REZALET

 HESEN HUSEYÎN DENÎZ

Li welatekî qaşo demokratîk û paytextiya welatên Ewropa dike de, êrîşkirina bi awayekî dijware û hovane ya li ser saziyên gelê kurd ên rêxistinî û ragihandinî, ji rezaleta bi navê demêkrasiyê zêdetir ne tiştek e. Gelo ev ferman ji Îsarîlê hat dayîn, an ji Amerîkayê hat dayîn? Ango dewleta Tirkiyê çi ya xwe firot dewleta Belçîka ku wilo hemû zagon û pîvanên xwe yên demokratîk binpê kir.  Ev rewşeke ne asayî ye. Ti hinceta vê êrîşê jî tine ye. Ger tawanek, pirsyariyek hebû, pir bi hêsanî dikarîbûn bihatana ji berpirsyarên sazî û rêxistinan bipirsîna. Lê bi dijwarî êrîşkirina ser saziyan, lêdan, av pîjiqandin, xistina kîs a ser serê siyasetmedarên kurd, derveyî rezaletê ne tiştekî din e. Wê sibe duzbe derkeve holê ku ev ferman ji ku hatiye û di berdêla wê de çi hatiye firotin an dayîn!

Berya çend rojan saloxdariya Israilê daxuyaniyek da ku di desteserkirina rêberê gelê kurd a li Kenyayê û radestkirina ji Tirkiyê re weyneke sereke leyistine. Ev daxuyanî ango mukirhatin ne ji ber xwe ve bû. Çima deh salan rawestiyan û di sala yazdemîn de mukir hatin? Ji vê tenê be jî diyar e ku îsal dek û dolabeke nû dixwazin li ser serê gelê kurd bigerînin. Ji xwe ji serê salê ve li Tirkiyê di warê siyasî de bi lêdan, girtin û îşkenceyên ji zarok heta mezinan li gorî xwe encamek girtin û derbeyek li tevgera kurdî ya legal dan. Niha dixwazin lingê vê yê der ve temam bikin. Li derve jî dengê gel bibirin, çavê gel kor bikin. Pişt re çi tê? Li gorî dagirkerên Kurdistanê `pêkanîna temirandina serhildana 29. tê`. Belê ev ne gotineke jiber xwe ye. Hêza emperyal ku di serî de Îsraîl, Amerîka û pê re Yekîtiya Ewropa tê de cih digre, dixwaze di van salan de pirsgirêka kurd ji rojeva xwe derxîne. Lê ne bi awayekî çareserkirina demokratîk û dadmendî, bi awayekî berdewamkirina rêbazên klasîkî. Yanî dîsa girtin, lêdan û kuştinê dixin rojevê…

Bi vê desteserkirinê xwestin gelê kurd biçûk bixin û hêvî û rûmeta wê bin pê bikin; lê di rastiyê de xwe rezîl û ruswa kirin. Ji bo berjewendiya xwe ya aborî, pîvanên xwe yên demokratîk binpê kirin. Wê ev yek birîneke mezin di sazûmana wana de veke. Wê sizaya vê birînê jî di rojên pêş de bikişînin…

Welatên Ewropî van êrîşkariya xwe bi vîn û biryara xwe nakin.  Ew ne xwediyê siyaseteke azad in. Doh li Fransa, pişt re li Îspanya, li Îtalya, berê li Almanya îroj jî li Belçîka êrîşbariya tê lidarxistin tev bi zextdana Îsraîl û Amerîka û serkêşê wan Îngiltere pêk tê. Siyaset ji cihekî tê xêzkirin û ferman tên dayîn. Ji Fransa re dibêjin , ``Niha di vê demê de dora te ye, fermo tu siyasetmedarên kurd bigre, biavêje zîndanê`. Dewleta Fransa di cih de vî karê xwe pêk tîne. Pişt re jê re dibêjin, `Te weynê xwe lîst, niha dora Belçîkayê ye!` Fransa dîlên di dest te berdide û pê re Belçîka êrîşî ser sazî û rêxistiniyên kurd dike. Ji ber ku jê re jî gotine `Êdî dor a te ye. Niha tu bi ser kurdan de biçe.` Heta îroj Belçîka rezaleteke wilo dernexistibû. Qaşo xwe ji kurdan re dost didît. Li parlamentoya Belçîka gelek dostên kurdan jî hene. Lê diyar e hikûmetê ew jî paşçav kirine. Lê ger di rastiyê de dostên gelê kurd bin –ku divê wiha bin- wê li hemberî vê êrîşkariya hikûmeta xwe bê deng nemînin. Demokratbûn û nedemokratbûna wan, dostbûn û nedostbûna wan wê di van du sê rojan de xwe eşkere bike. Ger ji hikûmeta xwe bikaribin hesabê vê yekê bipirsin, wê demê wê dilsoziya wana eşkere bibe.

Gelê kurd jî wê helwesta xwe li her aliyê cîhanê diyar bike. Bi her awayê çalakiyên demokratîk wê nerazîbûna xwe bide der. Roj Tv çav, mejî û guhê gel e. Gel xwe kor, lal û kerr nahêle. Gelê kurd bê deng jî namîne. Ev sazî, ev rêxistinî tev bi xwîna şehîdan û keda gel hatine damezirandin. Ger pêwîst bike ji bo parastina vana wê gelê kurd berdêlên nû bide, lê gavê paş de navêje…

Bi kinahî hikûmeta Belçîkî bi vê êrîşkariya li ser sazî û rêxistiniyên kurd, bi bin xwe de rît… Bêhna vê rîtinê wê di demeke kin de derkeve… Lê ji aliyê Ewropayê ve tişta trajîk ev e ku kesekî bikaribe vê bêhnê pak bike li holê nexuyaye. Ya xisarê dibîne jî demokrasiya gelan û nirxên demokratîk e…

HESEN hUSEYîN dENîZ

çapkirin