Ez nabêjim “Kurdiya Guler Işikê”, loma ez ji rihê wê, ji wan kûrahiya çend gotinên wê yên bi kurdî tenê xuşexuşa tirkî seh dikim.

Ez dizanim, heke ji van tirkmancên welatparêz ve be, an jî heke ev tirkiya Stî Gulerê bimîne li benda çend kurdên surgunê yên ku qibleya xwe her roj diguherînin, welleh bavooo me pê girt!

Eva hûn jî dibînin ku êdî Cegerxwînek jî tune ku nava çavê wê binêre û bi xêra xwe bibêje, “Aferîm ji te re keça min, tirkiya te pirr baş e!”

Loma ne ji çend ‘koçer’ên wekî min be êdî tu kes rexneyekê jî lê nake; ji ber ku ew li bendê ne ku rojekê di bernameya wê de xwe pêşkêşî tirkmancên me bikin.

An jî li gora tiraliya sirguniya xwe, li bendê ne ku bi vî rengî xwe di deriyê TRT Şeşê de legalîze bikin. Û dû re jî biçin li Antalyayê tatîlê bikin!

***

(Gerçî di nivîsên xwe de jî behsa xweşikahiya behra Wanê û kela Amedê dikin, lê li gorî şertên welatparêziya(?) xwe jî li Antalyayê tatîlê dikin! Welleh bavo xweş bazar e!)

***

Lê bi rastî derdê min ne kurdî/tirkiya Guler Xanimê ye. Mesele ev e ku, dewlet bi van çend gotinên kurdî ve me bi awayeke legal fêrî xulamtiya zimanê tirkî dike.

Ji bilî kurdên polîtîk(DTP, HAK-PAR û hwd.), her kes dikare li ser sergoyê TRT Şeşê îmaja kurdî ya heyî jî binpê bike! Dewlet bi vî rengî tovê kurdên a-polîtîk direşîne. (Eyb e meriv binivîse, lê ji xwe pirsgrêka kurdî jî dixwaze bi vî rengî çareser bike! Teww mala minêêê!)

Bifikirin: Heke weşaneke wekî ya TRT Şeşê, heke rezaleteke wisa di civaka Tirk/Alman/Swêdî de bûya dê medyaya wî welatî qiyametê rakira!

Lê li ba me, ji ber siyaseta teng û ji ber têkiliyên şexsî yên çend sergolikan êdî kes newêre rexneyekê jî li tirkiya TRT ŞEŞê bike!

Bifikirin: Tu bêhemdî li rastî bernameyekê têyî, tu nedizanî ne bi kurdî ne jî bi tirkî dipeyîvin!

Zimanzan û nivîskarên me yên ku ji Roj TV re dibûn pêt û agir, niha ji tirkitiya TRT Şeşê re hevalbendiyê dikin!

Tişta ecêb ev e ku hin kurdên me yên lîberal vê xulamtiyê meşrû dikin; wekî pêşketin û têkçûna dewletê analîz dikin. Û li serê dewleta kaniyê gepa xwe xweş dikin!

Nexêr ezbenî! Vê yekê, vê xapandinê, vê dek û dolaba kevin nexe qurbana nefsa xwe.

Qibleya nifşên nû neke qurbana têkiliyên xwe yên beredayî, neke qurbana malperok û şîrketoka xwe!

***

Ez dizanim, dê vêga hinek ji we bibêjin, “Koçero, bila ev jî hebe, dê rast be, dê pêş bikeve, zêde rexne neke..”

Ê nexwe werin ez bi dîmeneke din ve devê vê nivîsê bidirûm:

Di bernameya Gulfiroş de mêvanek dibêje, “Ez ji Semsûrê me…”

Niştî Stêrk lê vedigerîne: “Semsûr çi ye?”

Mêvan jê re got: “Adiyaman…”

Ez niha dipirsim: Gelo TRT Şeş cihê fêrbûna kurdî ye, an cihê pêşkêşkirina bernameyên kurdî ye?

Kesên ku berê Niştiyê ji gotinên xwe re dixistin ‘Stêrk’, çima pirseke wisa jê nakin ya rebîîî??!!!...