Çarşema borî. Berê şeveqê. Xewa koçerê we ji sedemên taybet(mala minê!) şeriqî ye. Li ser înternetê ez gohê xwe didim dinyayê, ji wir berê min dikeve Roj TV bernameya Rojbaş Kurdistan!

(Ji mecbûrî meriv carina li ser înternetê jî goştê kewan dixwe. Ji ber ku li ser xeta Hotbîrdê hemû kanalên Kurdî wekî ava botanê dikişînin, lê mixabin Roj TV heke carina baran nebare qet nakişîne. Nebêjin çima baran? Ji ber ku baran sînyalan xurt dike. Hevalê Fuat, ev koçer-not ji bo te ye!)

Belê, biborin min qala Rojbaş Kurdistan dikir. Canik û camêrek mêvanê Ejder in. Du saetan ta bi derziyê ve dikin, ji binxet heta serxetê bi kitekit behsa bîranîn, hebûn, mane û wateya cejna Remezanê dikin.

Dû re jî heqê axaftinê hat ser çend temaşevanên ku telefon dikin!

Belê, temaşevanekî wiha got, “Cejna Qurbanê pîroz be!”

Temaşevanekî din wisa dewam kir, “Cejna Newrozê pîroz be!”

Hindik mabû ku yekî din jî cejna Noelê pîroz bikira, lê mala xwedê ava ku dor nehat ser kesekî wisa, nexwe min ê berê xwe bida kitêbxaneyan û li ser Noelê lêlolînek dirêj bikira!

Bi serê xwe û kim ez henekan nakim! Heke hûn ji min bawer nekin telefonî Roj Tv û Ejder bikin, lê hay ji xwe hebin ku hûn nekevin heyecanekê û nebêjin, “Gelo ev der Kurdistan TV ye?”

Bi tenê ez dizanim ku ez di nava civakeke pir absûrd, şîzofrenîk û tevlihev de dijîm. Meriv dikare li ber peravên vê civakê labaratuvarên mezin ava bike û li ser hiş û rihê wê lêkolînên ecêb bike.

Ez gelek caran ji xwe dipirsim: dema ku Xwedê hewl daye henekekî bike gelo civaka me ji ber gotinên wî pekiyaye?!.. An gelo ev bêhişî û binhişî perçeyek ji qedera me ye?!...

Biborin min ê îro ji we re qala meseleyekê din bikira, lê çarşema borî ez ji maçên yara xwe hişyar bûm û ketim nav lepên Rojbaş Kurdistan!

Neyseee, hemû cejnên we pîroz bin, helbet hemû cejnên delala min jî!

Pîrozbahî:

‘Bira’yên me yên tirk, cejna me ya Remezanê ji dil û kezeba xwe pîroz kirin û wekî hin ‘temaşevan’an vê carê jî xwe şaş nekirin! Li Altinovaya Balikesîrê bi wê barbariya xwe ya meşhûr ve em dîsa lînc kirin û li Geverê gotinên kurdî ên ji bo pîrozbahiyê ji hewa daxistin û xistin bin nigê xwe. Helal be ji vê biratiya wan re. Ez hêvî dikim hema carekê jî bi rengekî din cejna me pîroz bikin. Lê ez ditirsim ku ev xwezî dê herdem di gewriya me de bimîne!