GENERALÊN TIRK LI SER XÛNA ZAROKÊN XELKÊ FORTAN DIAVÊJIN

 

 

 

 

FÛAD SÎPAN (AKPINAR), fuadsipan@yahoo.de

 

Almanya, 11.01.2008

 

 

 

 

 

Kurdistaniyên hêja!

 

Me heya niha pir caran xwest balê bikişînin ser mijara ku generalên Tirk çawa zarokên xelkê, çi Kurd, çi Tirk û çi jî yên din ji bo berjewendiyên xwe wek ka û giha bi kar tînin. Mixabin hêza me nîne ku dengê xwe bigihîjînin her aliyê. Em in di destê me de yek înternet heye. Loma dengê me digihîje kêm kesan.

 

Em dev ji Tirkan berdin, mixalefeta Kurdan jî li Bakur hê ev pirsgirêk yan fêhm nekirine û yan jî bi nezantî li ser mijarê nasekinin. Me berê jî gotibû heya şer nekeve mala generalan û kezeba wan neşewite dê general ti carî dest ji şerên bi qirêj ber nedin. Generalên Tirk ji bo jiyana xwe dirêj bikin mecbûr in vê siyaseta xwe ya bi kirêt bi rêve bibin. Alternatîva wan ya duduya tine. Lê heger şer têkeve mala wan, ew jê zerar û ziyanê bibînin dê rewş bê guhertin. Çimkî dê êdî ji bo wan jî şerê man û nemanê be. Wê hingê generalên Tirk belkû bi lez helwesta xwe biguherînin. Wekî din kî çi dibêje bila bibêje ne mimkûn e ku general helwesta xwe biguherînin. Çimkî ew ranta şer dixwin, li ser fortan diavêjin û di nava jiyaneke komfort de dijîn.

 

Generalên Tirk xelkê xwe kiriye qijik û pepûk. Ti kes newêre ji dûr an jî ji nêzîk ve ji leşkeran re bibêje sola we xwar e. Generalan ji xwe re pir biryar û yasayên zagonî jî derxistine ku kes nikaribe nêzîkî wan bibe û wan rexne bike. Kesên derên generalan rexne bikin jî wan wek îxanetkar bi nav dikin û karên wan di nava gel de diqedînin.

 

Mixabin em bixwezin an nexwezin hingiya Abdullah Öcalan di nava lepên generalan de ye, rewşeke wisa li Kurdistanê û Tirkiyê peyda bûye ku mirov nizane destê kê di cêba kê de ye û wisa rewş her ku diçe ji Kurdên Bakur re xerabtir dibe. Hêza ku di nava Kurdan de bibêje êdî bes e divêt tevgera Kurd li Bakur bi serê xwe tevbigere û biryarên xwe bixwe bigire nîne. Loma heya rewş wisa berdewam be dê generalên Tirk li ser Kurdan kapan biavêjin.

 

Ew teqîna bombeyî ku di sisiyê vê mehê de li Amedê pêkhat, di encamê de 6 mirovên bê sûc û guneh hatin kuştin û nêzîkî 70 kes jî birîndar bûn encama siyaseta PKKê ya bê serî û bê berate ye. PKK şer ji Kurdistanê dernexist û nexist mala generalan. Heya şer li Kurdistanê berdewam be dê rewş jî neyê guhertin. PKKê çend roj di pê teqîna bombê de bûyer bi awayeke nîvco, serobero pejirand ku wan ev şaşiya mezin kiriye û lêborîna xwe ji xelkê Amedê xwestin, lê hê jî serî û ba lê didin ku goya biryar ne biryara wan ya navendî ye. Ev helwesta PKKê neçaretiya wan rayê dide, divêt durist bin û bi merdane lêborîna xwe ji xelkê Kurdistanê bixwezin û careke din bûyereke bi vî rengî nekin, nefreta Kurdan qezenc nekin.

 

Tirkên şerxaz çi sivîl û çi jî leşker Kurdistan di nava agir û alavê de hîştine û di ser de wisa pijyayî ne ku teqîna Amedê ji xwe re wek behane bi kar tînin, da ku xelkê bi zirt û derewên xwe bixapînin, îxna bikin ku tevgera Kurd bitemirînin. Tirk heya niha bi derewên xwe û bi dîplomasiya xwe ya bi gendelî, bi rişwet û korrûpsiyonê qismekî bi ser ketine. Mixabin ku heya niha Tirkan ji xambûn û siyaseta Kurdan ya bi cahîlane îstîfade kiriye. Heger Kurdan neheqiyên li dijî wan hatine kirin bi zanetî, bi pilan û pirojeyên baqilane ji xelkê re bigotana, me yê halê Tirkan bidîta.

 

Hukumeta APK ji hemû hukumetên din yên heya niha li Tirkiyê hatine û çûne talûketir e. Çimkî AKP di bin sîwana qaşo îslamê de gotin bi gotin daxwaza generalan li dijî gelê Kurd bi kar tîne. Her çiqas hin Kurdan qedera xwe bi siyaseta APKê ve girêdabe jî, lê dê di dawî de zerar û ziyaneke mezin ji siyaseta AKPê bibînin.

 

Ji aliyê din ve bi rastî gotina “skandal” pir hindik e, dema mirov bibêje mam Celal pesna Erdogan û siyaseta APKê dide, ku berê Kurdên Bakur bide vê siyaseta hezeyanê ya Erdogan. Em nizanin mam Celal û rayedarên Kurdistana azad yên din çawa di xwe de wî mafî dibînin, ku bi navê Kurdan pesna siyasetmedarên wek Erdogan û pesna siyaseta Tirkan didin?

 

Kek Mesûd jî di hevpeyvîna xwe ya di gel Mehmet Metiner de behsa "gelê Tirk yê bi esil" dike. Bi rastî dema em van gotinên wan li ser pesna Tirkan dibihîsin, bîzê mirovan ji wan tê, êdî per û baskên me li ser rayedarên Kurdistana azad dişkên. Em nizanin êdî wana bi çi şiklî bi nav bikin.

 

Mam Celal û kek Mesûd! Ev rûreşiyeke pir mezin e ku hûn li dijî Kurdên Bakur dikin. Gelo ewê li xweşiya we were. ku Kurdên Bakur jî pesna Sadam bidin? Ka bibêjin çi ferq û cudahiya dijminê me û dijminê we heye?

 

Bila xwendevan ji kerema xwe wan gotinên bi nefret û îbret li jêrê di çavkaniyan de him bi zimanê Kurdî û him jî bi zimanê Tirkî bixwînin.

 

http://www.netkurd.com/nuce.asp?id=10303

 

http://www.bugun.com.tr/haberler/010108/p82959.asp

 

http://www.netkurd.com/nuce.asp?id=10305

 

http://www.bugun.com.tr/haberler/010108/p83080.asp

 

Mam Celal û kek Mesûd divêt hûn dest ji vê siyaseta keysperest û parsektiyê berdin. Wekî din destê me ji paskura we dernayê.

çapkirin