Dibêjin; `reng hene li ser ruyê dinyê`;

Hinek kesk in wekî giya

Hinek sor in wekî xwînê

Hinek zer in wekî tava rojê

Roj tiştekî çawaye gelo?

Dibêjin, `tam heye di xwarinê de`;

Şorahî heye wekî ava behrê,

Tirşahî heye wekî simaqa li ser darê

Şêrînahî heye wekî lêvên yarê

Yar tişteke çawa ye gelo?

Dibêjin, `werz hene di salekê de, ne yek him jî çar`!

Berf dibare li serê çiyan, spî dike erd!

Baran lehiyan radike, pêl bi pêl hil dide çeman

Zad di seride, di havîn û payizan de

Bihar bi xwe dihisîne xwezaya vedijîne

His tiştekî çawa ye gelo?

Dibêjin, `awaz hene, ji devê kew û bilbilan`

Stran hene, ji devê yar û evîndaran

Lorîk hene, ji nava lêvên dayikan

Dayik, tiştekî çawa ye gelo?

Gelo kî wê ji min re vebêje; çima?...

Ji min girtin çavên min?

kerr û lal kirin hisên min?

binerd kirin dayika min

Di rojeke navenga Adarê de?

Kê?

Çima?