CEJNA 8ê ADARê BI BAYÊ SERKEFTINÊ TÊ PÊŞWAZÎKIRIN

 HESEN HUSEYÎN DENÎZ

Gerîlayên têkoşerên azadiyê bi serkeftina di dawiya Sibatê de, mohra xwe li meha Adarê dan. Adara îsal bi tevahî wê bibe Adara kurdan. Kurd bi coş û arîşeniyeke mezin wê dakevin kolanan û ji xwe ji niha ve her roj li kolanan diqêrin. Bi rengên netewî li her çar parçeyê Kurdistanê bangên azadî, aştî, wekhevî tên bilindkirin. Gelê kurd biharbûna azadiya xwe dijî. Gelê kurd vejîna biharê dijî…

Tevî hemû zordarî, zilm û biserdeçûnan gerîlayên kurd, careke din, ji tevahiya cîhanê re şanî dan ku têk naçin û berûvajî vîna wan a serkeftinê zindî ye. Aliyê tirk di rastiyê de ji bo vê Adarê bike Adareke reş, Adareke mirinê bi ser gerîlan de, bi hemû derfetên xwe meşiya. Niyeta artêş û dewleta tirk ew bû ku destpêkê Adarê li gerîlan tarî bike û pê re tevahiya biharê bike reşahiya gelê kurd. Ji kurdan re di vê biharê de mirin û qirkirinê bibarîne. Hesap û kîtabên Komara Tirkiyê yên li ser bihara kurdan wiha xerab bûn. Bi deh hezaran leşker, tank, top, firoke, kopter, bi desteka Amerîka, Îsrail, Ewropa û hêzên herêmî bikeve xaka di dest gerîlan de; hîn li wana nebûye bihar, cîhanê li wana tarî bike û bi wê hêzê vegere ser gel, kerr li korên wana rawestîne!

Plan û hesabên Komara Tirkiyê û Amerîka yê di derbarê kurdan de wiha bûn. Wê ev Adar, ev bihar, ev sal li kurdan bikrana dojeh, bi ser wan de mirin bibarandana, bi ser wan de tinekirin birijandana! Derveyî vê ji bo kurdan ti plan û hesabên wan tine bûn.

Li bajaran gelê kurd, li çiyan gerîlayên kurd berxwedaneke mezin li hemberî êrîş û dagirkeriya tirk şanî dan. Gel her roj li kolanan bû û hîn jî li kolanan e.  Gerîla kozik û çeperên xwe baş parast û hîn jî diparêze. Operasyona tirk a tinekirinê, bi têkçûneke ji ya ber deriyê Viyana xeraptir bidawî bû. Niha li Tirkiyê hikûmet û artêş bi hev ketiye. Her yek yekî din tawanbar dike. Tev dixwazin Amerîka tawanbar bikin. Lêbelê Amerîka ew ji têkçûneke domdar rizgar kirin. Ger çendrojeke din li warê gerîlan bimana, dibe ku ev mayîn bûba dawiya şiyandariya Erdogan û hebûna artêşa tirk. Amerîka ev yek dît û bi lez ew paş de vekişandin. Got: `Kuro zû hêzên xwe ji Başûr vekişînin, we xwe jî hetikand û hetka me jî bir!`

Di hesabê Amerîka û Tirkiyê de serkeftin hebû; binketin qet ne li bala wan bû. Lê vîna gel û gerîla derseke dîrokî da wana. Ew li hatina wan poşman kir. Heta demekê wê bi ser xwe de neyên. Dema bi ser xwe hatin jî, wê careke din bixwazin xwe biceribînin. Ger vê carê jî bişkên, êdî wê ev şikestina wan domdar be.

Gerîla û gel Adar kirin Adara xwe. Wê tevahiya vê biharê bi germahiya Adarê re bibe bihareke kurdan. Kurd di vê biharê de, bi coşeke mezin wê xwe rêxistin bikin, xwepêşandanan berfireh bikin, bêhna azadiyê zêdetir bikişînin kûrahiya hinava xwe.

Gel û gerîla diyar kirin ku bi mirin û mayinê bi rêbertiya xwe re ne. Gerîlayên li ber xwe dan, bi hêza ji rêbertiyê, şehîdên azadiyê û gel girtin, li ber xwe dan. Gelê dadikeve kolanan jî dîsa bi hêza ji rêbertiyê, ji şehîdan û ji gerîlan digre dadikeve û diqêre. Ew derdorên dibêjin, `Çima îla rêber Apo?` bila li ser vê berxwedana gel û gerîlan rawestin û xwe bigihînin bersiva vê pirsê. Rêber Apo ji kurdan re hêzek e, germahiya Adarê ye, vîna berxwedanê ye, coş û arîşeniya biharê ye. Rêber Apo ji bo kurdan ji kesbûnê derketiye; ew bûye îlhamek, bûye hişek, bûye bîr û baweriyek. Ji bo wê bidestxistina vê îlamê, vî hişî, vê bîrûbaweriyê tevahiya gelê kurd jî xwedî-îlham, bi hiş û xwedî bîrûbawerî dike. Rêber Apo di dîroka kurdan de jin kirin xwedî îlham, hiş û bîrûbawerî. Ji bo vê di hemû çalakî û xwepêşandanan de jin serî dikişînin. Ev Adar, ev bihar ji herkesî zêdetir a jinên kurd e! Îsal jinên kurd ji her salê zêdetir azad û çalak in. 8ê Adarê li Jinên kurd û li jinên kedkar ên cîhanê pîroz be!

HESEN HUSEYîN DENîZ

çapkirin