Bila hunermendên NÇM’ê di TRT 6’ê de filmê ‘Osman Bey’ wergerînin kurdî.

Ji bo ku Emîn Çolaşan di Hurrîyetê de dîsa binivîse bila komîsyonek bê avakirin.

Ahmet Altan bila êdî di kovara Ozgur Halkê de nivîsên îdeolojîk binivîse, da ku bikaribe bêtir xwe îfade bike.

Yilmaz Erdogan bila navê xwe bi awayeke fermî biguherîne û bike Yilmaz Gûney, da ku bikaribe bigihîje hemû ‘xeyal’ên xwe. Dû re li gorî dilê xwe bila dîsa dolaran bibexşîne Mehmetçîk Vakfi.

Dayîkên Aştiyê bila gora Zûbeyde Xanim ziyaret bikin û bila baqek gulên keskûsorûzer deynin ser kêla wê; ji bo vê yekê bila Stî Aysel Tugluk bê wezîfedarkirin.

Saziya TRT bila taybetî ji bo hin kurdên Swêdê li Stockholmê kanaleke bi navê “TRT Swêd” veke, da ku hin nivîskarên ku bi awayeke legal nikarîbûn bihatana Tirkiyê jî tevlê weşana wê bibin.

Emîne Ayna bila îsal di şeva Azadiya Welat de soz bide ku wê di sê mehan de zimanê UYGURÎ fêr bibe û saleke din di heman şevê de bi uygurî bipeyîve.

Ertugrul Ozkok ji bo ku samîmîyeta xwe îspat bike bila fêrî zazakî bibe. Bo vê yekê bila çar mehan di mitfexa Azadiya Welat de firaxan bişo.

Samî Tan bila di TRT 6’ê de bernameyeke bi navê ‘Dîwana Şêx Zubeyrê Kurdî’ çêke, da ku êdî ji pêvajoyê dawî xweş fêm bike û da ku êdî bo hemû civînên aştiyê bê vexwendin.

Serokwezîr Erdogan ji bo ku weke serê derziyê ji pirsgrêka kurd fêm bike bila du rojan li Kampa Mexmûrê bijî.

Serdar Ortaçê ku Ahmet Kaya ‘lînç’ kiribû, bila “10. yil marşî” êdî bi kurdî bistre; dû re bila kurd wî wekî qehremanekî bi nav bikin.

Kurdên Ewropayê bila êdî ji bo siyaseta tirkiyê lobiyan bigerînin. (Gerçî serê we xweş be hinek ji wan vê yekê dikin jî, lê neyse…!)

Abdullah Gûl bila bi Ehmed Tûrk re leyîstoka kaxizan bilîze, kî kar bike bila ew bibe serokkomar.

Petrola ku ji Başûrê Kurdistanê dertê bila jê sedî deh bo bûtçeya TRT 6’ê be.

Kurdên ku ev deh sal in nikarin xwe asîmîle bikin, bila li ser wan lêkolînên taybet bêne kirin û bo vê yekê bila serî li UNESCOyê bidin.

Yaşar Kemal bila li malê molotofan çêke û êdî tevlî meşên ciwanên welatparêz bibe.

Belediyeyên kurdan ên ku bi tenê bi vekirina park û bexçeyan ve mijûl in, bila xelata Nobelê ya Aştiyê wergirin.

Ehmed Huseynî bila riha xwe kur bike.

Evdile Koçer bila zimanê xwe zêde dirêj neke.