BÎR

 Ezîz N´êmetî

Herê....

Ho bizvanoka vînê,

Dibihîzî dengê min

Li kêleka hîvê ?

Ka dê were...

Li bilindayek nizm

Tenê vê carê

Bi min bicive,

Basê spêda sibê bike,

Basê bêhna xoşika jînê!

Mêze ke,

Bê vefa çiqas  lêbok in!

Wekî şerxazên serkevt,

Heta dawîtirîn

Sinorên dilşikandinê

Dilezînin

Hêrişa bê bawirîyê

Li panayîya temen!

Mêze ke,

Bedemek ciqas cambaz in,

Dadipoşin

Rûmetê salos

Bi maska xêrxwazîyê.

Ji mêjve ye

Ew bê a'rane

Wênê kolonyalîzmê

Ser heleqa

Vê axa xerîb

Dinexşînin.

Herê ...

Bizvanoka hejêkirinê,

Were tenê vê carê

Li bilindayîyek nizmtir

Bêje min

Ka tu

Ji kîjan rojên fîraqa şikodar

Hîn bûyî

Wusa bêhnfireh

Li benda pêgehiştinê da

Bi sekinî ?

Ma tu nizanî ?

Ez jî

Hê sîbera xîyalên mestîya xwe,

Bê westîyan,

Li bin kepirka

Vê jiyana bê ser û ber

Herro digirîm.

Wekî rojên zarokînîyê

Gava zîz dibû dayik

Û ez ji tewbeka rast ra

Dibû me penaberê

Vê kepirka nerêk û pêk

Her li wêderê

Yekem car

Min xewnên xwe

Xav xav dicûtin

Û di bilqên kefê da

Didane ba.

Tê bîra min ,

Dayik çiqas şaş û şepirze

Yek yekê wan

Ji heva digirtin

Û gulên belekpêçên

Şivanê gund

Pê di raçandin.

Niha,spîndara xewnên min

Ji ber sama

Zuha bûnê

Çiq û belgên xwe

Bi lez û bez di lerizîne.

Lê...

Ez hê

Evîndarê wan lîzikên lasar im!

Mixabin

Êdî lîstikvan

Li dadigeha xewnên kulîlkbar

Dawerên bê dad in,

Xêncî yasaya

Cadeyek yekrê

Çu lîzikên din nizanin.

Mixabin pir mixabin

Niha li xundingeha kalan

Dawerên bê dad hînkar in,

Li gerên dersa huner da

Herro

Li ser kursîkên reng behitî

Bê hunerane

Teyrê xiyaylên min

Bi mirinê siza diken!

çapkirin