’iyê layîqî me dibîne.

Kurê pîrê yê herî baş ji serbestberdana komên aştiyê ew çend aciz bû ku, nekarî hinekî din jî faşîzma nava rihê xwe veşêre.

Ne xerîb e, tirk çawa ku heta dêr û mizgeftan jî ji bo berjewendiyên xwe yên neteweyî bikartînin, her wiha mîzahê jî ji govenda xwe ya faşîzmê re dixin destmalek!

Tirk çawa ku heta homoseksûel û lezbiyenan jî ji ‘vatan, mîlet û sakarya’ya xwe re seferber dikin, her wiha qerf û henekan jî dikin gule û direşînin ser serê berxwedana kurdan!

Jixwe kurdan beredayî negotine ku divê meriv ji ‘demokrat’ên tirkan bitirse, ne ku ji faşîstên wan…

Deh kurên pîrê hebûn, yê herî baş Yilmaz Ozdîl bû: Dema peyva kurd seh dike, ji acizî ereqê vedixwe. Dema ku gotina kurd bi neqencî jî zêde dakeve ser rojnameya Hurrîyetê, ji wî we ye ku Tûrkiye bûye Kurdistan. Ji her kesî re demokrat e, lê tenê ji kurdan re ‘çîk’e!

Deh kurên pîrê hebûn, yê herî baş Bekîr Coşkun bû: Ji bo mirina pisîkekî xwedêgiravî qiyametê radike, lê berxwedana kurdan jî weke taya mirina xwe vedibêje. Çiqas ku kurd bêtir bêhna azadiya dikin, mêro Bekir Coşkun jî dikeve taya mirinê.

Deh kurên pîrê hebûn, yê herî baş Nîhat Genç bû: Ji her deh çêrên wî, neh dikevin para serokên Kurdan. Roja ku kurdên Başûr gihîştin azadiya xwe, mêro ji acizî hindik mabû ku dev ji nivîsê berdabûya heyran.

De Bakurnoooo!

Hinekî din jî bi xîret bin û benê azadiyê bigirin. Belkî pênûsa vî cehşikî di dereke wî de şikest, kî Xwedê dizane!

Deh kurên pîrê hebûn, yê herî baş Levent Kirca bû: Mêro piştî şerê meşhûr yê herêma Oremarê xwe çirçirandibû û bêyî ku şerm bike dabû pey garana faşîzmê û gotibû, ‘Di vî emrî de ezê sîlahê bidim destê xwe û biçim eskeriyê…!’, lê ev gotinên wî jî qet nebe çar rojan xwe li tevna bîra me kurdan negirt. (çavkanî bo bîrkoran: http://www.hurriyet.com.tr/magazin/anasayfa/7537014.asp?gid=180&sz=37086)

Jixwe dû re serê we xweş be, Belediya Batmanê bi xalîçên sor û diyariyan ve Levent Kirca ezimandibû. (Li ser vê min hingê tiştek jî nivîsandibû, lêêêê heft car heram be…!)

Deh kurên pîrê hebûn, yê herî baş Alî Kaya bû: Weke tê zanîn li ser navê dewleta xwe bombe avêtibû pirtûkxaneya Umutê.

Ma em ê êdî çi ji kurên ‘baş’ hêvî bikin ya rebî!

Jixwe bê sebeb negotine ku deh kurên pîrê hebûn, yê herî baş ‘çîk’ bû!