Çêkin jînê, em bi hev ra bibin yar!

Xwaza bûyê cîhan, em tev jîn bin,

Ew û wan. ez û tu ji hev hîn bin!

Destan bidin hev, tev bav û bira,

Binçav nêdîn, ez rindim ewjî na!

Ko em zana bibin, çêkin tişt û xêr,

Rabin ser, xwaşik bikin bibin jîr!

Eme çêkin, tişt, xêr, perde û rol,

Mêr, jin, keç û xortan gula sor!

Erd û ezman gîşkî bikin bax û rez

Hev şahbin, di nav meda çêbê hez!

Erd û ezman, bila hezê bidê hev,

Jin û mêran di xwazada bibin tev!

Li xwe kin kurkê samûr û gehwer,

Ne mizgeft, ne sînegog neçin dêr!

Her kes zana bibê, bigên qata jor,

Hev rûnin, em tev dibine pispor!

Kes nabin, nûjad û kevneperest,

Xêr, bêr jîyan li me gîşkî xweş!

Gîşkî dibin, pispor, zana û dev,

Eme biçin li ser rojê bigên hev!

Nabin birçî û hindik dewlemend,

Em bi hev re bibin xwudan deng!

Destan bidin hev, tev bav û bira,

Pîs nê dîtin, ez mîrovim ew jî na!

Şert û şurt, mîrov gîşkî bigên hev,

Cîhan bihişt em bi rojkin nebê şev!

Erd û ezman, gîşkî bikin bax û rez,

Hev şahbin, di nav meda çêbê hez!

Keç, xort, jin û mêran bibin yek,

Tim aşîtî, tu kest nekin teqe, req!

Xwaşik bikin cîhanê tev keskesor,

Rengê zerî ji jorda xwe berdê dor!

Bîhna gul û endeko tev hev cîhan,

Sosin û kulîlk, li deşt û ser çîyan!

Bixwûnin, bibin zana û hostê jîr,

Xurt bibin, kesek nebê kal û pîr!

Her kes razî dibê, doz û warê xwe,

Bê girtin û bê kuştin, cîhan ya me!

Jîyanê da hobin, mîrovan û terş,

Çareserbê ko tev jinbin li cîhan!

Pirrî hatin cîhanê, bi navê mîrov,

Kuştin, xwîn vexwarin bûne hov!

Di ristê da, her kes jîn bê wekî hev,

Kesek nebê kole, tu kes nebin dev!

Hev rûnin, wekî morîyan bikin kar,

Xwaza da, mîrov xwe bikê dîwar!

Kar û bar, her kes çêkê jina xwe,

Xwûşk, biraê tev bigêne gelê xwe!

Cîhanê da rindî, deyînin yek destûr,

Zana bibin, kesek ji hev nebê dûr!

Zana bin, çêkin koprî û otoban,

Ne terşin mîrov xwe bikin şan!

Çêbikin sera, qonax, birc û ban,

Hev rûnin hezê dênin dil û can!

Hemberî mirinê, bibin hostê jîr,

Dubenî tunebê xwe tev bikin şîr

Rojek werê hûn tev bibên ka Feqîr,

Lê ciwanê cîhanê min nakin ji bîr!

25.04.97. Feqîr Ehmed.