Kekê Selîm, min çarşema borî di TRT 6ê de bernameya te ya helbestxwendinê temaşe kir.

Min hew dît ku te li ser avahiyeke dîrokî di bin alaya Tirkiyê de bi eşq û can helbestên Melayê Cizîrî dixwendin.

Bi dengê te yî melûl yê helbestiyane ve alaya Tirkiyê li ba dibû. (Min bi çavê serê xwe dîtin!) Li ber çavê min, alaya tirkiyê dibû ezrailek û li ser rihê helbestên Melayê Cizîrî li ba dibû.

Ev dîmen heta niha ji min re fantaziyeke absûrd bû, lê niha bi xêra dengê te yê kurdî re li ber çavê min bû rastiyeke absûrd.

Na na, ti hêviyeke min ya wisa mezin ji te tune ku tu jî wekî Edward Saîd çend têgehên serdestan pûç bikî û ‘kevir’ê rewşenbîriyê bavêjî qereqola serdestan.

Lê qet nebe tu jî bi helbestên Melayê Cizîrî ve di bin wê alaya tirkan de ‘qereqol’a serdestiyeke nû bi wî dengê xwe yî melûl ve li ser nifşên nû ferz neke ezîzê mino.

Ne hedê min e ku ez aqil bidim tu kurdî û behs bikim ku di bin wê alayê de dengê bi sedan helbestvanên kurd hatiye birîn, lê bi izna te be ez ê behsa çend tiştên din bikim.

Heke alaya Tirkiyê di bin çiveçiv û xuşexuşa dengê helbesta kurdî de li ba bibe ez ê dengê xwe nekim, lê berevajî vê yekê, helbesta kurdî bi xêra dengê te di bin alaya Tirkiyê de kedî dibe, emrê wê alaya têrxwîn dirêj dike, ji rihê xwe yî serhildêr dikeve û ber bi xulamtiyeke nû ve dimeşe.

Tu li hêlekî behsa ‘dekoder’iya rewşenbîriyê dikî, lê li hêla din jî naxwazî bibînî ku tu ji serdestên nû re dekoderiyekê dikî.

Tu hêlekî behsa rewşenbîrên serbixwe dikî, lê li hêla din jî tu di bin alaya tirkan de dîwana rewşenbîriya xwe xweş dikî.

Kekê Selîm, heqîqeta rastiyê li her derî eynî ye, li ba Edward Saîd jî û li ba Ehmedê Xanî jî, lê heta ku tu nanê ‘rast’iyê wekî rastîbadana xwe bipêjî û di TRT 6’ê de bibêjî, helbet wê rûpelên medyaya tirk ji te re vekirîbin.

Heta ku tu di bin alaya tirkan de rihê helbesta kurdî kedî bikî, helbet wê serdestên nû berê mîkrofon û kamerayên xwe yên gerînok bidin ber devê te.

Lê wê medyaya serdestan tu carî ji te nepirse ka ji ber çi 36 kalikên te hatine bidarvekirin; ji ber ku ew niha dixwazin derewên desthilatdariya xwe bi neviyên wan kalikan pîne bikin.

Ligel silavên rengîn…