Madem ku Azadiya Welat dîsa ‘şûr’ê xwe tûj dike…

Madem ku dixwaze gotina kurdî ji bakuriyên me re bixe nivîşk, qelî, to, hingiv û nanê sêlê…

Madem ku di hemû şert mercan de jî teslîmî ‘Hişê Ergenekona Kemalîst’ nabe…

Madem ku şûrê kurdî dîsa bilind dike…

Ê nexwe divê ez koçerê xwedê jî kopalê xwe hildim û hêzeke nû bidim vî kar û xebatî. Nexwe bi serê xwe û we bikim, heta êvarê ez behsa krîterên koçertiyê jî bikim, bi şev û roj ez qala şert û îmanên welatparêziyê jî bikim divê hûn ji min bawer nekin!

Loma ez li vir aşkere dikim bê ez ê di pêşerojê de di vî quncikî de li ser çi binivîsim:

1- Tirkiya Guler Işik ya di TRT Şeşê de. (Hermetê, carna wekî demokrasiya TCê çend gotinên kurdî dixe nav bernama xwe û dû re mineta xwe jî li me dike heyran! Heke rehmetî Cegerxwîn sax bûya, helbet dê jê re bigota, “Tirkiya te pir baş e keça min, aferîm ji te re…”)

2- Kurdên ku dixwazin romannûsiyê bikin û kurdên ku dixwazin bîranînên xwe wekî ‘roman’ çap bikin! (Ev mesele ji êşa mirîşkan jî xirabtir e!)

3- Ferqa şivantî û gavantiyê! Û ferqa zimannasî û diran-nasiyê! (Gelek şivan hene berî ku bibin xwedîpez dibin şivan, gelek ‘zimannas’ hene berî ku bibin xwendevan xwe li teoriyên zimannasiyê diqelibînin! Ya rebî bê lome!)

4- Belediyeyên ku li ser navê ‘kurdîtî’yê muxtariya Dewletê dikin! (Gerçî heqê hemû hilbijêrên kurd heye ku his bikin belediya wan provayên dewletbûnê dike, lê bi serê we bi vî aqilê belediye-gerînê ve em nikarin koxikekê jî ava bikin!)

5- Dîktatorên biçûçok! (Siyaseta ku dîktatorên biçûçok diwedilîne.)

6- Civaka ku hez ji xayîn û qehreman dike! (Gladyatorên ku ji civaka xwelîser re dibin qurban)

7- Ferhenga Kurdên Swêdê. (Gerçî ji ferhenga kurdên Swêdê re gelek peyvên hemwate(synonym) lazim in, lê bila baweriya we bi koçerê we were…)

8- Mîzaha legal û îllegal! (Kurdên ku wekî siyaseta îllegal, nizanin mîzahê jî legalîze bikin û deynin ser sofreya civakê!)

9- Medyaya erzan û belaş! (Medyaya kurdî ya bê rojev, ya ku rojevên cîranên xwe kopî dike û datîne ser tenûra me!)

10- Serokên ku dixwazin bibin nivîskar û nivîskarên ku dixwazin bibin serok! (Ma hewce ye ku ez behsa vê meseleyê bikim? Ma hewce ye ku ez ji we re bibêjim MAST?)