HILBIJARTIN BI DAWÎ BÛ, ÊDÎ DOR A ÇARESERIYÊ YE

 HESEN HUSEYÎN DENÎZ

Li Kuridstanê rengê dengan bi hilbijartina 29ê Adarê diyar bû. Tevî hemû hewildan, astengkirin û alîkariya aborî ya kirîna dengan a Hikûmetê, gelê kurd bi hijmarek pirahî daxwaza xwe ji aliyê hêzên azadîxwaz ve diyar kir. Gelê kurd dixwaze bi destê xwe xwe rê ve bibe. Wateya bidestxistina şaredariyan ev e. gelê kurd êdî dixwaze û dikare xwe bi xwe xwe rê ve bibe.

Hikûmet û dewletê wiha hizir dikir ku dengên aliyê kurd dakeve xwarê û bêjin `Wa ye gel we naxwaze, ji bo vê reforman jî naxwaze, çareseriyê jî naxwaze. Polîtîkayên dewletê yên di dierbarê pirsgirêka kurdî de yên heta niha ras tin. Hûn jî werin ser vê polîtîkayê!`

Lê gelê kurd bi vê dengdanê ev niyet û gotin vala derxist; berûvajî kir. Gelê kurd li hemberî vê niyet û gotinê, niyet û gotina xwe wiha eşkere kir:

`Polîtîkayên dewleta tirk ên heta niha di derbarê pirsgirêka kurd de dimeşîne şaş e. divê ev polîtîka were guhertin. Êdî em çareseriya pirsgirêka kurd dixwazin.welatê me radestî me bikin, em dikarin xwe rê ve bibin. Leşkerên xwe ji xaka me vekişînin. Saziyên me û welatê me ji me re bihêlin. Em dikarin di nava dostaniyekê de bi hev re bijîn, lê her kes bi hêza xwe, her kes wek hev.`

Ji bo gihiştina vê daxwazê, bêguman rêyek were meşandin heye. Destpêkê divê dewleta tirk bipejirîne ku gelê kurd jê re ne neyar e dost e, ne pez e, mirov e, ne kole ye azadîxwaz e. pê re divê operasyonên li Kurdistanê di cih de rawestîne. Pê re divê rêbertiya gelê kurd ji Îmraliyê derxîne, azad berde û pê re dest bi hevdîtinên çareseriya pirsgirêka kurd û aştiya civakî bike. Derveyî vê ti rêk û rêbaz dewleta Tirkiyê nikare pak derxîne. Gelê kurd di van rojan de coşa serkeftinê dijî. Ger ev coş bibe hêrs, ti dewlet û ti hêz nikare xwe li ber bigre. Divê Komara Tirkiyê bi rayedarên xwe û fermandarên xwe vê yekê zanibin. Coş her dem wekî coş namîne, dema distewe dibe hêrs û ev hêrs dikare welatan û sazûmanan hilweşîne. Ger vê yekê nabînin, wê demê `xwedê ji wana sitendiye!`

Piştî van hilbijartinan, bê guman wê rayedar û fermandarên Komara Tirkiyê li hev rûnên û li ser rêk û rêbaz û planên nû gengeşe bikin. Hêvîdar im ku dîsa nebêjin, `Bîz bu PKKyî nasil bitirebiliriz?`

Ger wiha bêjin wê dîsa xwexapandinek bê wate bidome. Gerek bêjin, gelê kurd dengê xwe di aliyê çareserkirina pirsgirêka kurd de da, ev ji bo me perspektîfek e û di çarçoweya vê perspektîfê de, ka em çawa dikarin çareseriyeke dadmendî ji vê re bibînin û bînin?

Ger wiha bihizirin û wiha bimeşin, wê bikaribin pêwîstiyên demê bi cih bînin, na ku dîsa xwe bixwazin bixapînin, di vê biharê de, wê dîsa welat bibe gola xwînê. Wê dîsa dayîk li ser zarokan bigrîn. Wê dîsa dem û derfet ji dest werin revandin.

Di vê pêvajoyê de her kesê hişmend, rewşanbîr, demokrat, welatparêz, her kes divê vê bangê li hikûmet û dewleta Tirk bike. Fermo, were ser rêka azadî, aştî û demokrasiyê! Êdî bes e, qirkirina gelan, êdî bes e polîtîkaya înkar û qirkirinê, êdî bes e tinehesibandina kurdan. Êdî bes e dijayetî, zordarî û zilm. Were em bi hev re welatek azad, wekhev û di nava aramiyê de saz bikin.`

Ev bang pêwîst e û yê ku di vê bangê de cih negre û li gorî pêwîstiyên wê tev negere, ew di şerê di rojên pêş de biqewime de dibe alîgirek û berpirsyarek an hevparek. Gerek ti kes xwe neyne vê rewşê.

Bi hêviya bidawîbûna aloziyan û çareserkirineke bi rûmet û dadmendî.

HESEN HUSEYÎN DENÎZ

çapkirin