MALNEXIRABNO!
 ÊCA HINEKÎ BI WIJDAN BIN

FÛAD SÎPAN, fuadsipan@yahoo.de

Almanya, 29.02.2008

Kurdistaniyên hêja!

Ev bû hefteyek di ser hovîtiya generalên Tirk re li hemberî gerîla li axa azad derbasbû. Mixabin rayadarên Başûr heya niha ti helwesteke, ti tiştekî berbiçav li hemberî leşkerên Tirk negirtin. Tenê parlamena Kurdistanê di roja 26.02.2008-an de civiya û di daxuyaniyeke heşt xalî de eşkere kir, ku bila Tirk ji axa Kurdistana Azad derên. Heger mirov bi giştî vê daxuyaniya parlamena Kurdistanê şîrove bike, gotineka Almanan, ku dibêjin "blabla, blabla" tîne bîra mirovan. Yanê bi gotineke kurdî helwesta desthilatdarên Başûr ji wîtewîtê pêve neçû. Parlamena Kurdistanê di daxuyaniyê de qet behsa zexta li ser gerîla û xelkên deverê nake.

 

Parlamena Kurdistanê biryareke ku heger leşkerên Tirk ji Kurdistana Azad venekişin, divêt pêşmerge bi şer bersiv bide wan, û wan ji axa azad derîne, neda.

 

Parlamena Kurdistanê helwesteke ku raya Kurdistanê li hêviyê bû negirt, lê di daxuyaniyê de, di xala heftan de, derbarê hilweşandina piran û bingeha strûktûra Kurdistana Azad de, li pey xisar û ziyanê ketiye, ku bi êrişên balafirên Tirkan yên şer ji bala de hilweşandiye, daxwaza tazmînata wan ji Tirkan dike. Bi rastî di rewşeke wiha awarte û hesas de, daxwazeke wisa bextreş layîqî Kurd û Kurdayetiyê nîne.

 

Hey malnexirabno! Serê we bixwe, di ser we û pirên we de, ma qet wijdan di we re tine, ku hûn li wan keç û xortên Kurd xwedî derên, ewên ku niha agir li ser serên wan dibare?. Ma qet hûn li ber wan canan nakevin? Çima hûn nabêjin, divêt pêşmerge ji bo wan alîkar be û nehêle leşkerên Tirk bi ser wan de here?

 

Ma ew canana can nînin, ku li berxwe didin û bersivê didin dijmin?

 

Ma ew can can nînin di vê serma û seqamê de li serê çiyayên Kurdistanê bi mêrxasî li dijî leşkerên Roma Reş honor û şerefa Kurdan diparêzin?

 

Ey bê wijdanno! Ew keç û xortên ku niha di bin metirsiya mayîn û nemayînê de ne, ma ne ji paşil, sîng û berên van dayîkên me Kurdan derketine!? Ew dayîkên ku hebûna Kurd û Kurdistanê heya roja îro li ser piyan hîştine!?

 

Gelo hûnê rojekê çawa li rûyê wan dayîkan binêrin û bersiv bidine wan?

 

Hey parlamenterên Kurd, ma qet poz û kepûyê we ji dijminan neşewitî!? Ma qet hûn şerm û fedî nakin, ku di parlamena Kurdistanê ya pîroz de biryareke wisa bigrin ku honor û şerefa Kurdan biparêze?

 

Ey pêşmergeyên leheng! Hûn çawa û bi çi mafî kumên bêbextiyê didin serên xwe, hûn hestiyên Melle Mistefa Barzaniyê nemir di gorê de dilerizînin?

Ey pêşmergeyên qehreman! Hûn çima li pirensîpên mîlada Kurdî Melle Mistefa Barzaniyê nemir xwedî dernayên? Hûn Bersiva neyaran û nokerên wan nadin?

 

Ey pêşmergeyên canfîda! Ma nayê bîra we, ku serokê nemir Melle Mistefa Barzaniyê pîroz li her perçeyên Kurdistanê li hawara Kurdan derdiket, heya roja dawiya jiyana xwe bi pirensîpên gelê Kurd jiya; ew li wan pirensîpan wek li namûsa xwe xwedî derket û ti carî bi wan pirensîpan nelîst.

 

Ey parêzvanên mîlada Kurdî! Bibin layîqî navê xwe yê pîroz, wan xerabî û şaşiyên desthilatdarên PKKê bidin aliykî. Ma sûcên wan ciwan û canikan çi ye hûn li wan xwedî dernakevin?

 

***

 

Divê navberê de hêsab û planên generalên Tirk tevlihev bû. DYA helwesta xwe eşkere kir û Serokê Amerîka Gorge W. Bush di 28.02.2008-an de got, “Ez di gel Robert Gates im, divêt leşkerên Tirk di demke kurt ji Kurdistana Iraqê derkevin”

 

Tirk vê carê jî li ser gotina serokê DYA George W. Bush, ku çima wî peyva Kurdistan bi kar aniye ketine şokê. Jixwe di heman rojê de wezîrê parastinê Robet Gates hatibû Tirkiyê. Ewî jî ji Tirkan daxwaz kir û got, divêt Tirk zû ji Kurdistanê derên. Mirov ji çapemeniya Tirk fêh dike, ku di navbera Robert Gates, wezîrên parastinê ya Tirkan, serokkomar, serokwezîr û serokê generalan Buyukanit mineqeşeyeke pir tûj derbas bûye. Helwesta Tirkan ew e ku demeke dirêj de li Kurdistana Azad bimîn in. General Buyukanit li ser helwesta wezîrê Amerîka niyeta xwe verişand û got, “demaka kurt mefhûmeka îzafî(letaiv) e carina dikare rojek be, carina jî dikare salek be” Binêrin malpera www.netkurd.net

 

Di eynî êvara rojê de di televîzyona Tirkan Kanal D de kevnegeneralek bi navê Yavuz Erturk bi gotinê serokê Amerîka henekê xwe dikir, dikeniya û digot ewên nema li gotina Bush binêrin, dê şer berdewam bikin.

 

Belê rojên pêşiya me dê pir seriyan biêşîne. Helwesta DYA xwiya dike, ku wan bi sînor destûr dabûn Tirkan. Lê heger Tirkan wisa fêhm kiribin. Ez bawerim generalên Tirk dê pir seriyan gêj bikin, lê yên di dawî dawîn de têk biçin ew bixwe ne.

çapkirin