Ne hewce ye ku ez ji we re behsa kundiran bikim; kundir kundir e ezbenî.

Heke kundirek ji kundirtiya xwe jî tiştek fêm neke, heke kundirekî kurdîzan lê pûç û vala be, wê ileh bileh li ser wan sehneyên Newrozê bi tirkî behsa kundirtiya xwe bike. Nexwe sebra wî nayê ezbenî.

Heke kundirek nizanibe bê ka maneya kundiran di civakê de çi ye, wê ileh bileh Newroza mîlyonan kesî bi tirkiya xwe biherimîne...

Heke xwîna tirkî û tirkîtiyê ketibe rihê kundirekî/ê, mixabin wê tecrûbe û şîretên hemû dinyayê jî pênc pere nekin; wê di dawiyê de guhê sedhezaran dayîkên tirkî-nezan bi tirkiya xwe kerr bike.

Heke kundirek tu tiştî ji felsefeya têkoşîn û berxwedanê fêm nekiribe, wê sed felsefeyên pûç ên kundiran fêr bibe, lê wê sed salên din jî zimanê civaka xwe fêr nebe...

Heke kundirek ji xîret û îmanê ketibe, hingê wê dest bi bahaneyên fis-îman bike heta ku emrê xwe yê mayî jî di nava kundir-tirkiyê de derbas bike...

Heke kundirek îdîa bike ku ew ne kundir e, divê hingê meriv jê bitirse; ji ber ku hingê dikare kumê xwe yê tirkî li serê hemû civakê jî bike...

Heke kundirek kundirtiya xwe li ser xewn û teoriyên pûç û vala ava kiribe, qet mereq nekin wê bi qasî serê derziyê jî ji gotinên Mamoste Medya fêm neke…

Heke kundirek, 'kundirekî kurdî' be, lê bixwaze îleh bileh bi tirkî rêbertiya civaka me bike, nexwe kundirekî rizî û beredayî ye...

Heke kundirek kedeke mezin jî dabe, li serê çiyan û binê çiyan jî mabe, li heps û zindanan jî porê xwe spî kiribe, ku rabe li ser sehneyan bi tirkî Newroza me pîroz bike, nexwe hingê dixwaze behsa kundirtiya xwe bike.

Ne min got; ne hewce ye ku ez ji we re behsa kundiran bikim; kundir kundir e ezbenî.

Koçernotek:

Ma êdî civaka kurd wê çi bike? Li her derî bi sedhezaran kesî dîsa alaya berxwedan û têkoşînê bilind kirin; dîsa bi yek deng û rengî boçeke mezin li siyaseta Enqere û tirkîtiyê xistin.

Êdî dor dora rêvebir û siyasetmedarên kurd e ku hunera siyaseta xwe nîşanî hemû dinyayê bikin!

Di serî de Mamoste Medya, ez dîsa Newroza hemû Kurdistaniyan jidil pîroz dikim!