Îroj (21.11.2009) saet di 16.00 an de li Komeleya Çanda Kurd a Lozanê Rojbûna 85. a rewşenbîr û siyasetmedarê kurd Îsmet Şerîf Wanli hat pîrozkirin. Girseyek ji gel, nivîskar, dostên gelê kurd ên Swîsreyî, hevjîna wî û kurê wî di pîrozbahiyê de amade bûn.

Îsmet Şerîf Wanli sala 1924an di 21ê meha Mijdarê de li Şamê jidayîk dibe. Di dema xwendina dibistanê de bi rewşenbîrên kurd ên navdar re hevnasînê dike. Celadet Alî Bedirxan, Qedrî û Ekrem Cemîlpaşe û bijîjk Nûredîn Zaza dinase. Pişt re xwendina xwe ya zankoyê li Libnan, li Fransa û li Amerîkayê didomîne. Di van salan de bi erebî, fransizî û Îngilizî fêr dibe. Wekî birêz Îsmet dibêje; `Her kes li derveyî welêt zimanê xwe jibîr dike, min li derveyî welêt xwe fêrî kurdî kir.` axaftin û nivîsandina kurdî jî fêr dibe.

Di 29.11.1948an de li Zankoya Lozanê zanyariya hiqûqê diqedîne. Îsmet Şerîf di sala 1995an de,dibe endamê PKDWê (Parlamenta Kurdistan a li derveyî welêt). Piştî sala 1999ê jî KNK û PKDW dibin yek û birêz Wanli ji bo demeke dirêj seroktiya wê dike.