Hilbijartina Serdest û Bindistan








Serdestên ku îro navê wan ‘AKP’ û ‘Erdogan’ e, di dora heftî û heft çîrokên xwe yên îslamo-tirkperest de dûvê xwe dihejînin, çawa ku henekên xwe yên sûrreal bi me bikin qala fetihkirin û bidestxistina Amed û Dêrsimê dikin.

Lê bindestên me yên feqîr jî çawa ku bi kelheya Ameda xwe razî bin, ji me re behsa hin sloganên xwedubarekirî dikin.

Helbet divê kelheya Amedê û delaliya Dêrsimê di berîka me kurdan de bimîne; ji xwe eyb e meriv vê yekê binivisîne jî.

Lê siyaseta ku bi deng û hişeke bilind çav bernede bajarên wekî Edene, Mersîn û Îskenderunê bivênevê di wê newala bindestiya xwe de dixwaze ku emrê xwe yê mayî kurtir bike.

Ji ber ku di hilbijartina dawî ya herêmî de, ne ku AKPê li bajarên wekî Sêrt û Wanê bi ser ket; lê ez dibêjim qey siyaseta kurdan ya ‘erzan’ bi ser neket.

Yanî heke ku sibe kurd li Sêrt û Wanê bi ser kevin jî –ji bîr nekin: jixwe ev der yê me bûn! Ne wisa gelo???- dê ev bi xwe re serkeftineke mezin neyne, lê heke kurd bikaribin alaya serkeftina xwe deynin li ser çend bajarokên tirkan jî dê bikaribin di sûka siyasetê ya tirkan de jî serê xwe bilind bikin.

Ligel hemû hîle û pîleyên dewleta Tirk, heke ku kurd hesab û kitêbeke xurt bi ser hin bajarên tirkan (ligel ku hejmara kurdan li van bajaran gelek e!) de nekin, mixabin dê li BAKUR bindestiya wan her dewam bike; mixabin dê Erdoganên nû wekî tehdîdeke dewletê ji ser serê me kêm nebin.

Ji ber ku dewlet îro bi xêra feqe û melayên AKPê li Bakurê welatê me dixwaze ku serdestiya xwe jinûve şîn bike. Ne ku aqilê dewletê bi hişê AKPê re li hev dike, lê dewlet ji bêçaretî wekî hespê trûvayî AKPê li dijî kurdan bi kar tîne.

Di hilbijartina pêş de dewlet dixwaze ku li Bakur bi rihê serkeftina AKPê, cendekê serdestiya xwe ya riziyayî hinekî bivejîne.

Loma siyaseta xweparastinê ya kurdan tu dibêjî qey bindestiya heyî bi rengekî diçespîne. Siyaseta xweparastinê rê nade ku kurd kelheyên nû qezenc bikin.

Siyaseta xweparastinê rê nade ku kelheya Amedê li dijî barbariya kelheyên Enqereyê bibe alternatîfeke xurt.

Divê kurd li ser bêndera heyî li ser biserkeftinên van deh salên dawî amûrên siyaseta xwe ko nekin; gerek bikaribin sing û berên nû li ser bênderên tirkan jî bikutin.

Nexwe dê bindestên me yên feqîr fêrî tir û fisên serdestên xwe bibin.



Koçernot:

Dewleta rûreş, bi girtina Azadiya Welat re dixwaze ku deriya siyaseta kurdan ya ‘Kurdî’ jî bigire; dixwaze ku nefesa peyvên kurdî di hêlînên wan de bifetisîne. Divê tu kurd ji vê barbariyê re bêdeng nemîne!!!

çapkirin