Dayê

Hewar e li min dayê

Ne dest digre, ne ling

Ne çav dibîne, ne ziman digere

Çima te ez wiha anîm dinyê dayê?

Dayê

Hawar e li min dayê

Ev çi rêzegor in li ser vê xakê

Çima şîn nayê giya

Çima bê pel in dar

Çima naşerqin şalûl û bilbil li ser vê xakê dayê?

Dayê

Li min hewar e li te gazî ye

Dibêjin navê vir `Helepçe` ye

Ka ji min re vebêje dayê

Ma li halepçeyan zarok seqet tên dinyê dayê?

Dayê, hawar û qêrîn e

Dibêjin ev bû bîst sal ku xwişk û birayên min bi jiyanê şa nebûne

Ka ji min re vebêje çîroka wan dayê

Gelo ew jî bê dest bûn

An bê çav

An bê ling

An çawa bûn dayê?

Dayê li min hewar e sed hewar

Çima bêdeng û ne war e ev xaka bê ser û ber

Çima ne yezdan dibihîse ne kes vê hewara bê navber

Kê ev qeder xêz kiriye ji min re dayê

Bêje

Bêje dayê

Bêje, bêje...