TÊKÇÛNA TIRKIYÊ WÊ AZADIYA KURDISTANÊ BÎNE!

 HESEN HUSEYÎN DENÎZ

Dewleta tirk bi destdirêjiya li ser PKKê û Başûrê Kurdistanê pêvajoyeke qederî da destpêkirin. Tirkiye di vê pêvajoyê de wekî qumarbazê kaba xwe li ser qedera xwe biavêje, wiha gaveke mirin û mayinê diavêje. Di vê pêngavê de êdî ne dikare paş de vekişe, ne jî govaniya xwe bîne ser ziman. Divê gava daye destpêkirin heta dawî bimeşîne. Yan divê derbeyeke berbiçav li PKKê bixe yan divê ji dest PKKê derbeyeke berbiçav bixwe! Bê derbelêdan û bê derbexwarin vegera Tirkiyê ji Başûrê Kurdistanê ji xwe wê jê re bibe têkçûna herî mezin. Tirkiye gelek caran li ser xaka Başûr û li hemberî PKKê operasyon lidar xistine. Di her carê de encam negirtiye û paş de vegeriyaye. Ev tev jê re serifî ne, ji ber ku ne êrîşên qederî bûn. Lê vê carê rewş û îdîa cuda ye. Dewleta Tirk ketina xaka Başûr û şerkirina li hember PKKê wekî ferzbûneke ewlekariya xwe dide diyarkirin. Bi vê derewê desteka Amerîka, ya Yekîtiya Ewropa, ya Netewên Yekbûyî, ya hêzên herêmî tev girt û wiha bi sitendina piştgiriyeke xurt êrîşî ser PKKê dike.

Di êrîşa vê carê de, gihiştiye asta herî dawîn a hevalbendî, destek û piştgiriya xwe. Di dîroka xwe de cara yekem e bi hevkarî û destekeke ewqasî mezin êrîşî ser PKKê dike. bi vê sedemê ger vê carê biser nekeve, careke din nikare êrîşeke bi vî rengî bide destpêkirin. Ev pêla wê ya dawî ye. Ger di vê pêngavê de bi bin bikeve, paş de vekişe û careke din bixwaze êrîşeke din lidar bixe jî, wê ev êrîş ti carî qasî vê êrîşa niha bi xurtahî, bi destekgirî û berfireh nebe. Êrîşa Tirkiyê ya ser PKKê, ya gihiştiye sînorên xwe yên herî berfireh û herî dawîn ev e.

Bi vê sedemê, binketina vê êrîşê dikare dewleta tirk bibe têkçûneke domdar û dawîn. Şikestina di vê pêngavê de wê li ser hêzên tirk bêarîşeniyeke pir mezin biafirîne. Aliyê tirk di têkçûneke wiha de wê gelek hevalbendên xwe winda bike, wê destêkên wê hilweşin, piştgirên wê kêm bibin. Wê hêzên wê êdî zêde baweriyê bi xwe neynin. Di nava wê de wê bendbûn derkevin holê. Dengên aştiyê, dengên li dijî şer wê zêdetir û bilindtir hil bin. Gelê tirk ê niha destekê dide operasyonê, wê bikeve nava lêpirsîneke watedar.

Bi vê sedemê Tirkiye bi vê operasyona li ser xaka Başûr gaveke qedera xwe diyar bike avêt. Divê aliyê kurd vê rastiyê bibîne û wiha nêzî vê pêvajoyê bibe. Bila nebêje, `De ev jî operasyonek e, wê çend rojan bidome û leşker vegerin baregehên xwe!` Na! çawa ku artêşa Amerîka ket Iraqê û êdî nema dikare jê derkeve, dibe ku ev serpêhatî bi serê tirkan de jî were. Ger tirk bikaribin di hundirê xaka Başûr de bimeşin û hêzên wan û ên gerîlan hev derbas bikin, êdî vegera artêşa tirk ji Başûr wê çênebe; ji ber ku wê nikaribe vegere. Dema bixwaze vegere, divê windahiyên ji ketinê zêdetir bide ber çav. Windahî ne tenê cendekên leşkeran in; windahiyên siyasî, yên arîşenî(moralî), yên kariyerî, yên desthilatî, yên prestîjî jî hene û ji bo Tirkiye di vana tevan de ji xwe ber nede, wê mayîna di Başûr de bide ber çav.

Ger hêzên artêşa Tirk bikaribin ji 10 kîlometreyî zêdetir bi kûrahiya Başûr ve biçin, êdî ji ber van sedeman wê nikaribin û nexwazin careke din paş de vekişin. Ger hêzên tirk li Başûr di kûrahiya ji deh kîlometreyî zêdetir de bimînin jî, ev tê wateya bidawîbûna şiyandariya Hikûmeta Herêmê ya li Başûrê Kurdistanê. Bi vê sedemê ji her alî ve, ji bo hêzên Kurdistanî pêwîstî bi parastina xaka Başûr heye. Parastina xaka Başûr tenê bi destê PKKê nikare heta dawî were meşandin. Dibe ku Tirkiye sibe di vî şerî de serkeftineke berbiçav bidest bixe û Îran û Amerîka jî ji vê wêr bigrin û tev li êrîşkariya Tirkiyê bibin, bixwazin derbeyeke mirinî li PKKê bidin. Di herêmê de mirina PKKê tê wateya mirina hemû destkeftiyên kurd û Kurdistanê. Ev rastiyeke nayê guhertin e û li gorî vê rastiyê serkeftina PKKê jî dibe serkeftina tevahiya kurd û Kurdistanê. Ji bo vê, ev pêvajo, ev şer qedera gelan diyar dike. Ev ji bo aliyê kurd jî, ji bo aliyê tirk jî wiha ye. Binketina aliyê tirk wê bibe serketina aliyê hemû kurdan. Hêvîdar im ku hemû kurd bi vê zanistiyê wê tevbigerin û hesabên şaş nekin!

HESEN HUSEYÎN DENÎZ

çapkirin