ME DIZANÎBÛ HÛN NEWÊREK IN!

FÛAD SÎPAN, fuadsipan@yahoo.de

Almanya, 18.12.2007

Kurdistaniyên hêja!

Me ne dixwest û ne jî bawer dikir ku desthilatiya Kurdistana azad rê bide Tirkan û ew bi behaneya terora PKKê serên çiyayên Kurdistanê bombebaran bikin. Lê êdî rastî ew e ku Tirkan di şeva 15ê meha 12an de ku bi 16ê mehê de girê dide bi 50 balafirên şer ve li serê çiyayên Kurdistanê bombe barandin. Li gorî agahdariya heya niha, jineke Kurd û pênc gerîlla şehîd bûne û pir kesên din jî birîndar bûne. Tirk çiqas jî bibêjin DYA destûr daye wan, lê xwediyê başûrê Kurdistanê Kurd bixwe ne û heger bi destûra wan nebe, ti kes nikare Kurdistana azad bombe bike. Niha desthilatiya Kurdistanê çiqas jî bi gotinên ne ji dil de bûyerê şermezar bike, gogê biavêje Amerîka, serî û ba lê bidin, ev bombebarana Tirkan bi rizayiya wan jî hatiye kirin. Çimkî ev çend hefte ye ku ew jî di nava vê tevnê de ne, hemû rê li PKKê girtin û herêm li wan teng kirin. Rayedarên Kurdistana azad bi vê helwesta xwe newêrektiya xwe dane îspat kirin ku ew ji xêncî berjewendiyên xwe bi ti kesî nafikirin û dikarin bi hêsanî Kurdên Bakûr û yên perçên din bixin qurbana menfiatên xwe.

Heger mirov hinekî aqilê xwe tevlihev bide û li dîrokê mêze bike, dikare baş bibîne ku kek  Mesûd û mam Celal hilweşandinên pir mezin li ser Kurdan bi navê Kurdayetiyê kirine. Loma em vê helwesta wan ya dawîn ne wek siprîz jî dibînin. Îjar me heta niha hemû hilweşandinên wan yên berê kiribû qurbana xatirê Kurdistana azad û behsa wan tiştan nedikir. Ew helwesta me jî rast û di cih de bû. Lê mixabin ew li ser soza xwe nesekinîn, loma gazin jî êdî ji me nabe, em jî mecbûr in hilweşandinên wan yên berê derînin pêşiya xelkê Kurdistanê, bila ew jî bizanibin ku ew ne ferîşte ne û ne jî mafê wan heye li ser qedera Kurdan hên jî hilweşandinan çê bikin.

Ne hewce ye ku em behsa bûyerên 66an û 96an bikin. Ne hewce ye em behsa şerên wan yên Dolaran bikin ku di encamê de bi hezaran zarokên Kurd yên bê sûc û guneh hatin kuştin. Rûreşiya wan ya herî mezin jî ew bû ku navê şerên xwe yên ji bo Dolaran kiribûn şerê birakujî. Û ne hewce ye em li ser bisekinin ku dema Sadam Husên di şerê xelîçê yê yekem de di tengasiyê de ma û bi lez û bez bangî kek Mesûd û mam Celal kir, li Bexdayê bi wan re derket pêşiya televîzyonê û ew maçkirin. Ew maçkirina Sadamê xwînrij di ser de di televîzyonan de bi kek Mesûd û mam Celal re bû Xelata helebce û Enfal. Cîhanê ev rûreşiya wan bi îbret û sosret temaşe kir. Gelê Kurd şahîdê wan hemû bûyeran e. Bila ew camêrana qet meraq nekin yek şansekî wan hebû, lê wan ew jî bi destûra ku wan dane leşkerên Tirk ku Kurdistana azad bombe bikin wenda kir. Ev helwest û destûra rayedarên Kurdistana azad ku leşkerên Tirk derbasî sînor bûn eynî wek siyaseta dijminên Kurdan e.

Mam Celal û kek Mesûd divêt hûn baş bizanibin, heger hûn li pê Tirkan herin û gotina wan bikin dê daxwazên Tirkan ti carî ji we xelas nebin, çimkî Tirk li Bakur Kurdan wek kolên xwe dibînin û ti carî ne amade ne ku mafên Kurdan yên rewa xebûl bikin. Heya Tirk ne amade bin ku pirsgirêka Kurdan li Bakur çareser bikin, dê ti carî daxwazên wan ji we xelas nebin û dê ti carî ne amade bin ku Kurd li Başûr pêşde herin.

Mam Celal û kek Mesûd we bi van kirinên xwe yên dawîn baweriya xwe di nava gelê Kurd de wenda kir. Hûn ne xwedî bi vîziyon û ne jî xwedî bi cewher in ku ji gelê Kurd re rêberiyê bikin. Waye we Kerkûk jî kire qurbana siyaseta erebên kevneperest, Faris û Tirkan. Hûn êdî nikarin pirsgirêkan çareser bikin. Çimkî hemû eşqa we li ser dolaran e.

Mam Celal û kek Mesûd we li Başûr rewşenbîr û ronakbîrên karton yên banqematî ku di dawiya mehê de pereyên xwe distînin ji nava partiyên xwe derxistin ku wan bi pereyan bêdeng bihêlin. Lê divêt hûn tiştekî baş fêhm bikin ku di Kurdistanê de yek qudretek heye ew jî gelê Kurd e. Hûn qet meraq nekin êdî ti tişt we ji xişma gelê Kurd xelas nake. Gelê Kurd çawa dijmin di erdê re kir, dê rojekî bikaribe çiyayê Ezmir û Serê Reş jî di serê we de hilweşîne.

çapkirin