Vê havînê hûnê çi bername û planî deynin pêşiya xwe ez nizanim, lê min planên xwe yên vê havînê hazir kir!

Dê çend kes jê bawer bikin û jê îlham bigirin ez vê jî nizanim, lê bi izna we be ez li vir van planên xwe aşkere dikim:

Di xewnên xwe de ez ê êdî polîsên sîvîl nebînim. Ez ê hewl bidim ku li ber TRT Şeşê şewitandina gundê xwe û kuştina cîranê xwe jibîr bikim!

Ji tirsa hin kurdên me yên Swêdê ez ê êdî di Roj TV de jî nebêjim „Kurdistan“ ; li şûna wê ez ê bibêjim „Kurmê Darê“ û behsa welatparêziya nû bikim!

Ji bo ku ez tevli TRT Şeşê bibim ez ê çend stranên hunermendên NÇMê jiber bikim û li ber taqê TRT Şeşê bi şev û roj bistrêm! Heta ku min dawetî bernameyekê bikin, ez ê her bistrêm.

Li ser soza kurdî ya Emîne Aynayê ez ê nivîseke koçerkî binivîsim û bînim bîra we ku dê bi xêra Stî Emîneyê kurdî zengîntir û dewlemendtir bibe. (Heta hefteya bê sebir bikin babê mino, nivîsa min têêêê, erê sozzzz!)

Kesên ku heta êvarê li ser girîngiya guherîn û muherîna tirkiyê dinivîsin û di ber re jî aqil didin Ehmed Altanî, ez ê bi îlanekê ve ji wan re bibêjim „Rojbaş hevalnoo!“

Denîz Baykalên di nav kurdan de kî ne? Rojeva kurdan çawa berovajî û manûpile dikin? Ez ê behsa kumê wan yê sor û pêlavên wan yên biriqî bikim.

Nivîskarên Kurd çima hez dikin ku navê wan bi romannûsiyê derkeve? Gelo ma nivîskarek nikare bi gotareke hunerî ve jî deng bide? Ez ê qala vê nexweşiya nû bikim û ji bo vê yekê ez ê serî li Murathan Mungan bidim!

Di rojên pêş de ez ê ji kurdî nan bixwim. Ji bo vê yekê ev demek e ez pîrozbahiyê dikim û şîv û şêrînahiyê didim nas û dostan. Loma divê ez 10 salan zêdetir kar bikim heta ez deynê van şîv û şahiyan bidim.

Ez ê bibim siyasetmedarekî hêja û qenc! Ez ê ji sê kesan re bibêjim „Xayîn“ û ji du kesan re jî „Qehreman“ û dû re serê govendê bigirim. (Tilîlîlîîîîîîîîîî! Errikkkk!)

Petrola Kurdan ya rojekê, têra çend miaşê bernameçêkerên televîzyonên kurdî dike? Li ser vê yekê ez ê lêkolîneke koçerkî bikim û ji raya giştî re aşkere bikim.

Edîtorên ku heta niha bûne kujerên hunera nivîskarên xwe. Nivîskarên ku dixwazin rojek ji rojan bibin edîtor. Ez ê bidim dû şopa wan. Ez ê derd û hêsirên wan nivîskaran di vî quncikî de pêşkêş bikim! (Tew, mala minê!)

Ez ê xwe wekî yek jê aqilmendên pirsgirêka kurd destnîşan bikim. Ez ê heta êvarê behsa komployên nû bikim heta ku ez jî ji rojnameyeke tirk re bûm manşet!

Ez ê êdî ji we re qala kurdên tirkîfiroş û tirkên kurdîfroş nekim. Mala Xwedê ava ku êdî hûn jî kurdên ku „xiyar“ên tirkî difroşin xweş nas dikin! (Aferîm ji we re heval!)

Çima hin nivîskarên kurd wekî pepûkan hê jî mineta xwe li kurdî dikin? Ez ê xwe bixim şûna „Kurdî“ û behsa rihê wan yê vala bikim!