DEWLETA KARTON JI BÊ ÇARETIYA PIRSGIRÊKA KURD Û KURDISTANÊ NIZANE ÇI BIKIE

 

 

 

FÛAD SÎPAN (AKPINAR), fuadsipan@yahoo.de

 

Almanya, 12.04.2007

 

 

 

Kurdistaniyên hêja!

 

Bila Erdogan û çeqelên wek wî baş bizanibin ku serokê Kurdistanê birêz Mesûd Barzanî taca serê Kurdan e, ew ne tenê serokê Kurdistana Azad e, ew herwiha serok û îradeya hemû Kurdan li her çar perçên Kurdistanê ye. Em ji Xwedayê dilovan razî ne ku ew lawê Melle Mistefa Barzaniyê mezin e û îro bi mêranî û bi mêrxasî di şopa bavê xwe de dimeşe û doza Kurdistanê diparêze. Birêz Mesûd Barzanî ji bo Kurdan mîras û diyariya Melle Mistefa Barzaniyê mezin ya herî payebilind û bi zêr e.

 

Dewleta Tirk dîsa rojeva Kurdistanê û Tirkiyê gur kir û Tirk dixwezin bi alavê xwe bigihînin armancên xwe yên bi kirêt. Çima serokê Kurdistanê birêz Mesûd Barzanî di hevpeyvîneke di televîzyona Al Arabiya de gotibû ”heger Tirkiye ji bo sedhezar Tirkmenên Kerkûkê midaxele bike, emê jî ji bo 30 mîlyon Kurdan midaxele bikin” û di eynî hevpeyvînê de serok Barzanî wiha dibêje ”heger Tirkiye dest dirêjî Kerkûkê bike, wê mafê me jî hebe em dest biavêjin Amedê û bajarên din yên Kurdan”

 

Li ser van gotinên serok Mesûd Barzanî di serî de serokwezîrê Tirkan Erdogan û hemû qaşo çep, rast û çeqelên wan ji sînorê terbiye û bêedebiyê derketin, di şexsê serokê Kurdistanê de êrişî hemû Kurdan dikin. Erdogan li ser gotinên serokê Kurdistanê birêz Barzanî wiha dibêje, ”Barzanî heddê xwe derbas kiriye” Erdogan her wiha bi gef û tehdîdên din berdewam dike. Çapemeniya Tirk jî heta ji dest tê ji dijminahiya li hemberî Kurdan sûdê werdigire, ji ne çareseriya pirsgirêkê re xizmetê dike.

 

Heger Tirk dîsa dixwezin telîs û çiwalan têxin serên Mehmetçîkên xwe, bila kerem bikin êrişî Kurdistanê bikin. Bila Tirk baş bizanibin dê çiyayên Kurdistanê ji wan re bibin goristan.

 

Hemû derdên Tirkan li ser Kurdistana serbixwe ye û ew dixwezin îstiqrara Kurdistanê xerab bikin. Lê Tirkan hên fêhm nekirine ku Kurdan ti caran li ber wan serî daneaniye û dê ti caran jî li ber wan serî daneyne. Yanê bi gotineke din, ewên mala min xerab bikin, ez jî mala wan xerab dikim. Yên Tirkan baş nas dikin bi hêsanî dikarin bibêjin, ku Tirkan ji zû de ji heddên xwe jî, ji ceddên xwe jî û ji hedd û ceddên bavên xwe jî derbas kirine. Nayê fêhmkirin ku Tirk çawa wî mafî di xwe de dibînin, ku êrişî Kurdan bikin, Kurdan bi gotinên bêedeb birîndar bikin. Bi salan e Tirk êrişî Kurdan dikin, Kurdan biçûk dixin. Pir caran rayedarên Kurdistana Azad bê deng û bê bersiv dimînin, loma Tirkan ewqas zimanê xwe li ser Kurdistana Azad dirêj kiriye. Bi raya min heger rayedarên Kurdistana Azad di heman deman de wisa bersivê bidin Tirkan dê herin wek pisîkan di cihên xwe de rûnin.

Tirkên ku hetanî sedsala 21an bê nav bûn, bi saya Ewropiyan bûne xwedî nav, ji vir hezar sal berê bi kurtanên ker û hespan, bi hovane, bi destê zorê welatên xelkê talan kirin, welatekî karton ji xwe re bi saya xelkê ava kirin, lê di ser de jî li ser nasekinin, wek donê rûnê ku bi ser avê dikeve dibiriqin û li roja dawiyan xwe digerin. Dijminahiya Tirkan li dijî Kurdan û yên din êdî wek nexweşiyeke bê derman e û di civata Tirkan de cih girtiye. Hezar carî mixabin ku bibêjim, li ser helwesta Tirkan ya îrrasiyonal, ya mantiqê teng (raste ku mirov bibêje ya dijminane û faşîstane), Tirk ne amade ne û dê ti carî jî ne amade bin ku pirsgirêka Kurdan bi awayekî aştiyane çareser bikin. Wisa tê xwiyakirin ku dê Tirk bi vê polîtîkaya xwe di dawiya dawîn de felaketeke wisa bînin serê gelên xwe ku ti kes nikaribe wan xelas bike. Jixwe heta Tirk derbeyeke mezin nexwin û zerarê nebînin dê dest ji siyaseta xwe ya hovane jî ber nedin. Lê ez bawerim, dê Tirk di demeke kin de lingê dîk di tawê de bibînin.

 

Ji sala 1991an vir de Tirk her carê dibêjin, goya wan alîkariya Kurdan kiriye, paseport dane serokên Kurdan û hwd. Tirkan ti caran ji dil de, bi awayekî durist û dostane alîkariya Kurdan nekiriye. Ew her demê bi hêsabên xwe yên kirêt tevgeriyane. Tiştên ji bo başûrê Kurdistanê kirine jî hemû ji bo berjewendiyên xwe kirine. Dewleta Tirk heta rûxandina Sedamê dîktator di hin mijaran de jî mecbûr bû li gorî biryara UNO ya 688 tevbigere. Yanê di rastiyê de heger ji tirsa dinyayê neba dê Tirkan di rojekê de lê bixebitiyana ku Kurdan ji holê rabikin.

 

Bila her kes aqilê xwe topî serê xwe bike. Ev sala sala qedera serxwebûna Kurdistanê ye. Divêt Kurdên li Bakur bi taybetî yên di nava refên partiyên Tirkan (AKP û hwd.) de ne hêsabên xwe baş bikin û di roja teng de li birayên xwe yên Başûr xwedî derên. Heger çewtiya wê bêye kirin, bila ew baş bizanibin dîrok wan efû nake.

 

Divêt Kurdistana Azad jî aqilê xwe topî serê xwe bike û hemû şîrketên Tirkan ji Kurdistanê biavêje. Heger wiha berdewam be, dê Tirk vê carê jî li Kurdistana Azad bibin kolonyalîstên modern û li ser siyaseta Kurdistanê rola xwe bihêlin.

 

Du rê li ber Tirkan hene, yan ewê bibin mirov, yan jî dê têk herin. Alternatîva sisiyan ji bo Tirkan tineye.

çapkirin