Gelo em Kurd Sado-Mazoşîst in?!

 

 

        

Evdile Koçer, Evdilekocer@yahoo.com

 

 

 

 

 

Ez jî wekî we gelek caran li ser difikirim ku gelo em kurd çima vê zilm û zordariyê û vê neheqiyê li kurdên xwe dikin.

 

Çima em her dem îmana kurdên xwe di çepera nezantiya xwe de dimiçiqînin û vê îşkence û tadayiyê li wan dikin.

 

Gelo em ji vê orf û adeta xwe ya ku me bi xwe ve zeliqandiye zewq digirin?

 

Gelo em kurd bi rastî jî sado-mazoşîst in, an na???

 

Kurdek dema ku mesela hemû xewnên xwe yên şkestî û beravêtî di wê klîba xwe ya zirzirokî û tirtirokî de wekî Siltan Slêman dicivîne ser dilê hev, çima di binî de navê “senaryo û derhêner” dinivîse.

 

Gelo ji me birêzekan re dixwaze çi bibêje?

 

Dixwaze çi nîşanî me feqîrên xwedê bike? Bi rastî jî ez mereq dikim heyran.

 

Gelo dixwaze hemû gotin û nifirên me yên ku di hişê me de bi qalikên xwe yên resen û bi senaryoyên xweşik ve ji Enstûtiyên Kurdî re bûne koleksiyon, ji nû ve bivejîne û li ser serê senarîst û derhêner bibarîne... an dixwaze bi wê ‘huner’baziya xwe ve –bi qewlê birakên me Toriyan!- me bipeqîneeeeeaa.

 

Gelo heke ji me ‘heyran’ên xwe re ‘Klîba sado-mazoşîstekî’ bikişîne ji vê zilmê dê ne çêtir be???

 

Çaxê ku stranbêjek çend gotinên ku fonetîka “Turk Dil Kurumu” (Saziya Zimanê Tirkî) jê tê di çala devê xwe yê pîroz de dibe û tîne, çima paşê di binî de navê “Peyv û gotin” dinivîse.

 

Tu dibêjî qey wan gotinan di çala devê xwe yê bimbarek de negerîne dê kurdî bikeve ber mirin û sekeratê.

 

Henek ne li aliyekê, lê bi rastî jî ez pirr mereq dikim loooooo!

 

Gelo dixwaze ku em hemû heyranok û payîzokên ku di dilê me de li benda vekolînên mûzîkjenên kurdî ne, bi meqam û awazên nû lê vegerînin û jê re bixin stranên(!) nû... an dixwaze bi wan gotinên xwe yên asîmilebûyî ve –bi qewlê birakên me Botiyan!- me biçirîneeeeeee.

 

Heger ji me ‘hezkiri’yên xwe re bi wan gotinên xwe yên rind delal xweşik bedew spehî û kuwes û guzel ve ‘Strana Sado-mazoşîstan’ çêke gelo dê ne çêtir be???

 

Siyasetmedarekî ku ji xeynî siyasetê her tiştî dizane, dema ku di berêvarekê de xwedayê mezin riya wî şaş dike û li deriyê mala me dixe, çima devê xwe wekî Bulent Ersoy xwar dike û bi tirkiya Zekî Muren ve tecawizî rihê me dike.

 

Gelo dixwaze ku em mêvanperweriya xwe ji bîr bikin, bi dûvê wî ve bavêjin kadînê û heta ku bi kurdî ziriya têr ka û ceya kurdî bidinê û jê dernexînin... an dixwaze bi wê zirezira xwe ya bi tirkî ve –bi qewlê birakên me Şirnexiyan!- me bidirîneeeeeeee.

 

Heke ji me ‘Berberojkên Siyasetê’ re, bi mûzîka Zekî Mûren ve qala ‘Siyaseta Sado-mazoşîstan’ bike gelo dê ne baştir be???

 

Bi rastî jî ez pirr mereq dikim loo.

 

Gelo heke em hemû diriyan çiriyan û peqiyan, dê mêrên diyên me pirr zewq bistînin?

 

Gelo peqpeqokên orgazmê dê li ser rihê wan ê têkçûyî bikeve û dê her tişt safî bibe?

 

 

 

çapkirin