Kurdên nû lazim in!

 

 

Evdile Koçer, Evdilekocer@yahoo.com

 

 

 

 

Kurdên nû lazim in;

 

 

 

Ku bikaribin di nava qelbê civaka xwe ya ku wekî garaneke bê ser û ber herdem bêhna rîx û gotegotên ji zibilê belav dike de, dîwarên fikr û niqaşê ava bikin û dûxana kar û xebatê li ser xwe bixînin...

 

Kurdên hişyar lazim in;

 

Ku bikaribin ava gotinên biriqî yên ku mîna tabletên şevan her dem diçirisin wekî dermankirina nexweşekî, bêyî ku bi xwe bihese berdin ser çemê bedena hevalên xwe yên ku di malikên mejiyên xwe de bêndera çêr û xeberan ava kirine...

 

Kurdên dînemêr lazim in;

 

Ku bikaribin li ber devê deriyê panel konferans û semînerên ku di nava çavikê bajarên wan de bi tirkî têne kirin de top bibin û bi hirehireke mezin ve ji bo halê zimanê xwe bigirîn û bikin ku tirkiya ku li ser textên kurdî ji kurdan re kemînekê vedide ji xwe de bipelişe... 

 

Kurdên fîqspî lazim in;

 

Ku dema bêhsa meselokeke “radîkal” bête kirin bêyî ku du sê sloganên klîşe û qundirayayî bête bîra wan, bikaribin mesela şev nîvê şevê kefeneke kesk û sor û zer bixin stûyê Enqereya devbixwîn û fatîhayeke kurmancî li ser bixwînin...

 

Kurdên babegît lazim in;

 

Ku bikaribin bêyî ku qala zengîniya zimanê xwe bikin tovên peyvên kurdî bi metodeke sofîstikane li ber serê civaka xwe bireşînin û wisa bikin ku eşqa zimanê wan bikeve dilê neyarên wan jî...

 

Kurdên gulgulî lazim in;

 

Ku bikaribin bêyî ku wê gotina meşhûr ya “Her zimanek însanek e!” bixin çala devê xwe û civaka me ya xwelîser jî pê bixapînin, wekî însanan hem rabin ji tirkekî baştir bi tirkî bizanibin û hem jî dû re bi qewlê Celadet Bedirxan dema ku ketin hundurê mala xwe zimanên din nola çakêtekê bi derî ve daliqînin û bi zarokên xwe re bi kurdî bikenin...

 

Kurdên welatparêz lazim in;

 

Ku bikaribin bêyî ku wekî hin tirkên dinyanedîtî behsa welatparêziya xwe bikin, bêyî ku gumanê bibin ser welatparêziya hin kurdên din mîna qehremanên xweveşartî bi çar destan avdanî û çandiniya welatê xwe bikin...

 

Kurdên mêrê berê lazim in;

 

Ku dema rexneyeke neyar jî ber guhê wan ket bêyî ku komployeke marjînal jî bînin bîra xwe pozê wan ji ber xwe ve bişewite û wan rexneyan wekî mêrê berê ji xwe re bixin guharên xalxalokî...

 

Not: Ev nivîs di kovora Tîroj de jî hatiye weşandin.

 

 

 

 

 

çapkirin